Ala Kalɔ Buse 25 - Katɔti Ɔku Kedee

Abraham Úkpi

¹ Na Sara kukpi kama ni, Abraham ɔ́sɔ úbeti uleku bamba ɔni baalɔ banii Ketura.

² Uleku ɔmɛni ɔ́wɔ Simran ku Yoksan ku Medan ku Midian ku Isbak ku Sua úte Abraham.

³ Na Yoksan ɔ́wɔ Seba ku Dedan. Na Dedan ɔmɛni bebi ku bawɔ ndi Asurƒuɔ ku Letusƒuɔ ku Leumƒuɔ.

⁴ Na Midian bebi ndi Heƒa ku Heƒer ku Hanok ku Abida ku Eldaa. Na bebi bamɛni ƒui badi Ketura bawɔ.

⁵ Ɔmmɔ kama ka Abraham úbekpi ni, ɔ́da nwuna lɛkɛ ƒui úse Isak.

⁶ Nsu na nwuna ngba kemmo ni, úte nwuna bebi bani na beleku bamba báwɔ béte-nwu ƒui ɔdi biala nwuna kadikɔ na údie-ma ulu na úbu Isak lɛti pɛ.

⁷ Na akwa ani ƒui Abraham ɔ́ƒɔ asa na úkpi ndi eti atɛ ku aavlanyɔ-ɛlɔ (175).

⁸ Uwi ɔmmɔ na Abraham ɔ́yula ɔni na ɔ́bi lɛlɔ geen. Na ɔ́tɔlɔ úsie Katɔti kudɔ aani kalɛ kani na nwuna bati lɛnɔ bésie kalɛ.

⁹ Nwuna bebi bani ndi Isak ku Ismael báva-nwu na lɛtakpɛ ubu kemmo. Ubu ɔmɛni ɔkya kalɔ kani baalɔ Makpela kemmo na kedenku Mamre. Na kalɔ kammɔ ɔlati ndi Eƒron ɔni ndi Hetini ɔni baalɔ Sohar ubidi.

¹⁰ Kalɔ kamɛni na Abraham úye ɔ́siku Hetiƒuɔ kudɔ. Na mmɔ na báva Abraham bébunku ulekudi Sara.

¹¹ Na Abraham kukpi kama ni, Katɔti úte Isak kusɛ kusɛ. Na uwi ɔmmɔ ni, Isak ɔmu ɔkya kalɔ kani nde kesii kani baalɔ banii Beer Lahai-Roi kemmo.

Ismael Bebi Anyi

¹² Abraham ulekubi kabla ɔblane ɔni baalɔ Hagar ubi ɔni na ɔ́wɔ úte Abraham na baalɔ-nwu Ismael ni, nwuna lɛlɔ kɔtɛ na bɔdubo bunu mɛni.

¹³ Ismael bebi bani na ɔ́wɔ atɔ asia ndi Nebaiot ubi unengudi, ɔmmɔ kama ni, ɔ́wɔ Kedar ku Adbeel ku Mibsam.

¹⁴ Ɔmmɔ kama ɔ́wɔ Misma ku Duma ku Masa.

¹⁵ Nwuna kama ɔ́wɔ Hadad ku Tema ku Yetur ku Naƒis ku Kedema.

¹⁶ Bebi bammɔ na Ismael ɔ́wɔ. Na bédie atɔƒi leevu-anyɔ ku bana batɔnkune na kalɛ na béti báda bana kuliekɔ kenye.

¹⁷ Ismael akwa ani na ɔ́ƒɔ ndi eti anyɔ ku avlaatɛ-maatɛ (137). Ka údu mɛni ni, ɔ́yula na ɔ́tɔlɔ úsie Katɔti kudɔ aani kalɛ kani na nwuna bati lɛnɔ bésie kalɛ.

¹⁸ Na nwuna bebi ku bawɔ ni, báda kuliekɔ na kalɔ kani nwi Hawila úsie Sur kesii kani nde Egyipte ɔmii kudɔ si éti ésela Asiria kakɛ. Nsu béteduku munu munu, mmomu bélie mmɔ aani bekisine.

Isak Ɔ́wɔ Yakob Ku Esau

¹⁹ Abraham ubidi Isak lɛlɔ kɔtɛ na bɔdubo bunu mɛni. Úbebo úte ka Abraham ɔ́wɔ Isak.

