Israelƒuɔ Bɔlɛ 32 - Katɔti Ɔku Kedee

Aaron Úti Sika Ugyiedi Ɔ́vɔ Ɔmantɛ Akɔ Ɔkɔdi

¹ Uwi ɔni na Israelƒuɔ bammɔ bánu ka Mose úsie ɔkya kɔbi lili na ulébo ni, bekyuli bammɔ básala lɛlɔ lisu na bésie Aaron kudɔ na bátásu-nwu banini, “Bɔɔɔgyi lɛla lɛni nálɛku Mose ɔni nákpanku-bu ɔ́lɛku Egyipte kalɔ lɛlɔ. Anwuɔsu bla unwoti ɔdi te-bu na ɔkpanku-bu.”

² Amu na Aaron ɔ́su-ma ɔnini, “Bidie sika ugyiedi asɛɛ ani na bina bebi bananabi ku belekubi ku bina beleku bakya biboku-mi.”

³ Anwuɔsu Bekyuli bammɔ ƒui bédie bana sika ugyiedi ala ani ƒui bakya mmɔ béte Aaron.

⁴ Na Aaron lɛnɔ úti sika ugyiedi ɔmmɔ ɔ́kya ogya kemmo na ɔ́nwamana-nwu na úwilimi uwi lɛla lɛdi kemmo na ɔ́nwi-nwu ɔ́bla sika ugyiedi ɔmantɛ akɔ ubi udu. Amu na bekyuli bammɔ básu banini, “Israelƒuɔ, bɛɛnu bina katɔti ɔni natɔku-mii na bɛ́lɛ Egyipte kalɔ lɛlɔ.”

⁵ Amu na Aaron ɔ́tu lɛkpabi na ɔmantɛ akɔ ɔni bávɔ mmɔ kudɔ. Na mmɔ na ɔ́kɔ lɛsa ɔ́su Israelƒuɔ ɔnini, “Kɔnaadi bɔdubo limeyi bɔdi buti bumwi bula Unwoti.”

⁶ Na nwuna lɛdigye uwi ni, béti bebuo badi na béti bábla bɔkyula akpala na badi lɛnɔ bábla unwi bɔbla akpala. Mmɔ na bekyuli bamɛni bése kalɔ baadi na baaní ntɛ teekpi na baabla lɛyalɛ ala.

⁷ Mmɔ na Unwoti ɔ́su Mose ɔnini, “Babla, na ayu kɔbi eteesie. Ɔsika ƒula bekyuli bani na ákpanku álɛku Egyipte kalɔ lɛlɔ bábla likpidi na béni-mi.

⁸ Báyila ulu geen ɔni na líbo-ma ɔda nnii basia mmɔ lɛlɔ. Na béti sika ugyiedi bávɔ ɔmantɛ akɔ na baakpá-nwu na baabla akpala teete-nwu. Na baasu banini, ‘Ɔmɛni ndi bula Katɔti ɔni nákpanku-bu ɔ́lɛku Egyipte kalɔ lɛlɔ.’

⁹ “Na ami Unwoti ngyi kalɛ na bekyuli bamɛni bese.

¹⁰ Anwuɔsu mɔɔsu awɔ Mose nnii tedie-ma kenye, ɔsika líti kɔnyi geen lɛ́kya-ma, na lɛ́bla kasusu ka lɛyila-ma udu. Na ɔmmɔ kama ndubɔbla awɔ Mose ku ƒula kaba bekyuli kadi kani náƒɔ kuye.”

¹¹ Amu na Mose úvele kɔnyana bɔnu na Unwoti Katɔti kudɔ ɔnini, “Unwoti, bi ɔsu na éti kɔnyi ákya ƒula bekyuli lɛni? Ƒula bekyuli badi, na éti ƒula ɔyikun bonwu na áda-ma édie Egyipte kalɔ lɛlɔ.

¹² Na bi ɔsu na ɔdi ka Egyipteƒuɔ basu banii kasusu na ábla ka akpanku ƒula bekyuli esienku abi lɛlɔ na atádu-ma na ayila-ma udu. Anwuɔsu ya na kaƒɔ kayɔ-ɔ na avumana ƒula kasusu, na taya na ɔgbankpi ɔmɛni udu ubo ƒula bekyuli lɛlɔ.

¹³ Na enyimo ƒula linyese lɛni na éte ƒula kabla bablane Abraham ku Isak ku Yakob ka adubɔya na bana kaba bekyuli bemomo aani katɔ ayabi. Na adubute-ma kalɔ kani na ése kenye ka badubuti-ka babla bana kadikɔ.”

¹⁴ Ɔmɛni ɔsu Unwoti kasusu kávumana, na útaya na ɔgbankpi ɔni na ɔ́su ka webo nwuna bekyuli lɛlɔ ubo-nwu kemmo lɛni.

^15-16 Amu na Mose únwini ɔ́yu kɔbi kɔmmɔ lɛlɔ na ɔdanku bunyimi atabi anyɔ ani na Unwoti ɔ́nwi na únweni ɔda bubo ɔ́sia-nya lɛlɔ mmɔ úboku.

¹⁷ Ka Yosua únu ka bekyuli bammɔ beete kudu ni, ɔ́su Mose ɔnini, “Kekpo kakya kesii kani na belie mmɔ.”

