Israelƒuɔ Bɔlɛ 34 - Katɔti Ɔku Kedee

Mose Ɔ́nwi Atabi Anyɔ Awɔdi

¹ Amu na Unwoti ɔ́su Mose ɔnini, “Nwi atabi anyɔ awɔdi aani kalɛ kani na edeedi ammɔ ese. Na ndubunweni etemila ani línweni lɛ́sia edeedi ani bɛ́bwɛ lɛlɔ lɛsia awɔdi ammɔ lɛlɔ.

² Anwuɔsu klibi lɛlɔ se na lɛdigye na ata abasiaku-mi na Sinai kɔbi lili.

³ Na si adubo ni, taya na ukyuli ɔdi ɔsiaku-ɔ. Ɔsika naaayɔ ka lɛnu ukyuli ɔdi na amadɔ mmɔ. Na taya na koƒonu iye ɔmantɛ akɔ ɔdi usie kɔbi kaƒɔna mmɔ utáwia adila adi.”

⁴ Anwuɔsu Mose ɔ́nwi atabi anyɔ awɔdi na lɛdigye úti atabi ammɔ na ɔ́tɔlɔ úsie Sinai kɔbi lili aani kalɛ kani Unwoti úbo-nwu ɔda.

⁵ Amu na Unwoti ɔ́yu úbo Mose kudɔ na kɔbi kɔmmɔ lili na liƒlukutu kemmo. Na ɔ́kpali nwuna lɛnyi kedee na ɔ́su ɔnini, “Ami Unwoti mmɔ.”

⁶ Amu na Unwoti úsie ɔ́vi Mose anumi na ɔ́su-nwu ɔnini, “Ami Unwoti ndi Katɔti ɔni mɔɔnu kɔnyana, na mɔɔbla lɛƒɔndia uwi ƒui, na neeeti kɔnyi pla pla. Mmomu mɔɔyɔ́ mina bekyuli na mɔɔbla ala ulu lɛlɔ teete-ma.

⁷ Mɔɔdi mina kenye kani líse líte kaba bekyuli apim apim lɛlɔ na muuti bekyuli bani nénwini kama bákya bana ulikplu ala ku bani mɔɔta teenye-mi lɛlɔ ku ekpidi ƒui taakyiɛ. Nsu mɔɔní bekyuli bani mɔɔƒiɔ́-mi ƒui kɔtu. Naaayiƒala kudii ka lɛni bana bebi ku bawɔ kɔtu utédu kaba katɛdi ku kenedi lɛlɔ ɔ́si ekpidi ani na bana bawɔne bábla ɔsu.”

⁸ Amu na Mose úboku lɛlɔ kalɔ na úmwi Unwoti.

⁹ Na ɔ́su-nwu ɔnii, “Unwoti, si mina lɛlɔ lɛ́da-a kubiti sɔsɔ geen ni, muuvele-ɔ nnii kpanku-bu ina ka bekyuli bamɛni bébo atu ɔkplu geen. Ti bula ekpidi kyiɛ-bu na aƒɔ-bu aani ƒula bebi.”

Katɔti Ɔ́sɔ Únyimi Bunyimi Bɔwɔdi Ku Israel

¹⁰ Amu na Unwoti ɔ́su Mose ɔnini, “Ndubo bunyimi bɔwɔdi bunyimiku-ɔ na Israelƒuɔ ƒui anumi. Na bana anumi ndubo ala ebendi ani ukyuli ɔdi utabla kudii na kalɔ lɛlɔ bɔbla. Na ɔyawine biala ɔdubɔnu lɛla lɛni na ami ɔni ndi Unwoti ndubɔkana bɔbla. Ɔsika ndubo liƒu ala bɔbla bɔtina-a.

¹¹ Di ɔda ɔni muubó-ɔ ɔmwi mɛni lɛlɔ. Na ndubo Amoriƒuɔ ku Kanaanƒuɔ ku Hitiƒuɔ ku Perisiƒuɔ ku Hewiƒuɔ ku Yebusiƒuɔ bɔbɔku na ƒula anumi.

¹² Na awɔ ku kadi bamba bekyuli badi bitenyimi bunyimi bɔdi na kalɔ kani lɛlɔ na ésela mmɔ.

¹³ Mmomu bo bana akpabi ƒui bwɛ na ayila bana baƒiɔ bani baalɔ banii Asera ligyii lɛni bálɛ ƒui udu.

¹⁴ Na takpa ɔti ɔdi tebunku ami Unwoti lɛti pɛ. Ɔsika ami Unwoti muukpó kogyulo.

¹⁵ “Na awɔ ku kadi bamba bekyuli badi bitenyimi bunyimi bɔdi. Ɔsika si baakpá bana baƒiɔ na baabla akpala teete-nwu ni, badubo-ɔ bɔlɔ na ɔmɛni ɔdubunwini ala ani ndubo-ɔ bukpoku na adubɔdi bana adila.

¹⁶ Mmɔ na bina bebi badubusie betéti bana beleku na ɔmɛni ɔdubɔkpanku-ma na balɛ-mi kama na besie batákpa bana baƒiɔ.

