Israelƒuɔ Bɔlɛ 35 - Katɔti Ɔku Kedee

Mose Úbo Israelƒuɔ Ɔda Na Lɛnwuna Limeyi Lɛlɔ

¹ Amu na Mose ɔ́lɔ Israelƒuɔ ƒui ɔ́sala na ɔ́su-ma ɔnini, “Ɔmɛni na Unwoti ɔɔsu-mii ka bɛbla.

² Ɔnii bibo emeyi aku ka biti bɛbla bina kabla. Nsu limeyi maatɛdi lɛlɔ ni, bɛbla-ni kedee bite Unwoti na ɔdi utabla kabla kadi. Na si ukyuli ɔdi ɔ́bla kabla kadi lɛnwunameyi lɛlɔ ni, ɔlɛka badu-nwu.

³ Na ɔdi utasala ogya muedi lɛnwunameyi lɛlɔ.”

Akpala Buti Busienku Unwoti

⁴ Amu na Unwoti ɔ́su Mose ɔnini,

⁵ “Kɔ lɛsa te Israelƒuɔ na asu-ma na beti akpala beboku-mi. Na aƒɔ akpala ammɔ ɔdi biala kudɔ eboku-mi kalɛ na ɔ́si-nwu kayi kemmo kalɛ. Na akpala ani na adubo bɔƒɔ mmɔ ndi sika ugyiedi ku ɔƒualadi ku abuala egyiedi,

⁶ ku unwo buluu ku ugyiedi ɔni náƒɔ kuye adi kpɛtɛ kpɛtɛ ku bese linwini,

⁷ ku baƒonu lɛku lɛni na békpeyi na bákya-ni kuvo na lígyie kaduɛ, ku ketu kemmo bebuo lɛku ku akasia ligyii kpakplaa,

⁸ ku asogya nnɔmii, ku ugyulo ƒɛƒɛɛ ɔni na baakya likpose nnɔmii kemmo ku oloƒui ƒɛƒɛɛ,

⁹ ku sika atabi udu ɔdi na baalɔ onis ku ana lidu bamba ani na baaka taamana ɔkpane unengudi awu kedee ku lɛdiku lɛni muubi-nwu kayi.”

Kɔlɛmii Kɔni Badubuti Batu Katɔti Kevo Kasakɔ

¹⁰ Amu na Mose ɔ́su bekyuli bani ƒui nda kɔnu kemmo kabla ka bebo na babla kabla kani Katɔti úbo-ma ɔda.

¹¹ Na batu Kevo Kasakɔ ku kɔdi ku abalala na bawia kugyikɛ ku abuala ku ligyii akpa nina aka.

¹² Na bawia ala na batu Bunyimi Adaka ku nwuna ligyii ku likpidi kɔtu bɔni budie libila ku kakpakɔ bule kɔdi kɔni beeti taaƒla-nwu anumi.

¹³ Na babla ala kasiakɔ ku nwuna ligyii lɛni baagyú-nwu ku ala ani na baasia-nwu lɛlɔ ku Katɔti bodobodo kedee ɔni muusé-nwu anumi.

¹⁴ Na babla asogya kalɛkɔ ku nwuna lɛlɔ ala ku nnɔmii bɔni na badubo buteewi asogya ɔmmɔ kemmo teese.

¹⁵ Na batu oloƒui bɔkyula lɛbi ku nwuna ligyii ku likpose nnɔmii oloƒui ku kevo kayakun lɛduni.

¹⁶ Na beti kugyikɛ na babla bɔkyula lɛkpabi ku ntɔ bɔƒɔ lɛbuala ku nwuna bɔgyu ligyii ku nwuna lɛlɔ ala. Na beti abuala egyiedi babla lɛkyami lɛni kemmo badubo asogya butaaƒɔ ku nina ɔka.

¹⁷ Na babla aduni bete kevo kaduli kammɔ ku kana akpa ku ana ɔka, ku aduni ani na baaƒala kayakun.

¹⁸ Na bawia ewele ku kɔbuli kɔni ndubɔda kevo ku kaduli kammɔ akpa.

