Israelƒuɔ Bɔlɛ 37 - Katɔti Ɔku Kedee

Katɔti Bunyimi Adaka

¹ Amu na Besaleel úti akasia kugyikɛ na ɔ́nwi Bunyimi Adaka ɔmmɔ. Na adaka ɔmmɔ bune bɔdi lɛgba ɛtɛ ku kakɛ. Na nwuna bɔkuku bɔdi lɛgba inyɔ ku kakɛ.

² Na úti sika ugyiedi ɔ́nwamina úwi-nwu kemmo ku kama, na úti anwu kani ɔ́da-nwu atu ɔ́mana.

³ Na úti sika ugyiedi ɔ́bla kɔkwɛnimi ɔ́da adaka ɔmmɔ lɛgba ine bɔmmɔ lɛlɔ na ɔƒɛnyi ɔni ku ɔni.

⁴ Amu na ɔ́nwi akasia ligyii na ɔ́kwa-ni ku sika ugyiedi.

⁵ Na úti ɔ́kya kɔkwɛnimi kɔmmɔ kemmo.

⁶ Na úti sika ugyiedi sɔɔn ɔ́bla likpidi kɔtu bɔni budie libila úte Adaka ɔmmɔ. Na libila lɛmmɔ bune bɔdi lɛgba ɛtɛ ku kakɛ na nwuna bɔbɛbɛ bɔdi lɛgba inyɔ ku kakɛ.

⁷ Na úti sika ugyiedi ɔ́bla Kerub bebweyi bani muuveyi inyɔ.

⁸ Na úti-ma ɔ́lɛ libila lɛmmɔ lɛƒɛnyi inyɔ. Na Kerub bebweyi bammɔ badanku libila lɛmmɔ lɛlɔ.

⁹ Na bebweyi bammɔ baanu lɛlɔ na bana avwi étile adaka mmɔ.

Bávɔ Lɛla Lɛni Lɛlɔ Badubo Bodobodo Butaasia

¹⁰ Amu na úti akasia kugyikɛ na ɔ́nwi ala kasiakɔ na nwuna bune bɔdi lɛgba ɛtɛ na nwuna bɔbɛbɛ bɔdi ɔgba unwi ku kakɛ na nwuna bɔkuku bɔdi lɛgba inyɔ ku kakɛ.

¹¹ Na úti sika ugyiedi ɔ́kwa-nwu lɛlɔ na úti ɔdi lɛnɔ ɔ́bala-nwu atu ɔ́mana.

¹² Na ɔ́bla eƒi ɔ́kya-nwu ɔ́mana na úti sika ugyiedi ɔ́kya eƒi ammɔ ɔ́mana.

¹³ Ɔ́bla sika ugyiedi kɔkwɛnimii kɔdi ɔ́kya-nwu lɛkɔkɔ ine bɔmmɔ na kesii kani na lɛgba lɛmmɔ lɛda na atu kakɛ.

¹⁴ Na kɔkwɛnimi kɔmmɔ kemmo na beeti ligyii taakya kalɛ na ɔdia na bagyu-nwu.

¹⁵ Na akasia ligyii na úti ɔ́nwi ligyii lɛni na baagyú-nwu mmɔ na úti sika ugyiedi ɔ́kwa-ni lɛlɔ.

¹⁶ Na úti sika ugyiedi na ɔ́kwa akyami ku ebui ku ana udu ku lɛɛƒɛɛ kalɛ beti bataabla ntɛ akpala.

Bábla Asogya Kasiakɔ Ligyii

¹⁷ Amu na úti sika ugyiedi ugyii na útu-nwu ɔ́bla asogya kasiakɔ ugyii na ubo ɔka ku ugyii ɔni muunye-nwu lɛlɔ. Na úti kugyii anwula aani ɔɔƒɛɛ udu ku nwuna evete ƒui ɔ́bla unwi ɔ́danku lɛlɔ ɔ́mana-nwu lɛlɔ na ɔɔdia bɔnu.

¹⁸ Na ɔ́bla kɔgba ɛku ɔ́da ugyii ɔmmɔ lɛlɔ, ɛtɛ bɔda ɔƒɛnyi unwi na ɛtɛ na ɔƒɛnyi ɔkladi lɛnɔ lɛlɔ.

¹⁹ Na ɔ́bla kugyii anwula ani nébimi aani lɛɛƒɛɛ udu ɛtɛ ku ani nése kalɔ eebimi ɔ́mana kɔgba ɛku kɔmmɔ ɔdi biala lɛlɔ.

²⁰ Na ɔ́bla ine bamba lɛnɔ ɔ́mana ugyii ɔmmɔ ɔlati lɛlɔ ekpo ene.

²¹ Na kesii biala kani na kɔgba kɔmmɔ kɔdanku ugyii ɔmmɔ lɛlɔ ni, lɛɛƒɛɛ udu anwula ammɔ alɛ.

²² Na asogya kasiakɔ kammɔ ku nwuna kɔgba ku anwula ammɔ ƒui ni, bábla-nwu na ɔdi lɛlakpa linwi ɔdanku lɛlɔ ku sika ugyiedi sɔɔn.

²³ Na ɔ́bla lɛsogya maatɛ lɛmmɔ adikpi linyenela ku ntɔ kewikɔ ku nina lɛlɔ kabla ablala ƒui ku sika ugyiedi.

²⁴ Na sika ugyiedi edula ebi akyami maane ku kakɛ unu na béti bábla ala ammɔ.

Bábla Oloƒui Kakyulakɔ Lɛbi

²⁵ Amu na úti akasia kugyikɛ na ɔ́nwi oloƒui bɔkyula lɛbi. Na nwuna bune bɔdi ɔgba unwi ku kakɛ na nwuna bɔbɛbɛ bɔdi ɔgba unwi ku kakɛ na nwuna bɔkuku bɔdi lɛgba ɛtɛ. Na lɛbi lɛmmɔ ku ese ani nlɛ-nwu atu ene ammɔ ƒui adanku lɛlɔ ɔ́bla unwi.

²⁶ Na úti sika ugyiedi ɔ́kwa-nwu katɔ ku amadɔ ku ese ammɔ lɛlɔ ƒui ɔ́mana.

²⁷ Na úti sika ugyiedi na ɔ́bla kɔkwɛnimi inyɔ ɔ́da lɛkpabi lɛmmɔ atu kada kakɛ blii na lɛƒɛnyi inyɔ lɛlɔ kalɛ ɔkana ligyii lɛmmɔ bɔda na ɔdia buti.

²⁸ Na úti sika ugyiedi na ɔ́kwa akasia ligyii lɛni badubo kɔkwɛnimi kɔmmɔ kemmo bɔkya.

²⁹ Na ɔ́sɔ ɔbla ala kewikɔ kesii kani beewi nnɔmii kedee ku oloƒui ɔni muunwenyi ƒɛƒɛɛ na béti ala ƒɛƒɛɛ básala-nwu.