Ala Kalɔ Buse 15 - Katɔti Ɔku Kedee

Unwoti Únyimiku Abram Lɛla Lɛdi

¹ Ɔmmɔ kama ni, Abram ɔ́nu kɔyu kemmo lɛla lɛdi na Katɔti ɔ́su-nwu ɔnini, “Abram, sɔ tayia! Ami ndi ƒula katamikukɔ ku kesii kani na adubɔkɛ ƒula lɛyuƒɔla linengudi.”

² Nsu Abram údie kenye ɔnini, “O Unwoti Ɔyikune Ƒui, bi na adubɔkana-mi bute ka liiibo ubi ɔni madi-mi ala muedi? Na Eleasa ɔni nási Damasko kani nkya-mi kudɔ.”

³ Na Abram ɔ́sɔ ɔ́su ɔnini, “Ka étete-mi ubi ɔsu ni, kabla ɔblane ɔni nkya-mi kaduli ɔɔbla-mi kabla ni, anwu ndubo-mi ala bɔdi.”

⁴ Amu na Katɔti ɔ́ya na Abram ɔ́ti ɔnini, “Ukyuli ɔmmɔ udu uladi-ɔ ala. Mmomu awɔ ɔlati kaƒɔ ubi ndubɔdi-ɔ ala.”

⁵ Mmɔ na ɔ́kpanku-nwu úsienku keyi na ɔ́su-nwu ɔnini, “Kɔliku anumi katɔ na anu kayaa na aka ayabi ani na aanu si adubɔkana-nya bɔka.” Amu na Katɔti ɔ́sɔ ɔ́su-nwu ɔnini, “Ƒula bawɔ lɛnɔ badubo bumomo lɛni kani.”

⁶ Abram ɔ́ƒɔ Unwoti Katɔti ɔ́di, ɔmmɔ ɔsu na Katɔti ɔ́bu-nwu aani ukyuli ɔni nse siin.

⁷ Na Unwoti ɔ́sɔ ɔ́su-nwu ɔnini, “Ami ndi Unwoti Katɔti ɔni nákpanku-ɔ ɔ́siku Ur ɔma kemmo na Kaldea kalɔ lɛlɔ, kalɛ na liti kalɔ kamɛni lite-ɔ na kenwini awɔ kadi.”

⁸ Mmɔ na Abram ɔ́su ɔnini, “Unwoti Ɔyikune Ƒui, dɛ na mabla na mati ka kalɔ kamɛni ƒui kadubunwini ami kadi?”

⁹ Amu na Unwoti ɔ́su-nwu ɔnini, “Téti ɔmantɛ akɔ uledi ku ese ku koƒonu kɔgyani bani náaƒɔ akwa atɛ atɛ boku-mi. Na eboku abloduma ku lɛmangbɛ.”

¹⁰ Mmɔ ni, Abram útéti ala amɛni úboku. Ka ɔ́du-ma ni, úle ɔdi biala kemmo inyɔ na use kɔkɛ kɔmmɔ ɔ́sala. Na baasɛ bammɔ ama ni, útele-ma kemmo lɛni.

¹¹ Na ka baasɛ bamba béveyi bébo bábadi lɛna lɛmmɔ ni, Abram ɔ́gya-ma.

¹² Ka ɔƒɛ úsela bɔnu ni, Abram úduo lɛlɛɛ kemmo úsie ɔgyu. Na kadi kábla suu na liƒu lɛ́da-nwu geen.

¹³ Amu na Unwoti ɔ́ya na Abram ɔ́ti ɔnini, “Ɔbla-a nwaa ka ƒula bawɔ ni, badubo baƒɔ bunwini na kadi bamba kalɔ lɛlɔ. Na badubo bunwini bekyuli bammɔ kabla bablane. Na badubo-ma kalala bɔbla na bebo abi akwa eti maane (400) sɔɔn.

¹⁴ Nsu kalɔ kani bekyuli ndubuti ƒula bebi benwini bana kabla bablane ni, ndubo-ma kɔtu bɔni geen. Na ɔmmɔ kama ni, badubɔlɛ-ma enu kemmo na betiku akɛla pii batɔlɔku.

¹⁵ Nsu awɔ ɔlati adubulie aƒɔ akwa pii asa na enwini kama esie ƒula bati kudɔ.

¹⁶ Uwi ɔni na ƒula bawɔ mmɔ bulie búdu akwa ammɔ ni, badubɔsɔ benwini bebo mɛni. Ɔsika Amoriƒuɔ ekpidi ani baabla ni, étedu tɔ kesii kani na lɛni-ma kɔtu kɔni meduku-ma.”

¹⁷ Ɔmmɔ kama ka ɔƒɛ ɔ́nu na kadi kábla suu ni, libui bonwu lɛdi ku uyɔ lɛni kemmo na ɔgya ɔɔda lɛdi lɛ́da lɛ́lɛ. Libui lɛmɛni lɛkɛ lɛ́vi lɛna lɛmmɔ ƒui ntɛ.

¹⁸ Limeyi lɛmmɔ ni, Unwoti únyimi lɛla lɛdi ku Abram. Na ɔ́su-nwu ɔnini, “Líti kalɔ kamɛni ƒui muute ƒula bawɔ. Na ɔ́si ketu blii kani nkya Egyipte ɔmii útédu Euƒrate Ketu bonwu líti muute-ma.

¹⁹ Na Keniƒuɔ ku Kenisiƒuɔ kalɔ ku Kadmoniƒuɔ

²⁰ ku Hetiƒuɔ ku Perisiƒuɔ ku Reƒaiƒuɔ

²¹ ku Amoriƒuɔ ku Kanaanƒuɔ ku Girgasiƒuɔ ku Yebusiƒuɔ kɔlɔ ƒui na líti muute-ma.”