¹⁷ “Teti lɛbuala tabla baƒiɔ badi na ataakpa.

¹⁸ “Di Bodobodo Ɔni Néteƒu Limeyi. Na adi bodobodo ɔni kemmo na bɔnyii buuubo emeyi maatɛ aani kalɛ na líbo-ɔ ɔda. Na abla ɔmɛni na Abib kɔbuli kɔni na líse líse kemmo, ɔsika kɔbuli kɔmmɔ kemmo na álɛ Egyipte kalɔ lɛlɔ.

¹⁹ “Na ubi ɔnanabi udeedi ku ɔmantɛ ebuo ɔgyani ubi udeedi biala ɔdi ami Unwoti ɔdi.

²⁰ Nsu ebo kuƒi ka aƒɔ ƒula ɔpɔnkɔ ɔgyani ubi udeedi ɔni na éti éte-mi na aƒɔ-nwu lili kayu ku koƒonu kɔkɔdi. Na si átabla lɛni ni, ɔlɛka aƒɛ-nwu limɔ. Na aƒɔ ƒula ubi ɔnanabi udeedi lili kayu ete Unwoti. “Na tebo-mi anumi ku enu kplu.

²¹ “Emeyi aku na ebo kuƒi ka abla kabla biala. Nsu ɔtuma uwi na ɔdi o-o, edula ɔƒɛwi o-o ni, tabla kabla kadi na limeyi maatɛdi lɛlɔ.

²² “Na taadi Edula Ebi Edeedi Bɔƒɛ Limeyi ku Kevo Kemmo Bɔkya Emeyi lɛkwa biala.

²³ Kɔtɛ na eteebo mina anumi taabakpa ami Unwoti ɔni ndi Israelƒuɔ Katɔti.

²⁴ Na ndubɔbɔku kadi bamba bani nlie mmɔ asa na ésie. Na ndubɔya na ƒula lɛmii lɛbɛbɛ libu. Kɔtɛ na adubɔda bɔlɛ ami Unwoti Katɔti anumi lɛkwa biala. Na ukyuli ɔdi uleti lɛnungyie na waƒɔ ƒula kalɔ kadi.

²⁵ “Teti akpala ubugya ku lɛla biala kemmo na bɔnyii bɔkya tabla akpala tete-mi. Na akpala ani na ábla na Kukpi Lili Bɔvia Limeyi ni, taya na kadi kegye akpala ammɔ lɛlɔ.

²⁶ “Na eti edula abuni ani na ákɛ ásiku ƒula kalɔ kemmo eboku ami Unwoti Katɔti kaduli. “Na tadu koƒonu iye ese ɔni mɔɔnyimi takun.”

²⁷ Amu na Unwoti ɔ́sɔ ɔ́su Mose ɔnini, “Nweni etemila amɛni ƒui se. Ɔsika etemila amɛni na ndubo buti bɔbla mina bunyimi ku Israel.”

²⁸ Na Mose ɔ́kya Unwoti kudɔ na kɔbi kɔmmɔ lili emeyi aavlene usien ku ɔƒɛ, na útadi iye útani lɛla lɛdi. Na únweni bunyimi bɔmmɔ ku Ɔda Bubo Leevu bɔmmɔ ɔ́sia atabi anyɔ ammɔ lɛlɔ.

Mose Únwini Úsie Israelƒuɔ Kudɔ Ɔ́si Sinai Kɔbi Lɛlɔ

²⁹ Uwi ɔni na Mose ɔ́yu Sinai kɔbi úbo na ɔda Ɔda Bubo Leevu ni, nwuna anumi eekeye, ɔsika ɔ́kya Unwoti kudɔ na bátɛmi. Nsu na ɔɔɔgyi ɔnii nwuna anumi eekeye lɛni.

³⁰ Amu ka Aaron ku bekyuli bammɔ bánu kalɛ na nwuna anumi eekeye ni, ɔdi biala ɔ́yia ka ɔni ude-nwu.

³¹ Nsu ɔ́lɔ-ma ka bebo. Na Aaron ku Israelƒuɔ batɔnkune bésie Mose kudɔ na ɔ́tɛmi úte-ma.

³² Na ɔmmɔ kama Israelƒuɔ ƒui báni béde-nwu na báka bamana-nwu. Na Mose ɔ́kɔ lɛsa ɔ́su-ma ɔda bubo etemila ani na Unwoti úti úte-nwu na Sinai kɔbi lɛlɔ.

³³ Uwi ɔni na Mose ɔ́kɔ lɛsa lɛmmɔ ɔ́wɔlɔ ni, úti lɛla lɛdi úbi anumi.

³⁴ Na uwi biala na Mose wesie Unwoti anumi utátɛmiku-nwu ni, ɔɔda lɛdiku lɛmmɔ teebimi. Na si ɔ́tɔlɔ mmɔ úbo Israelƒuɔ kudɔ úbasu-ma ɔda bubo biala ni,

³⁵ bekyuli bammɔ baanu ka nwuna anumi eekeye, na ɔɔsɔku lɛdiku lɛmmɔ teebi anumi útédu uwi ɔni na ɔ́sɔ únwini úsie utátɛmiku Unwoti.