¹⁸ Amu na Mose ɔ́su ɔnini, “Kudu kɔmmɔ kulátina ka bekyuli badi nékpo bádi lɛlɔ. Na kulátina lɛnɔ ka badi muuwulo ka bádi-ma lɛlɔ ɔsu. Mmomu kuse aani ɔnu na baatu.”

¹⁹ Uwi ɔni na Mose ɔdaku bɔni bude kesii kani Israelƒuɔ básala belie na ɔ́nu ɔmantɛ akɔ ɔni bávɔ ku kalɛ bekyuli bammɔ bakya baatɔ́ taamana akɔ ɔni bávɔ mmɔ ni, kɔnyi kɔ́ƒɔ-nwu lɛlɔ kemmo na kɔbi kaƒɔna mmɔ na úƒwimi atabi anyɔ ani na Unwoti úti úte-nwu mmɔ ɔ́va kalɔ na ábwɛ kɔkɛ kɔkɛ.

²⁰ Mmɔ na ɔ́kyula ɔmantɛ akɔ ɔni na bávɔ mmɔ na ɔ́kɔ-nwu únwini ntɔ uti úwi ntu kemmo na úti úte Israelƒuɔ bammɔ na báni.

²¹ Amu na Mose úye Aaron ɔnini, “Bi na bekyuli bamɛni bábla-a ɔsu na áya na bábla likpidi bonwu lɛmɛni udu?”

²² Amu na Aaron údie kenye ɔnini, “Teti kɔnyi takya-mi, ɔsika agyi kalɛ na likpidi bɔbla bɔɔyu bekyuli bamɛni emini.

²³ Ama násu-mi banini, ‘Bɔɔɔgyi lɛla lɛni nálɛku Mose ɔni nákpanku-bu ɔ́lɛku Egyipte kalɔ lɛlɔ.’

²⁴ Amu na lɛ́su-ma nnii beti bana sika ugyiedi asɛɛ bébo beboku. Na ama lɛnɔ béti béte-mi na líti lɛ́kya ogya kemmo, na kɔnakunwi ni, akɔ ubi ɔmɛni nálɛ!”

²⁵ Mmɔ na Mose ɔ́nu ɔ́ti ka Aaron nébile bekyuli bamɛni ɔsu na bábla adɔlɔla amɛni na bana bekisine anumi.

²⁶ Amu na Mose úténye kayakun kani bekyuli bammɔ básala belie mmɔ kenye na údie lɛdi momoomo ɔnini, “Ukyuli biala ɔni nkya Unwoti kakɛ ni, ɔlɛ na ubenye-mi kudɔ mɛni!” Ɔmɛni ɔsu Lewiƒuɔ bammɔ ƒui báka bámana-nwu.

²⁷ Mmɔ na ɔ́su-ma ɔnini, “Israel Unwoti Katɔti uubó-mii ɔda ɔnini, ‘Bina akɔ ɔdi biala uti nwuna kewii na bisie kesii kani na Israelƒuɔ básala beli na bɛdu bina banwani bananabi ku bina bakpana ku bina liku bekyuli ƒui.’ ”

²⁸ Amu na Lewiƒuɔ bammɔ bábla kalɛ bébo-ma ɔda mmɔ na bádu bekyuli aani mpim ɛtɛ limeyi lɛmmɔ.

²⁹ Amu na Mose ɔ́su Lewiƒuɔ bammɔ ɔnini, “Ɔmwi kadi ni, bɛ́bla lɛlɔ sɛɛn aani bakpane na bíte Unwoti ɔkɛnku kalɛ na bɛ́du bina bebi ku banwani ɔsu.”

³⁰ Ka kadi kégye ni, Mose ɔ́su bekyuli bammɔ ɔnini, “Bɛ́bla likpidi bonwu. Nsu nsɔ ndubusie kɔbi kɔmmɔ lili ntévele Unwoti likpidi lɛni bɛ́bla mɛni lili kayu lite-mii. Ɔƒɛni kalɛ ɔdubɔnu-mii kɔnyana na uti likpidi lɛmmɔ ɔkyiɛ-mii.”

³¹ Amu na Mose ɔ́sɔ únwini úsie-nwu kudɔ na ɔ́su-nwu ɔnini, “Bekyuli bamɛni bábla likpidi bonwu, ɔsika béti sika ugyiedi bávɔ ɔti bamba ɔdi béte lɛlɔ na bákpa-nwu.

³² Nsu buvele na nda-a nnii ti bana ekpidi kyiɛ-ma. Mmomu si éni-ma buti bɔkyiɛ bɔdi ni, na akpa ada-mi lɛnyi edie ƒula ɔku kemmo.”

³³ Amu na Unwoti údie kenye ɔnini, “Bekyuli bani náƒiɔ-mi anyi na ndubo bɔda budie mina ɔku ɔmmɔ kemmo.

³⁴ Nsu ɔƒaani ni, teesie na atákpanku bekyuli bammɔ esienku kesii kani lɛ́su-ɔ líse. Na enyimo ka mina ɔtu ɔdubo-ɔ bɔgyumana. Nsu uwi ɔdi ɔdubo ɔni na ndubo bekyuli bamɛni kɔtu bɔni ɔkɛnku likpidi lɛni bábla ɔsu.”

³⁵ Anwuɔsu Unwoti ɔ́ya na ɔlɛ úbada bekyuli bammɔ ka báya na Aaron úti bana sika ugyiedi na ɔ́vɔ ɔmantɛ akɔ úte-ma ɔsu.