Israelƒuɔ Bɔlɛ 25 - Katɔti Ɔku Kedee

Katɔti Kevo Akpala

¹ Amu na Unwoti ɔ́su Mose ɔnini,

² “Kɔ lɛsa te Israelƒuɔ na asu-ma na beti akpala beboku-mi. Na aƒɔ akpala ammɔ ɔdi biala kudɔ eboku-mi kalɛ na ɔ́si-nwu kayi kemmo kalɛ.

³ Na akpala ani na adubo bɔƒɔ mmɔ ndi sika ugyiedi ku ɔƒualadi ku abuala egyiedi,

⁴ ku koƒonu linwini adi ani náƒɔ kuye geen na ese aani evete awɔdi, ku buluu ku egyiedi ku ana lidu bamba, ku adi kpɛtɛ kpɛtɛ ku ese linwini,

⁵ ku baƒonu lɛku lɛni na békpeyi na bákya-ni kuvo na lígyie kaduɛ, ku bebuo lɛku bamba ku akasia ligyii kpakplaa,

⁶ ku asogya nnɔmii, ku ugyulo ƒɛƒɛɛ ɔni na baakya likpose nnɔmii kemmo ku oloƒui ƒɛƒɛɛ,

⁷ ku sika atabi udu ɔdi na baalɔ onis ku ana lidu bamba ani na baamana ɔkpane lɛwuku ku lɛdiku lɛni muubi-nwu kayi lɛlɔ.

⁸ “Na aya na batu kevo kedee bete-mi na lilie-ma akɔ.

⁹ Sia anumi na anu ka bátu kevo kedee kamɛni ku kana lɛlɔ ala aani kalɛ na ndubo-ɔ bɔtina pɛpɛɛpɛ.

Bunyimi Adaka Ɔmmɔ

¹⁰ “Ya na banwi akasia ugyii adaka na beti akasia ugyii ɔni bune mabla aani lɛgba ine na bɔbɛbɛ bɔdi lɛgba inyɔ ku kakɛ na ɔkuku ɔgba unwi ku kakɛ banwi-nwu.

¹¹ Na beti sika ugyiedi kede kede banwamana bewi-nwu kama ku kemmo ƒui. Na beti sika ugyiedi babla aani lɛduni bamana libila lɛmmɔ atu.

¹² Beti sika ugyiedi babla kɔkwɛnimi bakya adaka ɔmmɔ lɛgba ine bɔmmɔ lɛlɔ na ɔƒɛnyi ɔni ku ɔni lɛlɔ.

¹³ Na babwi akasia ligyii gyɔlɔɔ gyɔlɔɔ na bákwa-ni ku sika ugyiedi.

¹⁴ Na béti ligyii lɛmmɔ bákya kɔkwɛnimi kɔmmɔ eƒi ammɔ kemmo na adaka ɔmmɔ ɔvi ɔni ku ɔni, kalɛ na ɔdia na bataagyu-nwu taasia amangba.

¹⁵ Na ligyii lɛmmɔ litaakya adaka ɔmmɔ lɛlɔ lɛni kani batada betedie.

¹⁶ Ɔmmɔ kama ndubuti atabi anyɔ ani lɛlɔ na ɔda bubo etemila asia lite-ɔ na eti-nya akya adaka ɔmmɔ kemmo.

¹⁷ “Na eti sika ugyiedi abla likpidi bɔkyiɛ liboku libila ete adaka ɔmmɔ. Na nwuna bune bɔdi lɛgba ine, bɔbɛbɛ bɔbla lɛgba inyɔ ku kakɛ na bɔkuku bɔbla ɔgba unwi ku kakɛ.

¹⁸ Na etu sika ugyiedi abla bebweyi inyɔ bani ndi Kerub alɛ liboku lɛmmɔ atu anyɔ ammɔ lɛlɔ.

¹⁹ Na unwi ɔlɛ ɔƒɛnyi unwi na ɔkladi lɛnɔ ɔlɛ ɔƒɛnyi ɔkladi lɛlɔ. Nwi libila lɛmmɔ ku Kerub bebweyi bammɔ danku lɛlɔ na ɔsala unwi na benye lɛƒɛnyi inyɔ bɔmmɔ.

²⁰ Na aya na bebweyi bammɔ bebimi bana avwi ammɔ bakɔliku katɔ na bana ɔyuli ubi libila lɛmmɔ lɛlɔ. Na aya na bebweyi bammɔ benwini anumi batina lɛlɔ na bana anumi ataanu libila lɛmmɔ.

²¹ Ti ɔda bubo etemila ani na líte-ɔ na asia atabi ammɔ lɛlɔ kya adaka ɔmmɔ kemmo na eti libila lɛmmɔ ebi-nwu kenye.

²² Na libila lɛmmɔ katɔ mmɔ kesii kani na bebweyi inyɔ bammɔ balɛ ntɛ ni, mmɔ na ndubo-ɔ butaasiaku na litemi lite-ɔ na asu Israelƒuɔ ɔda ɔni mebo-ma.

