Israelƒuɔ Bɔlɛ 36 - Katɔti Ɔku Kedee

¹ “Anwuɔsu Besaleel ku Oholiab ku bani ƒui na Unwoti úte-ma kɔnu kemmo kabla lɛnunda ka bakana Katɔti Kevo kammɔ bɔtu ni, ɔlɛka babla kabla kammɔ aani kalɛ kani na Unwoti úbo-ma ɔda.”

² Amu na Mose ɔ́lɔ Besaleel ku Oholiab ku ukyuli biala na Unwoti úte-nwu lɛlati lɛmmɔ ku bani na ɔ́si-ma kayi ka bebebunku kabla kammɔ ka bebo.

³ Na Mose úti ala ani ƒui na Israelƒuɔ béte ka béti bátu Kevo Kasakɔ kammɔ úte-ma. Na Israelƒuɔ beesiénku etela ani beti batu ɔtɔ ɔmmɔ ɔtanta ndi ɔtanta ku kayi ƒaa.

⁴ Mmɔ na bekyuli bani ƒui nkya mɔɔtú Kevo kammɔ báda bana abuala béwi.

⁵ Na bésie bátásu Mose banini, “Bekyuli bammɔ béte ala bétulo kalɛ na Unwoti úbo-ma ɔda ka beti batu Kevo kammɔ.”

⁶ Amu na Mose ɔ́tala bekyuli ɔ́kya Israelƒuɔ bammɔ ƒui ka básu-ma banii, “Ɔnana iye uleku ɔdi ɔsɔ uteti etela adi utesienku ka beti batu Kevo kammɔ.” Anwuɔsu báya na bekyuli bammɔ báda ala buti teesienku mmɔ báya.

⁷ Ɔsika ala ani beti batu Kevo kammɔ éemomo étulo kalɛ na baawia.

Kevo Kasakɔ Bɔtu Kalɔ Kesekɔ

⁸ Na bekyuli bani ngyi kabla kammɔ nátu Kevo kammɔ. Na béti unwo buluu ku ugyiedi ɔni náƒɔ kuye bédi adi kpɛtɛ kpɛtɛ ani baaƒala kayakun aduni leevu, na bédi Kerub bebweyi básia aduni ammɔ lɛlɔ.

⁹ Na aduni ammɔ ƒui bɔkɔku bɔdi unwi, bune bɔdi lɛgba aavlene-inyɔ na bɔbɛbɛ bɔdi lɛgba ɛku.

¹⁰ Na báka aduni alɔ básala ɔvi unwi, na báka alɔ lɛnɔ básala ɔvi ɔkladi.

¹¹ Na béti aduni buluu buni gyɛlɛɛ baka-nwu kunu kunu na eƒi atɛ-nwu kemmo, na baka bada aduni enengudi ammɔ atu ɔvi unwi. Na bábla lɛni kani ku lɛduni linengudi linyɔdi lɛnɔ atu na ɔvi unyɔdi.

¹² Na básɔ bédi ɔbambadi liti bamana ɔvi unwi na bédi ɔbambadi lɛni kani bámana ɔvi ɔkladi na lɛɛtina lɛlɔ.

¹³ Na banwamana sika ugyiedi bábla ala abalala liti kalɛ na uƒie aduni akpa anyɔ ammɔ ɔsala kalɛ na kevo kammɔ kasala kabla lɛla linwi.

¹⁴ Na béti bese linwini bédi aduni leevu-unwi bébi kevo kammɔ eli.

¹⁵ Na aduni leevu-unwi ammɔ bɔkɔku bɔdi unwi lɛgba aavlene-ɛlɔ bune na bɔbɛbɛ bɔdi lɛgba ɛku.

¹⁶ Na báka aduni alɔ básala ɔvi unwi na báka ɛku lɛnɔ básala ɔvi unyɔdi.

¹⁷ Amu na báka eƒi kunu kunu liti báda kayakun aduni ammɔ kɔtu ɔvi unwi na bábla lɛni kani ku ɔvi unyɔdi.

