Ala Kalɔ Buse 48 - Katɔti Ɔku Kedee

Yakob Úte Manase Ku Eƒraim Kusɛ Kusɛ

¹ Na uwi ɔdi kama ni, bábasu Yoseƒ banini, “Ƒ'ɔti uuƒi.” Ɔmmɔ ɔsu ɔ́ta na útiku nwuna bebi bananabi inyɔ bani ndi Manase ku Eƒraim na bésie ɔti kudɔ.

² Ka bétéduo ni, ukyuli ɔdi ɔ́su Yakob ɔnini, “Ƒ'ubidi Yoseƒ úbo-ɔ kudɔ.” Mmɔ kani na Israel úkpoku lɛlɔ ɔyikun bɔdi na ɔ́ta úlie nwuna katɛnkɔ mmɔ.

³ Amu na Yakob ɔ́su Yoseƒ ɔnini, “Unwoti Katɔti údie lɛlɔ ɔ́tina-mi na kesii kani baalɔ Lus na Kanaan kalɔ lɛlɔ. Na mmɔ ni, úte-mi kusɛ kusɛ.

⁴ Na ɔ́su-mi ɔnini, ‘Ndubɔya na awɔ bebi na bimomo geen na binwini kadi bekyuli pii, na ndubuti kalɔ kamɛni lite-ɔ na kenwini awɔ ku ƒula kaba kemmo bebi kadi uwi ƒui.’

⁵ “Na ɔƒaani ƒula bebi bananabi inyɔ bani na báwɔ béte-ɔ na Egyipte kalɔ lɛlɔ mɛni asa na líbo ni, badubo-ma bɔka ka ami badi badi. Ɔmmɔ ɔsu ni, Eƒraim ku Manase badubo bunwini ami badi kalɛ kani na Ruben ku Simeon badi ami badi.

⁶ Na bebi bani na adubɔsɔ awɔ na bana kama ni, ama na badubɔka aani awɔ badi. Na kadikɔ kani na badubɔkɛ ni, kadubɔsi bana banwani bamɛni lɛnyi kemmo.

⁷ Na uwi ɔni na línwini lɛ́si Mesopotamia kalɔ lɛlɔ ni, ḿbasiaku ɔgbankpi. Na uwi ɔni na bɔkɛ ulu na kébu blii na buduo Eƒrata na kesii kani lɛnɔ baalɔ Betlehem na Kanaan kalɔ lɛlɔ ni, mina uleku Rahel úbekpi na líduo kɔnyana. Anwuɔsu lɛ́va-nwu na kuludɔ mmɔ.”

⁸ Uwi ɔni na Israel únwini ɔ́nu Yoseƒ bebi ni, úye ɔnini, “Ɔma bebi badi mɛni?”

⁹ Mmɔ na Yoseƒ údie kenye ɔnini, “Bebi bani na Unwoti Katɔti ɔ́ya na lɛ́wɔ mɛni na badi.” Amu na Israel ɔ́su ɔnini, “Kpanku-ma boku-mi na lite-ma kusɛ kusɛ.”

¹⁰ Na uwi ɔmmɔ kemmo ni, Israel bɔnu bɔmmɔ bɔsɔ bulékpi-nwu kaduɛ ka ɔ́ɔbla unengu ɔsu. Nwuna anumi aabla-nwu ƒluƒlu. Ɔmmɔ ɔsu Yoseƒ ɔ́kpanku bebi bammɔ na báni béde ɔti na ɔ́kya-ma kɔgbu.

¹¹ Ɔmmɔ kama ni, Israel ɔ́su Yoseƒ ɔnini, “Lɛɛɛsia anu nnii nsɔ ndubo-ɔ bɔnu kudii. Na ɔƒaani ni, Unwoti Katɔti ɔ́ya na lɛ́nu-ɔ ku ƒula bebi lɛnɔ.”

¹² Ka ɔ́su lɛni ɔ́wɔlɔ ni, Yoseƒ ɔ́da bebi bammɔ na báta Israel lɛgba lɛlɔ na ɔ́yu úbi kalɔ na ɔti anumi mmɔ.

¹³ Yoseƒ ɔ́ya na Eƒraim úbenye-nwu kɔdianu na Israel kɔmii kakɛ. Na ɔ́ya na Manase úbenye-nwu kɔmii kakɛ na Israel kɔdianu kakɛ. Na ɔ́ya na bana ƒui báni béde ɔti Israel.

¹⁴ Nsu Israel údie nwuna kɔdianu útásia Eƒraim lili ina ka anwu ndi ɔnamu. Na ɔ́vumana nwuna kɔmii útásia Manase lili ina ka anwu ndi ubi unengudi.

¹⁵ Amu na úte Yoseƒ kusɛ kusɛ na ɔ́su ɔnini, “Unwoti Katɔti nátɔnku mina bati bani ndi Abraham ku Isak. Unwoti Katɔti anwu náda-mi na mina ngba emeyi kemmo ƒui aani baƒonu ɔdane kalɛ.

¹⁶ Na ɔ́ya na nwuna ɔtu údie-mi na ɔdi útabla-mi kalala kadi. Muuvele nnii ute bebi bananabi bamɛni kusɛ kusɛ. Mina lɛnyi ku mina bati bani ndi Abraham ku Isak lɛnyi na badubo bɔdi. Na muuvele nnii bawɔ na bemomo na baƒɔ lɛnyi na kayawi.”

¹⁷ Mmɔ ka Yoseƒ ɔ́nu ka Eƒraim lili na ɔti úti nwuna kɔdianu ɔ́sia ni, útayɔ-nwu kaƒɔ. Ɔmmɔ ɔsu ni, ɔ́da ɔti kɔdianu ɔnii uuti utásia Manase lili.

¹⁸ Na Yoseƒ ɔ́su ɔti ɔnini, “Ati, oowo! Aanu, ɔmɛni ndi ubi unengudi. Ti ƒula kɔdianu sia-nwu lili.”

¹⁹ Nsu ɔti úbulo na ɔ́su ɔnini, “Ubi, ngyi lɛni. Anwu lɛnɔ ni, kadi bekyuli badubɔsi-nwu kemmo na ɔƒɔ lɛnyi. Nsu nwuna ɔmansiane ni, ɔdubɔƒɔ lɛnyi utulo-nwu. Na nwuna bebi ku bawɔ badubo bunwini kadi bekyuli pii.”

²⁰ Úte-ma kusɛ kusɛ limeyi lɛmmɔ na ɔ́su ɔnini, “Bina lɛnyi kemmo na Israel kadi bekyuli badubo buvele kusɛ kusɛ bute bekyuli banini, ‘Unwoti Katɔti ute-ɔ kusɛ kusɛ aani Eƒraim ku Manase.’ ” Ɔmmɔ ɔsu ɔ́ya na Eƒraim únwini lili úte Manase.

²¹ Ɔmmɔ kama ni, Israel ɔ́su Yoseƒ ɔnini, “Uwi údu ka likpi. Nsu Unwoti Katɔti ɔdubulieku-ɔ na ɔsɔku-ɔ usienku ƒ'ɔti bene kalɔ lɛlɔ.

²² Na awɔ ni, awɔ ntɔnku ƒula banwani. Na awɔ na líti Amoriƒuɔ kalɔ kani na líkpo lɛ́ƒɔ ku mina kewii ku kataminta muute.”