Ala Kalɔ Buse 22 - Katɔti Ɔku Kedee

Katɔti Ɔ́kɔku Abraham Ɔnu

¹ Akwa adi kama ni, Katɔti ɔ́kɔku Abraham ɔ́nu na ɔ́kpali-nwu ɔnini, “Abraham!” Na Abraham lɛnɔ ɔ́tuna ɔnini, “Ati, aanu-mi.”

² Amu na Katɔti ɔnini, “Ta na eti ƒ'ubidi Isak unwi pɛ ɔni na aayɔ́ mmɔ, na eteesie Moria kalɛkɛ lɛlɔ. Mmɔ ni, tádu-nwu na akyula-nwu eti abla akpala ete-mi na kɔbi kɔni matina-a lɛlɔ.”

³ Ka kadi kégye lɛdigye tutuutu ni, Abraham ɔ́ta na útile nwuna ebuo ala utine ala na ɔ́bala-nwu ala kaduɛ. Amu na útiku nwuna kabla bablane inyɔ ku ubidi Isak. Na ka ɔ́yɔ ekyweni pii na edu kalɛ na weti wakyula akpala ammɔ ni, ɔ́yu ulu úsie kesii kani na Katɔti ɔ́tina-nwu mmɔ.

⁴ Na ka bákɛ ulu bésela limeyi lɛtɛdi lɛlɔ ni, Abraham ɔ́talaku anumi na ɔ́nu kesii kammɔ úmene.

⁵ Amu na ɔ́su nwuna kabla bablane ɔnini, “Amii bɛsɔ binye mɛni ku ebuo ala utine ɔmmɔ. Na ami ku mina ubi busie butákpa Katɔti na bɔsɔ bunwini bubo.”

⁶ Ɔmmɔ kama ni, Abraham úti ekyweni ammɔ útile ubidi Isak. Na anwu ɔlati ɔda ogya ku kewii. Amu ka bana inyɔ bakɛ bésela ni,

⁷ Isak ɔ́kpali ɔti ɔnini, “Ati.” Mmɔ na ɔti lɛnɔ ɔ́tuna ɔnini, “Ubi.” Amu na Isak úye-nwu ɔnini, “Búti ekyweni, na bɔda ogya, na koƒonu kɔni na bɔdubo bɔkyula bɔbla akpala ammɔ ni, ntele-ku?”

⁸ Amu na Abraham údie kenye ɔnini, “Ubi, Katɔti ɔlati ndubute-bu koƒonu kɔni na bɔdubuti bɔbla akpala ammɔ.” Ka ɔ́su-nwu lɛni ni, básɔ béti bákɔ bésela.

⁹ Na ka bédu kesii kani na Katɔti ɔ́tina-nwu mmɔ ni, Abraham ɔ́tu lɛkpabi na ɔ́tɛ ekyweni ammɔ ɔ́sia-ni lɛlɔ. Na ɔ́da ubidi na únyimi-nwu kaduɛ na ɔ́gyu-nwu ɔ́sia lɛkpabi lɛmmɔ lɛlɔ na ekyweni ammɔ lɛlɔ.

¹⁰ Mmɔ na úsienku kɔnu na údie nwuna kewii kalɛ na ɔdu ubidi.

¹¹ Kɔnakunwi ni, Katɔti ɔtu ɔdi ɔ́kpali ɔ́siku Katɔ ɔnini, “Abraham! Abraham!” Amu na Abraham údie kenye ɔnini, “Aanu-mi mɛni.”

¹² Mmɔ ni, ɔtu ɔmmɔ ɔ́su Abraham ɔnini, “Ƒula kɔnu kutetuku ɔnamu ɔmmɔ. Na tabla-nwu lɛla lɛdi lɛnɔ. Ɔƒɛni na lɛ́nu lɛ́ti ka aayia Katɔti sɔsɔ. Ɔsika éteni ka eti ƒ'ubidi ɔni ndi ubi unwi pɛ ɔni na ebo ete-nwu.”

¹³ Amu ka Abraham ɔ́talaku anumi ɔɔnu ni, ɔ́nu koƒonu kɔgyani bonwu kɔdi ka kunye na kuna ese ábala kugyii kɔdi kɔgba. Amu na úsie útédie koƒonu kɔmmɔ na úti-ku ɔ́kpa ɔ́bla akpala na ubidi ɔmmɔ kenye.

¹⁴ Ɔmmɔ ɔsu ni, Abraham ɔ́lɔ kesii kammɔ ɔnii Katɔti Ɔdubute. Na úti úbedu ku ɔmwi limeyi lɛmɛni lɛlɔ ni, ɔdi lɛsugba lɛdi na baasu banii, “Na Unwoti kɔbi lɛlɔ ni, anwu ɔlati ɔdubute lɛla lɛni bɔɔwia.”

¹⁵ Ɔmmɔ kama ni, Katɔti ɔtu ɔmmɔ ɔ́sɔ ɔ́kpali Abraham kunyɔdi.

¹⁶ Na ɔ́su-nwu ka Unwoti Katɔti ɔ́su ɔnini, “Éteni ka eti ƒ'ubidi unwi pɛ akpa ete-mi. Anwuɔsu ni, lɛ́kpali lɛlɔ líse kenye ka

¹⁷ ndubute-ɔ kusɛ kusɛ na lɛya na ƒula kaba bebi bemomo betulo ayabi. Na badubo bumomo aani ɛpu kɔnwinimi. Na ƒula bawɔ badubo bukpo na baƒɔ bana bekisine lɛma linengudi ƒui.

¹⁸ Na ɔkɛ ƒula kaba kemmo ni, ndubute kayawi ƒui bekyuli kusɛ kusɛ. Ɔsika énu-mi litemi na ádi-ni lɛlɔ.”

¹⁹ Ɔmmɔ kama ni, Abraham ɔ́sɔ únwini úsie nwuna kabla bablane kudɔ. Na bénwini bésie Beer-Seba. Na Abraham útélie Beer-Seba mmɔ.

Bebi Bani Nahor Ɔ́wɔ

²⁰ Uwi ɔdi kama ni, bábasu Abraham banini, “Milka lɛnɔ únwini uwele.” Ɔsika ɔ́wɔ bananabi úte ɔnwani ɔnanabi ɔni ndi Nahor.

²¹ Us ndi ubi udeedi, na Bus ɔsia ku Kemuel ɔni ndi Aram kadi bekyuli ɔti.

²² Ɔmmɔ kama Kesed ɔsia ku Haso ku Pildas ku Yidlaƒ ku Betuel.

²³ Betuel ɔmɛni náwɔ Rebeka. Na bananabi maane bamɛni na Milka ɔ́wɔ úte Abraham ɔnwani ɔnanabi Nahor.

²⁴ Na nwuna ɔsɔnɔ ɔni baalɔ Rehuma lɛnɔ ɔ́wɔ bananabi úte-nwu. Na bebi bammɔ ndi Teba ku Gaham ku Tahas ku Maaka.