¹⁸ Na béti abuala egyiedi bánwamana bábla ala abalala liti báda libila lɛdiku lɛmmɔ básala.

¹⁹ Na béti koƒonu ɔku ɔni békpeyi na bákya-nwu kuvogyie báka básala béti bébi Kevo kammɔ katɔ na béti ɛpu kemmo ebuo ɔku lɛnɔ báka básala bébi udeedi ɔmmɔ lɛlɔ.

²⁰ Na béti akasia kugyikɛ bása bágyi ɔban bálɛ eku eku.

²¹ Na liku biala bɔkuku bɔdi lɛgba leevu-ɛlɔ. Na nwuna bɔbɛbɛ bɔdi lɛgba inyɔ ku kakɛ.

²² Na liku biala kalɔ lɛgba inyɔ bɔlɛ. Lɛni na eku ammɔ kalɔ ƒui ese ɔ́mana kevo kaduli kammɔ.

²³ Bábla ɔban ɔmmɔ eku aavlanyɔ bálɛ kevo kaduli kada kakɛ.

²⁴ Na bánwi sika ɔƒualadi agbanvuo aavlene bákya lɛgba lɛmmɔ kalɔ. Na liku linwi lɛda agbanvuo inyɔ, na ɔgba biala úduo ɔgbanvuo unwi kemmo.

²⁵ Bása eku ammɔ aavlanyɔ bákya kaduli kammɔ katɔ kakɛ.

²⁶ Na bánwi sika ɔƒualadi agbanvuo aavlene, na béti inyɔ bákya liku biala kalɔ.

²⁷ Na bása eku aku bálɛ kaduli kammɔ ɔƒɛ kanukɔ kakɛ.

²⁸ Na bása eku anyɔ bákya kaduli kammɔ lɛkɔkɔ.

²⁹ Na lɛkɔkɔ ligyii lɛmmɔ básala-ni ɔ́si kalɔ betédu katɔ, na nina inyɔ líduo ɔgbanvuo unwi kemmo.

³⁰ Anwuɔsu eku ammɔ ebo maane ku sika ɔƒualadi agbanvuo leevu-ɛku, na inyɔ bɔkya liku biala kalɔ.

³¹ Na lɛnɔ ni, béti akasia ligyii bábla lɛtagyii ɛlɔ básia kevo kammɔ ɔƒɛnyi unwi.

³² Na básia lɛtagyii ɛlɔ bamba na ɔƒɛnyi unyɔdi lɛnɔ, na básia ɛlɔ na ɔƒɛ kanukɔ na kevo kammɔ kawɔlɔkɔ ƒui.

³³ Na ɔtagyii ɔni na ntɛntɛ úne ɔ́si ligyii lɛni nnye ntɛ mmɔ ɔvi unwi úsie ɔkladi.

³⁴ Na béti sika ugyiedi bákwa ligyii lɛni nnye mmɔ lɛlɔ ƒui. Na béti sika ugyiedi kɔkwɛnimi báda lɛtagyii lɛmmɔ na bákwa ani lɛnɔ ku sika ugyiedi.

³⁵ Na béti unwo buluu ku ugyiedi ɔni náƒɔ kuye ku adi kpɛtɛ kpɛtɛ na bédi kakpakɔ bule kɔdi kɔmmɔ, na bédi Kerub bebweyi básia-nwu lɛlɔ.

³⁶ Na béti akasia ligyii bábla akpa ene na bakwa-ni lɛlɔ ku sika ugyiedi. Na bábla sika ugyiedi kɔkwɛnimi kɔbaladi ku nina sika ɔƒualadi agbanvuo.

³⁷ Na kevo kammɔ kayakun ni, béti unwo buluu ku ugyiedi ɔni náƒɔ kuye ku adi kpɛtɛ kpɛtɛ na bédi lɛduni. Na bedine babuni nábla kɔlɛmii básia-nwu lɛlɔ.

³⁸ Bánwi ligyii ɛlɔ ku nina kɔkwɛnimi kɔbaladi, na bákwa-ni ku sika ugyiedi. Na béti abuala egyiedi bábla ligyii lɛmmɔ agbanvuo.