Ala Kalɔ Buse 16 - Katɔti Ɔku Kedee

Hagar Ku Ismael

¹ Na uwi ɔmmɔ kemmo ni, Abram ulekudi Sarai útawɔ ubi ɔdi útete-nwu tɔ. Nsu Egyipteni ulekubi ɔdi ɔ́kya-nwu kudɔ útaabla-nwu kabla ɔni baalɔ Hagar.

² Ɔmmɔ ɔsu Sarai ɔ́su Abram ɔnini, “Unwoti ɔ́ya na naaawɔ. Anwuɔsu sie mina ulekubi kabla ɔblane kudɔ na bɛtɛ. Ɔƒɛni kalɛ ndubudie kaba bɔsiku nwuna bebi bani na ɔdubɔwɔ kemmo.” Abram lɛnɔ únu lɛla lɛni na Sarai ɔ́su-nwu kalɔ.

³ Anwuɔsu ɔni na Abram úulie Kanaan kalɔ lɛlɔ aani akwa leevu kama ni, ulekudi Sarai úti Hagar nwuna Egyipteni ulekubi kabla ɔblane úte ɔgyani ɔnii uti-nwu aani ulekudi kalɛ.

⁴ Na ka anwu ku Hagar bátɛ ni, ɔ́da kaƒɔ. Uwi ɔni na Hagar ɔ́nu ɔ́ti ka ɔ́ɔda kaƒɔ ni, ɔsɔ ulakpete nwuna kɔduni.

⁵ Mmɔ ni, Sarai ɔ́su Abram ɔnini, “Ukyuli tabu ala ani na Hagar ɔɔbla-mi ni, awɔ na lɛ́si. Ami néti mina kaduli kabla ɔblane ulekubi líte-ɔ. Na ka ɔ́nu ɔ́ti ka ɔ́ɔda kaƒɔ ɔsu ni, ɔsɔ ulábu-mi. Unwoti kani ndubuye litemi lɛmɛni na ami ku awɔ ntɛ.”

⁶ Amu na Abram ɔ́su Sarai ɔnini, “Ƒula ubi ulekubi na ɔdi ɔsu lɛla lɛni na ánu ka lɛ́manku ni, na ablaku-nwu.” Anwuɔsu Sarai úse kalɔ ɔɔbla-nwu ulikplu ala. Na ɔmmɔ ɔsu ulekubi ɔmmɔ úkeli-nwu kudɔ.

⁷ Ka úkeli ni, Katɔti ɔtu ɔdi ɔ́nu Hagar na libiɔ lɛdi kɔtu na ketele kemmo kesii kadi. Na libiɔ lɛmmɔ ndi libiɔ lɛni nkya ulu kudɔ si éti ésela ɔma ɔni baalɔ Sur kemmo.

⁸ Mmɔ na ɔ́kpali-nwu ɔ́su-nwu ɔnini, “Hagar, Sarai ubi ulekubi, wɛ na ási na wɛ na ésela?” Amu na Hagar údie kenye ɔnini, “Bukeli na nda mina kɔduni Sarai kudɔ.”

⁹ Amu na Katɔti ɔtu ɔmmɔ ɔ́su-nwu ɔnini, “Sɔ nwini teesie ƒula kɔduni kudɔ na eboku lɛlɔ kalɔ ete-nwu.”

¹⁰ Amu na ɔtu ɔmmɔ ɔ́sɔ ɔ́su-nwu ɔnini, “Ndubɔya na ƒula bawɔ bemomo ɔni na balakana-ma bɔka.”

¹¹ Na ɔ́sɔ ɔ́su-nwu lɛnɔ ɔnini, “Ada kaƒɔ ɔƒaani, na adubo ɔnanabi bɔwɔ. Na adubo-nwu lɛnyi bɔsia anii Ismael. Ɔsika Unwoti únu ƒula kɔnyana kɔni na eewulo.

¹² Ɔdubo bɔbla ukyuli gyegyengye ɔni ndubɔkɛ utaavi aani alakpi akɔ ebuo ala utine kalɛ. Bekyuli ala aláyɔ-nwu kaƒɔ na nwuna ala lɛnɔ aláyɔ bekyuli kaƒɔ. Na anwu ku nwuna banwani beléduku na baaadubo bɔsala bulie liku linwi.”

¹³ Amu na ɔ́sia Unwoti ɔni nátɛmiku-nwu lɛnyi ɔnini, “Awɔ ndi Katɔti ɔni mɔɔnu-mi. Ɔsika ɔƒɛni ni, lɛ́nu awɔ ɔni mɔɔnu-mi.”

¹⁴ Ɔmmɔ ɔsu na básia libiɔ lɛmmɔ lɛnyi banii Beer-Lahar-Roi. Na libiɔ lɛmmɔ lɛmu lɛkya Kades ku Bared lɛma ntɛ.

¹⁵ Ɔmmɔ ɔsu ni, Hagar úbawɔ ɔnanabi úte Abram, na Abram ɔ́sia ubi ɔmmɔ lɛnyi ɔnii Ismael.

¹⁶ Ɔƒɛni na uwi ɔmmɔ kemmo ni, Abram ɔ́ɔƒɔ akwa liti ku avlaatɛ-ɛku.