Galatiƒuɔ 1 - Katɔti Ɔku Kedee

¹ Ami Paulo ɔni ndi Kristo ɔtalane ni, mina bɔlɔ bútasi bekyuli kudɔ iye ɔɔɔdi ukyuli ɔdi náƒuna-mi. Mmomu mina bɔlɔ bɔ́si Yesu Kristo ku Katɔti ɔni nágyila Yesu ɔmmɔ ɔ́lɛku bekpine akɔ kudɔ.

² Ami ɔmmɔ nénweni ɔku ɔmɛni na ami ku mina banwa bani nkya mɛni buugyele amii Katɔti baƒɔtaadine bani ƒui nkya Galatia.

³ Na buuvele bɔnii Katɔti ku Blɔti Yesu Kristo lɛƒɔndia ku keyi buɛɛ kasiaku-mii.

⁴ Kristo ɔmmɔ néti lɛlɔ ɔ́kpa na bula lili kalɛ na udie-bu ɔlɛku bula ekpidi kemmo na ɔƒɔ-bu ɔlɛku uwi ukpidi ɔni kemmo na ekpidi bɔbla bɔ́ƒɔ kayawi kemmo mɛni. Na ɔ́ƒɔ-bu lɛni ɔkɛnku Katɔti ɔni ndi bula Ɔti lɛƒɔyɔ lɛlɔ.

⁵ Anwuɔsu bɛya na bumwi Katɔti ɔ́si ɔƒɛni úsela uwi ƒui! Ɔsia lɛni.

Katɔti Litemi Buni Linwi Pɛ Kani Nkya

⁶ Bina lɛlɔ lɛ́bla-mi kalɛ kadi geen, ɔsika ńtaƒɔ ńtadi nnii bɛdubɔlɛ Katɔti ɔni nálɔ-mii ɔkɛnku Kristo Yesu kaƒɔ buni kani na ɔ́bla-mii kama na bɛsiaku litemi bamba kama.

⁷ Sɔsɔ na ɔdi ka litemi buni bamba lɛdi liiibo. Nsu mɔɔsu ɔmɛni ɔsika bekyuli badi bakya beeƒú-mii kasusu, na baayɔ́ ka bavumana Kristo litemi buni lɛmmɔ.

⁸ Na mɔɔsu-mii nnii si abu iye kayaa na ɔtu ɔdi ɔ́si úbo úbasu-mii litemi lɛbambadi lɛdi na lɛɛɛdi litemi buni lɛni na bɔ́su-mii mmɔ ni, Katɔti ɔyila-nwu udu ƒui.

⁹ Bɔ́ɔsu-mii búbavi na lɛni kani na nsɔ mɔɔsu-mii ɔƒɛni lɛnɔ ka ni, si ukyuli ɔdi ɔɔsu-mii litemi lɛdi na lɛɛɛdi litemi buni lɛni bínu na bɛ́ƒɔ-ni bɛ́di mmɔ ni, Katɔti ɔyila ukyuli ɔmmɔ udu ƒui kede kede.

¹⁰ Na kabla kani na mɔɔbla mɛni ni, bɛɛkali bɛnii bekyuli bumwi na mɔɔwia? Munuu Katɔti bumwi na mɔɔwia? Munuu mɔɔbla-ka kalɛ na kaƒɔ kayɔ bekyuli? Na si bekyuli lɛyɔla kabla na mɔɔbla ni, nka lɛɛɛdi Kristo kabla ɔblane.

Katɔti Ɔ́ƒuna Paulo Úte Nwuna Kabla

¹¹ Banwa, mɔɔyɔ́ ka lɛsu-mii ka ni, litemi lɛni mɔɔsu mɛni ni, lítasi ukyuli ɔdi kudɔ.

¹² Na ɔɔɔdi ukyuli ɔdi kudɔ lɛnɔ na lɛ́ƒɔ-ni lɛ́siku iye ɔdi nátina-mi lɛla lɛmmɔ lɛnɔ. Mmomu Yesu Kristo ɔlati nédie nwuna ablala etemila ammɔ ɔ́tina-mi.

¹³ Ɔsika bínu ngba bɔni na lílie lɛ́vi uwi ɔni nsiaku Yudaƒuɔ bɔkpa ulu kama kpakplaa ku kalɛ na líti lɛnungyie kemmo líkpoku Katɔti baƒɔtaadine akpa ammɔ, na lɛ́yɔ ka lɛyila-nya udu muedi.

¹⁴ Na anumi égyie-mi étulo mina ligyekpa na ntɔ-ma na Yudaƒuɔ bɔkpa ulu ɔmmɔ kemmo. Na mina bati kuuku ɔdi kama kani na mina kasusu kasia kpakplaa ka lɛbla.

^15-16 Nsu na Katɔti kɔnyana bɔnu ɔsu ni, ɔ́ƒuna-mi úte nwuna kabla asa na badubɔwɔ-mi. Ka uwi údu-nwu ni, údie Ubidi ɔmmɔ ɔ́tina-mi kalɛ na lɛkana na lɛkɔ-nwu lɛlɔ lɛsa na amii bani naaadi Yudaƒuɔ akɔ. Na ńtatádiku ɔdi kasusu na ɔmɛni lɛlɔ,

¹⁷ iye lisie Yerusalem ntánu bani ndi batalane asa Katɔti úbaƒuna-mi. Mmomu lɛ́tɔlɔ lísie Arabia kɔnakunwi. Kama asa na línwini líbo Damasko.

¹⁸ Na akwa atɛ kama asa na lísie Yerusalem ńtánu Petro, na lílie-nwu kudɔ emeyi leevu-alɔ.

¹⁹ Ɔmmɔ kama lɛ́sɔ ńtanu ɔtalane ɔdi lɛnɔ, amu ntu Yakobo ɔni ndi Blɔti ɔnwani kani.

²⁰ Na sɔsɔ ni, litemi geen na muunweni-mii mɛni, na Katɔti ɔlati ɔgyi ka naaanyi ɔkɔ.

²¹ Ɔmmɔ kama lɛnɔ ni, lísie Siria ku Kilikia.

²² Uwi ɔmmɔ kemmo ni, baƒɔtaadine akpa ani nkya Yudea kalɔ lɛlɔ na Kristo kemmo bátanu-mi anumi kudii tɔ.

²³ Na lɛla lɛni kani na bénu na mina lɛlɔ ndi ka, “Ukyuli ɔni na nka ɔ́kya úteekpoku-bu mmɔ ni, ɔƒɛni amu ɔkya ɔɔkɔ́ bɔƒɔtaadi bɔni na ɔ́yɔ ka nka ubile mmɔ lɛsa.”

²⁴ Anwuɔsu beemwi Katɔti ɔkɛnku ami ɔsu.