Ala Kalɔ Buse 18 - Katɔti Ɔku Kedee

Baƒɔ Ɛtɛ Badi Béduo Abraham

¹ Na uwi ɔdi kama ni, Unwoti údie lɛlɔ ɔ́tina Abraham na Mamre egyii enengudi kudɔ uwi ɔni na ulie nwuna kevo kenye ka kadi kábi ɔsu.

² Mmɔ ni, Abraham ɔ́talaku anumi na ɔ́nu nkyuli ɛtɛ badi ka benye-nwu kɔmadɔ. Ka ɔ́nu-ma kani na ɔ́babla na ɔ́ta kesii kani na úlie mmɔ útásiaku-ma ulu na úboku lili kalɔ bana anumi.

³ Amu na ɔ́su ɔnini, “Ati, si ánu-mi áti ka lɛ́manku ni, tebo tavi ami ƒula kabla ɔblane.

⁴ Ya na beboku ntu bɔdi na bina ƒui bɛƒɔ lɛgba na bɛnwuna na kugyii kɔmɛni kalɔ.

⁵ Na aya na lɛwia lɛla lɛdi lite-mii na bɛdi kalɛ na bɛsɔ bɛkɛ ɔlɔkplu na biteesie bina ulu ka ami ƒula kabla ɔblane na bíbeduo.” Amu na ama lɛnɔ banini, “Ƒaa, bla kalɛ na aayɔ́.”

⁶ Ɔmmɔ ɔsu ni, Abraham úkeli úsie ulekudi Sara kudɔ na kevo kemmo na ɔ́su-nwu ɔnini, “Babla na ama ɔlaaƒɔ lɛɛƒɛɛ ɛtɛ na anwu na eƒi bodobodo ɔdi.”

⁷ Ɔmmɔ kama ni, úkeli úsie nwuna bebuo akɔ na útáƒuna ɔmantɛ akɔ ɔkɔdi ɔdi úte nwuna kabla ɔblane ɔnii utádu-nwu na ɔbla-nwu kaduɛ uboku.

⁸ Amu na bábla adila adi béboku-ma ku bebuo anyi ntu ku lɛna lɛni bágyi mmɔ na béti béte-ma banii badi. Na uwi ɔni na belie baadi ni, Abraham ɔ́sɔ únye-ma kudɔ mmɔ na kugyii kalɔ.

⁹ Amu na béye-nwu banini, “Wɛ na ƒ'ulekudi Sara ɔkya?” Údie kenye ɔnini, “Ɔkya kevo kemmo ngye.”

¹⁰ Amu na Unwoti ɔ́su-nwu ɔnini, “Sɔsɔ ni, ndubɔsɔ linwini libo-ɔ kudɔ lɛkwa lɛni ndubo uwi ɔmɛni kalɛ. Na ƒ'ulekudi Sara ɔdubɔwɔ ɔnanabi.” Na uwi ɔmmɔ kemmo ƒui ni, Sara ɔkya kevo kemmo uunú lɛla lɛni na baasu, ɔsika bénwini kama bákya kayakun kammɔ.

¹¹ Ɔƒɛni Abraham ku ulekudi Sara ƒui ni, bana akwa éesie lɛtɔtɔ geen ɔsu báabi. Na Sara lɛnɔ ɔ́ɔvi uwi ɔni na nka ɔkana kaƒɔ bɔda.

¹² Ɔmmɔ ɔsu ni, Sara ɔ́ma na ɔ́su lɛlɔ ɔnini, “Ɔni na ami ku mina ɔtɔlati bɔ́ɔbi mɛni ni, ɔƒɛni na bɔdubo ebiti amɛni bɔkɛ?”

¹³ Amu na Unwoti úye Abraham ɔnini, “Bi ɔsu na Sara ɔ́ma na úye ɔnii, ‘Sɔsɔ na ndubɔsɔ lɛkana kaƒɔ bɔda ɔƒɛni?’

¹⁴ Bɛɛkali bɛnii lɛla lɛdi libo ɔkplu litulo Unwoti ka ɔkana bɔbla? Ndubɔsɔ linwini libo-mii kudɔ na uwi ɔni námanku lɛlɔ na lɛkwa lɛni ndubo. Na Sara ɔdubɔwɔ ɔnanabi.”

¹⁵ Ka Sara ɔ́yia ɔsu ni, ɔ́su ɔnini, “Ńtama!” Nsu Unwoti ɔ́su-nwu ɔnini, “Sɔsɔ na ɔdi ka áma.”

Abraham Úvele Na Sodom Lili

¹⁶ Amu uwi ɔni na bekyuli bammɔ báta banii baatɔlɔ ni, bénwini bánu bésienku kada kakɛ kesii kani na Sodom ɔma uwi, na Abraham lɛnɔ ɔkɛ ɔsiaku-ma kalɛ na use-ma ulu.

¹⁷ Mmɔ ni, Unwoti úye lɛlɔ ɔnini, “Ɔdia si líti lɛla lɛni na nnii mɔɔbla lɛ́bala Abraham?