¹⁹ Na bawia adi na bédi Aaron lɛwu sɛsɛɛ ku nwuna bebi lɛwu lɛni na badubo butaakya taabla bakpane kabla.

Israelƒuɔ Béti Bana Akpala Béte

²⁰ Amu na bekyuli bammɔ bátɔlɔ Mose kudɔ.

²¹ Na ukyuli biala kubiti kɔ́da-nwu. Na bani nátuna ku kaƒɔ ƒaa béti etela bésienku Unwoti ka beti batu Kevo Kasakɔ kammɔ ku akpala lɛlɔ ala ku bakpane lɛwu kedee lɛmmɔ ƒui.

²² Na banana ku beleku bani mɔɔyɔ́ ni, bédie bana kaƒɔ ƒaa na beti bana sika ugyiedi ala ani baakya ɔkwɛ ku atu ku animi ku ana udu besienku Mose. Na bákɔliku-nya katɔ bátina Katɔti bébo-nya kudu.

²³ Na bani ƒui na bébo linwo buluu ku ligyiedi lɛni náƒɔ kuye ku adi kpɛtɛ kpɛtɛ iye bese linwini iye baƒonu lɛku lɛni békpeyi na bákya-ni kuvogyie iye ɛpu bebuo lɛku ni, béti-ni béboku.

²⁴ Na bani mbo sika ɔƒualadi ku abuala egyiedi ku bani mbo akasia kugyikɛ kɔni ndubɔdia bute kabla kammɔ lɛnɔ béti béboku Unwoti.

²⁵ Na beleku bani lɛnɔ ngyi budi béti bana linwo buluu ku ligyiedi lɛni náƒɔ kuye ku adi kpɛtɛ kpɛtɛ béboku.

²⁶ Na béti bana bese linwini bédi ala lidu béboku.

²⁷ Na batɔnkune bammɔ béboku onis atabi ani náƒɔ kuye ku ana lidu bamba ani na badubɔka bamana ɔkpane unengudi awu kedee ku lɛdiku lɛni muubi-nwu kayi lɛlɔ.

²⁸ Na básɔ béboku nnɔmii kede kede, ku ugyulo ƒɛƒɛɛ ɔni na baakya likpose nnɔmii kemmo ku oloƒui ƒɛƒɛɛ.

²⁹ Na Israelƒuɔ beleku ku banana bédie kayi ƒaa na béti ala pii bésienku Unwoti ka beti babla kabla kani na Unwoti ɔkɛnku Mose lɛlɔ úbo-ma ɔda mmɔ.

Besaleel Ku Oholiab Lɛlɔ Kɔtɛ

³⁰ Amu na Mose ɔ́su Israelƒuɔ bammɔ ɔnini, “Unwoti údie Besaleel ɔni ndi Uri ubidi na ɔdi Hura uwɔ ɔni nási Yuda kaba kemmo.

³¹ Na ɔ́ya na nwuna kɔyu kɔƒɔ-nwu lɛlɔ kemmo ku lɛnunda ku lɛlati, na úte-nwu kɔnu kemmo kabla lidu lidu.

³² Na ɔdubo sika ugyiedi ku ɔƒualadi ku abuala egyiedi buti bɔbla kɔlɛmii lidu lidu.

³³ Na ɔdubo atabi bɔbwɛ bɔtu, na ɔnwi ligyii, na ɔbla enu kabla abunidi lidu lidu.

³⁴ Na Unwoti úte anwu ku Oholiab ɔni ndi Ahisamak ubidi na ɔ́si Dan kaba kemmo kasusu ka béti ala ani na Unwoti úte-ma mmɔ batina bekyuli bamba.

³⁵ Ɔ́ya na nwuna kɔyu kɔ́ƒɔ bekyuli bamɛni lɛlɔ kemmo kalɛ bakana na banwi ala lidu lidu na bataa ala lidu lidu na beti linwo buluu ku ligyiedi lɛni náƒɔ kuye ku adi kpɛtɛ kpɛtɛ bedi ala lidu lidu. Na bagyi bana kabla kaduɛ.”