Israelƒuɔ Bɔlɛ 24 - Katɔti Ɔku Kedee

Katɔti Ɔ́lɛ Bunyimi Bɔmmɔ Ugyii

¹ Amu na Unwoti ɔ́su Mose ɔnini, “Awɔ ku Aaron ku Nadab ku Abihu ku Israel benengu liti ku aavlanyɔ bammɔ bɛkɔ bibo kɔbi katɔ mɛni na bebenye kɔƒɛlɛ kesii kadi na bakpa-mi.

² Nsu awɔ Mose lɛti pɛ mɔɔní ede ami Unwoti kudɔ mɛni, ama batakpɛ betebo.”

³ Amu na Mose únwini úsie bekyuli bammɔ kudɔ na útásu-ma Unwoti ɔda ɔni na úbo-ma ƒui. Amu ka ɔ́su-ma ɔ́wɔlɔ ni, bekyuli bammɔ ƒui bédie kenye banini, “Búnu lɛla biala na Unwoti ɔ́su, na bɔdubo ɔda bubo bɔmmɔ ƒui lɛlɔ bɔdi.”

⁴ Ɔmmɔ kama Mose únweni Unwoti ɔda bubo bɔmmɔ lɛla biala úse. Mose ɔ́ta ɔtanta tutuutu na ɔ́tu lɛkpabi ɔ́lɛ kɔbi kɔmmɔ kaƒɔna, na úti atakpɛ leevu-anyɔ úse lɛkpabi lɛmmɔ kudɔ. Na lɛkpabi linwi biala linye lite Israel adua leevu-anyɔ ammɔ.

⁵ Mmɔ na Mose ɔ́tala bakloƒu badi na bádu ɔmantɛ bakɔ bakɔdi badi bákyula bábla unwi bɔbla akpala béte Unwoti.

⁶ Amu na Mose úle bebuo bammɔ ubugya kemmo inyɔ na úti kakɛ úwi lɛkyami kemmo. Na ɔ́kuna kakɛ kakladi lɛnɔ úwi lɛkpabi lɛmmɔ lɛlɔ.

⁷ Ɔmmɔ kama ɔ́ka Unwoti Bunyimi Kedee Ɔku kemmo etemila úte bekyuli bammɔ. Amu na bekyuli bammɔ básu banii, “Bɔdubo lɛla biala na Unwoti ɔ́su-bu bɔbla bɔsiaku lɛni kani, na bunu-nwu litemi.”

⁸ Amu na Mose úti ubugya ɔni nwi lɛkyami kemmo mmɔ na ɔ́kuna uwi bekyuli bammɔ. Na ɔ́su-ma ɔnini, “Ɔmɛni ndi ubugya ɔni mɔɔbala bunyimi bɔni na Unwoti unyimiku-mii uwi ɔni na úti ɔda bubo bɔmmɔ úte-mii.”

⁹ Amu na Mose ku Aaron ku Nadab ku Abihu ku Israel benengu liti ku aavlanyɔ bammɔ bésie kɔbi kɔmmɔ lili,

¹⁰ na bánu Israelƒuɔ Katɔti. Na kesii kani na nwuna lɛgba lɛnya ni, use aani ulu ɔni na béti sika atabi ani baalɔ Saƒaya bákya bávi na uukeye aani kayaa.

¹¹ Nsu Katɔti útabla Israel batɔnkune bamɛni lɛla lɛdi, mmomu bánu Katɔti, na bádi na báni.

¹² Amu na Unwoti ɔ́su Mose ɔnini, “Kɔ bo, na ebelie-mi kudɔ na kɔbi lili mɛni, na ndubo atabi ani lɛlɔ na línweni ɔda bubo bɔmmɔ lɛ́sia buti bute-ɔ ka eti atina-ma.”

¹³ Mmɔ na Mose ku nwuna ubunkune Yosua báyu ulu na Mose ɔ́kɔ úsie Katɔti kɔbi lili mmɔ.

¹⁴ Asa na Mose watɔlɔ ni, ɔ́su benengu bammɔ ɔnini, “Bɛsɔ bilie mɛni útédu ka búnwini búbo. Na si ɔdi ku ɔdi bakɛ litemi lɛdi ni, Aaron ku Hur bakya-mii kudɔ mɛni. Bebo kuƒi ka batɛ-ni bete-mii.”

¹⁵ Uwi ɔni na Mose ɔ́kɔ úsie Sinai kɔbi kɔmmɔ lili ni, liƒlukutu lɛ́ƒɔ kɔbi kɔmmɔ lɛlɔ ƒui.

¹⁶ Na Unwoti bukeye bonwu búbaƒɔ Sinai kɔbi kɔmmɔ lɛlɔ. Na emeyi aku sɔɔn na liƒlukutu lɛmmɔ lɛ́kya kɔbi kɔmmɔ lɛlɔ mmɔ. Na limeyi maatɛdi ni, Unwoti ɔ́kpali Mose ɔ́siku liƒlukutu lɛmmɔ kemmo.

¹⁷ Na Israelƒuɔ bani nnye kalɔ baanu teemene ni, Unwoti bukeye bɔmmɔ buse-ma aani ogya bonwu ɔni mɔɔkyula ala na kɔbi kɔmmɔ eli.

¹⁸ Na Mose úduo liƒlukutu lɛmmɔ kemmo ka ɔ́kɔ úsela kɔbi kɔmmɔ lili. Na ɔ́kya kɔbi kɔmmɔ lɛlɔ emeyi aavlene usien ku ɔƒɛ.