¹⁸ Abraham ɔdubo bɔwɔ na nwuna kadi bekyuli baƒɔ lɛnyi na bakɛ ɔyikun. Na ɔkɛnku Abraham ɔmɛni lɛlɔ ɔsu na ndubute kayawi kadi ƒui bekyuli kusɛ kusɛ.

¹⁹ Ɔsika ami náƒuna-nwu kalɛ na ɔtina nwuna bebi kavikɔ na nwuna kadi bekyuli bani masia-nwu kama ƒui basia ulu ɔni na mɔɔyɔ́ lɛlɔ. Na bataabla ala ani ndia na akɛ ulu lɛlɔ. Na ɔkɛnku ɔmmɔ lɛlɔ na ndubuti lɛla lɛni na lɛ́su líse ka mete Abraham lite-nwu.”

²⁰ Ɔmmɔ kama ni, Unwoti ɔ́su Abraham ɔnini, “Muunú likyulikpi lɛni na bekyuli bani nkya Sodom ku Gomora baabla. Bana ekpidi ávi ntu.

²¹ Anwuɔsu ndubɔyu lisie ntánu si sɔsɔ na baabla ala ani na muunú mmɔ. Na si uuuse lɛni ni, na lɛti.”

²² Amu na bekyuli bammɔ bátu bénwini bésie Sodom kakɛ, nsu Abraham anwu ɔ́sɔ únye mmɔ ɔɔnu Unwoti anumi.

²³ Mmɔ ni, Abraham ɔ́ni úde Unwoti na úye-nwu ɔnini, “Buvele, adubɔyila bekyuli babuni udu lɛnɔ ebunku bekyuli bekpidi bammɔ?

²⁴ Si nkyuli liti badi bekyuli babuni na ɔma unengudi ɔmmɔ kemmo ni, adubɔyila ɔma ɔmmɔ udu?

²⁵ Ńtaƒɔ ńtadi ka adubɔbla lɛni, na adu bekyuli babuni ku bekpidi ɔni mɔɔtina ka ábla bekyuli babuni ku bekpidi ulikplu likeke. Ɔmmɔ udu anwu ni, ngyi nwaa ka awɔ ɔni mɔɔtɛku kayawi ƒui litemi adubɔbla lɛla lɛni ndi ulu.”

²⁶ Amu na Unwoti údie kenye ɔnini, “Si lɛ́kɛ nkyuli liti na Sodom ɔma unengudi ɔmmɔ kemmo ni, ndubɔnu ɔma ɔmmɔ kɔnyana na lɛɛɛdubo-nwu bɔyila ku udu.”

²⁷ Ka ɔ́su lɛni ni, Abraham ɔ́sɔ údie kenye ɔnini, “Unwoti, ngyi ka líse kayi geen ina ka lɛti ku ntɔ kani na ndi asa muuye-ɔ ala amɛni.

²⁸ Si banii nkyuli ɛlɔ bálɛ nkyuli liti bamɛni kemmo na kébu babuni aavlene-ɛlɔ nɔɔ, adubo ɔma unengudi ɔmmɔ bɔkyula ka nkyuli ɛlɔ bálɛ-ma akɔ ɔsu?” Unwoti ɔ́sɔ ɔ́su ɔnini, “Si lɛ́kɛ nkyuli aavlene-ɛlɔ ni, lɛɛɛdubo ɔma ɔmmɔ bɔkyula.”

²⁹ Ɔmɛni kama ni, ɔ́sɔ údie kenye ɔnini, “Si nkyuli aavlene na bákɛ nɔɔ?” Unwoti ɔ́sɔ ɔ́su ɔnini, “Si nkyuli aavlene na badi lɛnɔ ni, lɛɛɛdubo ɔma ɔmmɔ bɔkyula.”

³⁰ Ka Abraham únu lɛni ni, ɔ́su ɔnini, “Unwoti muuvele-ɔ nnii teti kɔnyi takya-mi, mmomu ya na lɛsu lɛla lɛdi. Si nkyuli avlaatɛ na bákɛ nɔɔ?” Unwoti údie kenye ɔnini, “Lɛɛɛdubo lɛla lɛdi bɔbla si lɛ́kɛ nkyuli avlaatɛ.”

³¹ Mmɔ ni, Abraham ɔ́sɔ ɔ́su ɔnini, “Ngyi ka líise kayi na ndaku-ɔ ala amɛni udu buvele. Na si banii nkyuli aavlanyɔ kani nkya mmɔ nɔɔ?” Unwoti ɔnini, “Na nkyuli aavlanyɔ ɔsu ni, lɛɛɛdubo ɔma ɔmmɔ bɔkyula.”

³² Abraham ɔ́sɔ úvele ɔmmɔ kama ɔnini, “Unwoti, muuvele-ɔ nnii teti kɔnyi takya-mi, ya na lɛsɔ livele lɛla linwi. Si banii nkyuli leevu kani nkya mmɔ nɔɔ?” Unwoti ɔnini, “Na nkyuli leevu ɔsu ni, lɛɛɛdubo mmɔ bɔkyula.”

³³ Uwi ɔni na Unwoti ɔ́su Abraham ɔmɛni ɔ́wɔlɔ ni, ɔ́tɔlɔ. Na Abraham únwini úsie kaduli.