²⁰ Na Isak lɛnɔ úbeti uleku ɔni baalɔ Rebeka uwi ɔni na ɔ́ƒɔ akwa aavlene. Na Rebeka ɔmɛni ku ɔnwani ɔnanabi ɔni baalɔ Laban ni, bana ɔti ndi Betuel ɔni nási Mesopotamia kalɔ lɛlɔ na kadi kani bekyuli baalɔ Aramƒuɔ akɔ.

²¹ Na Rebeka ɔmɛni ni, ɔdi udinkɔ. Anwuɔsu ni, Isak ɔ́kpali Katɔti na nwuna lili na nwuna tawɔ tawɔ ɔsu. Na Unwoti Katɔti lɛnɔ únu-nwu bɔkpali na ɔ́ya na ulekudi Rebeka úbada kaƒɔ.

²² Na kaƒɔ kani na ɔda mmɔ ni, Rebeka ɔ́ti ka alakpa anyɔ adi eekpóku lɛlɔ na nwuna kaƒɔ kemmo. Mmɔ na úye lɛlɔ ɔnini, “Bi ɔsu na lɛla lɛmɛni udu lɛɛlɛ́ku-mi?” Ɔmmɔ ɔsu úsie útákpali Katɔti na úvele-nwu ka ɔya na ɔti lɛla lɛmmɔ kalɔ.

²³ Amu na Unwoti Katɔti ɔ́su-nwu ɔnini, “Kadi bekyuli akpa anyɔ nkya-a kaƒɔ kemmo. Na nkyuli inyɔ bani nási-ɔ kaƒɔ kemmo ni, badubo lɛlɔ bule. Na lɛkpa linwi lɛdubɔkɛ ɔyikun litulo lɛkladi. Ubi unengudi ɔdubunwini ɔnamudi kabla ɔblane.”

²⁴ Ka uwi úbedu ka ɔwɔ ni, ɔ́wɔ nta. Na badi bebi bananabi inyɔ.

²⁵ Udeedi ɔni náka bɔlɛ ni, úgyie. Na nwuna lɛlɔ ƒui linwini lígyie. Ɔmmɔ ɔsu básia-nwu lɛnyi banii Esau.

²⁶ Ɔmmɔ kama asa na ɔnwani lɛnɔ úbalɛ, na úƒie ɔnwani kagbama ɔ́da. Na anwu lɛnɔ básia-nwu lɛnyi banii Yakob. Na asa na Rebeka wawɔ bebi bamɛni ni, Isak ɔ́ɔƒɔ akwa liti ku leevu.

²⁷ Bebi bammɔ bálɛ lili na Esau úbenwini ɔgbini geen, na aku kemmo kani na ɔɔví. Na Yakob anwu ni, nwuna udu use kpoo ɔni na uwi biala kevo kemmo kani na ɔkya.

²⁸ Ka Isak ɔɔyɔ́ alakpi akɔ lɛna ɔsu ni, anwu ɔɔyɔ́ Esau litemi geen. Nsu Rebeka anwu ni, Yakob na ɔɔyɔ́.

²⁹ Limeyi lɛdi ka Yakob ɔkya ɔɔbla kutu ƒɛƒɛɛ kɔdi ni, Esau ɔ́si kabuinkɔ úbeduo na kɔka kɔ́du-nwu ƒui.

³⁰ Amu na ɔ́su Yakob ɔnini, “Babla na ete-mi ƒula kutu kugyiedi kɔmmɔ kɔdi, ɔsika kɔka kɔ́du-mi ƒui.” Ɔmmɔ ɔsu na basɔ baalɔ-nwu banii Edom ɔni kalɔ lɛnɔ ndi ugyiedi.

³¹ Mmɔ ni, Yakob ɔ́su Esau ɔnini, “Ka ƒula lɛwɔnengu buti buye bute-mi asa na ami lɛnɔ mete-ɔ mina kutu kɔmɛni kɔdi.”

³² Mmɔ ni, Esau údie kenye ɔnini, “Nu, bukpi na nda! Bi na lɛwɔnengu lɛdubɔbla-mi?”

³³ Amu na Yakob ɔnini, “Ka Katɔti bɔkpali na ese-mi kenye!” Anwuɔsu Esau ɔ́kpali Katɔti na úse-nwu kenye ka úti nwuna lɛwɔnengu úte Yakob.

³⁴ Ɔmmɔ kama ni, Yakob úti bodobodo ɔdi ku kutu buni kɔni na ɔ́bla mmɔ úte Esau na ɔ́di na ɔ́ni na ɔ́ta ɔ́tɔlɔ. Anwuɔsu Esau úni nwuna lɛwɔnengu ƒui.