²³ “Ti akasia ugyii bla ala kasiakɔ na une aani lɛgba ɛtɛ, na ɔbɛbɛ aani ɔgba unwi ku kakɛ na ɔkuku aani lɛgba inyɔ ku kakɛ.

²⁴ Na eti sika ugyiedi kede kede akwa-nwu lɛlɔ ƒui na eti ɔdi abla aani lɛduni amana-nwu atu.

²⁵ Kana ugyii aani lɛkɔkɔ bɔbɛbɛ mana-nwu atu ka mana aani lɛka na eti sika ugyiedi amana-nwu lɛlɔ amana lɛni kani.

²⁶ Na abla kɔkwɛnimi ine ada ala kasiakɔ ekpo ene kesii kani na lɛgba lɛmmɔ linye mmɔ.

²⁷ Na kɔkwɛnimi kɔmmɔ kɔni kude ala kasiakɔ atu lɛka lɛmmɔ na ɔdia na kɔkwɛnimi kɔmmɔ kɔda ligyii lɛni na badubo buti butaagyu ala kasiakɔ kammɔ taavinku.

²⁸ Ti akasia ligyii nwi ligyii lɛmmɔ na eti sika ugyiedi amana-ni lɛlɔ ƒui na beti bataagyu ala kasiakɔ kammɔ.

²⁹ Na abla akyami lidu lɛni ndubo-nwu lɛlɔ butaasia ku sika ugyiedi kavɔ. Lɛni kani na akyami ku lɛsii lɛvɔdi lɛni ndubo bɔdia na beteewilimi akpala ku ntɛ akpala ammɔ ƒui ɔlɛka ɔbla sika ugyiedi ala.

³⁰ Na eti bodobodo kedee ɔni muusé Unwoti anumi asia ala kasiakɔ kamɛni lɛlɔ na mina anumi uwi ƒui.

Asogya Kasiakɔ Ugyii

³¹ “Bla asogya kasiakɔ ugyii na aya na ɔkywɛne utu-nwu ku sika ugyiedi. Na ɔbla nwuna ɔka ku ugyii ɔni menye ɔka ɔmmɔ lɛlɔ ku amangba kɔgba wɛlɛ wɛlɛ kɔni ndanku lɛɛƒɛɛ lɛni kemmo na badubo egyii anwula butaakya. Na abla-nwu aani kalɛ na kugyii kuusé kalɔ ku bɔta. Na kesii kadi kebimi aani kalɛ ka anwula eebimi na ɔmɛni ƒui ɔdanku ugyii unwi lɛlɔ.

³² Bla ugyii ɔmmɔ na akya-nwu amangba kɔgba ɛku, ɛtɛ na kakɛ kenwi na ɛtɛ bamba lɛnɔ na ɔvi ɔkladi.

³³ Bla lɛɛƒɛɛ udu ɔni nse aani kugyii kɔni baalɔ banii almon anwula na úbimi na ɔɔta na nwuna amadɔ lɛnɔ na eti alɛ ugyii ɔmmɔ amangba lɛlɔ ɛtɛ ɔvi unwi, ɛtɛ ɔvi ɔkladi.

³⁴ Na asogya kasiakɔ ugyii ɔmmɔ eli ni, bla almon anwula lɛɛƒɛɛ udu ɔmmɔ ine sia amangba ammɔ akɔ na anwula ammɔ ébimi na nwuna kalɔ kataata ɔwɔdi.

³⁵ Na kesii kani mɔɔta mmɔ ni, unwi ɔkya amangba ligyii inyɔ ntɛ unyɔdi lɛnɔ ligyii inyɔ bamba ntɛ na ɔtɛdi lɛnɔ ligyii inyɔ bɔkladi ntɛ.

³⁶ Na kesii kani mɔɔta mmɔ ku amangba kɔgba kɔmmɔ ɔlɛka ɔdanku lɛlɔ ɔbla ugyii unwi ku asogya ugyii ɔmmɔ, na ɔdi sika ugyiedi kede kede ƒui.

³⁷ “Lɛ asogya maatɛ ɔmmɔ ligyii lɛmmɔ lɛlɔ kalɛ na liteekeye taatina kuƒi kɔni nwi úsie anumi kakɛ.

³⁸ Asogya kɔbuli ku nnɔmii kewikɔ ku kabuli kammɔ linyenela ƒui ɔdi ka ɔbla sika ugyiedi kede kede.

³⁹ Na sika ugyiedi edula ebi akyami maane ku kakɛ unu na badubo buti bɔbla asogya kasiakɔ ugyii ɔmɛni ku nwuna lɛlɔ ala ƒui.

⁴⁰ Sia anumi na anu ka bábla-nwu na udu ɔni na ánu na kɔbi lili mɛni kani lɛlɔ pɛpɛɛpɛ.