Israelƒuɔ Bɔlɛ 20 - Katɔti Ɔku Kedee

Katɔti Ɔda Bubo Leevu

¹ Amu na Unwoti ɔ́ka ɔda bubo etemila leevu amɛni ɔ́su ɔnini,

² “Ami ndi bina Unwoti Katɔti ɔni nédie-mii ɔ́lɛku Egyipte kalɔ lɛlɔ kesii kani nka bénye-mii lɛlɔ na bɛɛbla bana kabla.

³ Bitese benwoti badi bitebunku-mi lɛlɔ.

⁴ Bitavɔ iye bɛnwi lɛla lɛni nálɛ ala ani nkya kayaa iye kalɔ lɛlɔ iye ntu bɔni na kalɔ kemmo na bitaakpa.

⁵ Na tebo kalɔ takya baƒiɔ badi lili kalɔ iye akpa ɔdi. Ɔsika ndi bina Unwoti Katɔti ɔni muukpó kɔgyulo, na mɔɔní bekyuli bani muukisi-mii kɔtu ɔ́si bati ku bebi lɛlɔ útédu kaba katɛdi ku kenedi lɛlɔ.

⁶ Nsu mɔɔbla lɛƒɔndia teete nkyuli ɛlɛ ɛlɛ bani mɔɔyɔ́-mi na baadi mina ɔda bubo lɛlɔ.

⁷ Takpali Unwoti ƒula Katɔti lɛnyi keeke. Ɔsika Unwoti ɔdubɔni ukyuli ɔni mɔɔlɔ-nwu lɛnyi keeke kɔtu.

⁸ Se Lɛnwunameyi likpo, na abla-ni kedee.

⁹ Emeyi aku na ɔlɛka eti abla ƒula kabla.

¹⁰ Nsu limeyi maatɛdi ndi ami Unwoti ƒula Katɔti Lɛnwunameyi lɛni kemmo na útalɛ ka abla kabla kadi, awɔ iye ƒula bebi iye ƒula kabla bablane iye ƒula bebuo iye ɔƒɔ ɔni nlie-ɔ kudɔ.

¹¹ Ɔsika emeyi aku kemmo na Unwoti údie katɔ ku kalɔ ku ɛpu ku ala ani nkya-nya kemmo, nsu ɔ́nwuna limeyi maatɛdi lɛlɔ. Anwuɔsu Unwoti údie Lɛnwunameyi sɛsɛɛ na úte-ni kusɛ kusɛ.

¹² Bu ƒ'ɔti ku ƒ'ini na adubulie ngba gyɔlɔɔ, na keyi kayɔku-ɔ na kalɔ lɛlɔ, kalɔ kani na ami Unwoti ƒula Katɔti ndubuti lite-ɔ.

¹³ Tadu ukyuli.

¹⁴ Tadi kɔsɔnɔ.

¹⁵ Teyu.

¹⁶ Tada ukyuli ɔdi kenye.

¹⁷ Taya na anumi egyie-ɔ na ƒula ukyulikpana kaduli lɛlɔ. Na taya na anumi egyie-ɔ na ƒula ukyulikpana ulekudi, iye nwuna kabla ɔblane ɔnanabi iye ulekubi, iye nwuna ɔmantɛ bakɔ iye nwuna bebuo ala betine iye nwuna lɛla biala na ubo lɛlɔ.”

Liƒu Lɛ́da Israelƒuɔ

¹⁸ Amu ka bekyuli bammɔ bénu kalɛ na katɔ keedu, na kaabwɛ ogya, na kakpɛɛ lɛnɔ kaaku, na bánu kalɛ na uyɔ lɛnɔ ɔ́ƒɔ kɔbi kɔmmɔ lɛlɔ ni, liƒu bonwu lɛ́da-ma. Anwuɔsu báni bésie kama kama.

¹⁹ Na básu Mose banini, “Si Unwoti úbo litemi lɛdi na wasu-bu ni, na ɔsu-ɔ na asu-bu. Na bulayɔ ka Unwoti ɔlati ɔtɛmi ute-bu. Si ɔɔɔdi lɛni bula ƒui bɔdubo bukpi.”

²⁰ Amu na Mose ɔ́su bekyuli bammɔ ɔnini, “Liƒu litada-mii. Bubo kani na Unwoti úbo ubakɔku-mii ɔnu kalɛ na bitaadi nwuna ɔda bubo lɛlɔ na bilabla likpidi lɛdi.”

²¹ Nsu ɔmmɔ ƒui kama bekyuli bammɔ bámu benye ɔgyu baanu, na Mose lɛti kani nésie úsela kɔbi suu kɔni kemmo na Unwoti ɔ́kya mmɔ kudɔ.

Katɔti Úbo Israelƒuɔ Ɔda Na Lɛƒiɔkpa Lɛlɔ

²² Amu na Unwoti ɔ́su Mose ɔnini, “Su Israelƒuɔ anini, ‘Amii alati bínu kalɛ na ami Unwoti lɛ́tɛmiku-mii lɛ́siku katɔ,

²³ Anwuɔsu bitese baƒiɔ badi bitebunku-mi, na biteti sika ɔƒualadi iye ugyiedi bitavɔ baƒiɔ badi bitese lɛlɔ.

²⁴ “ ‘Biti lɛti bɛtu lɛkpabi bite-mi na biti bina baƒonu ku bese ku ɔmantɛ bakɔ bitaabla bɔkyula akpala ku unwi bɔbla akpala nwuna lɛlɔ teete-mi. Na kesii biala na lɛ́su ka bɛkpa-mi na bɛkɔliku mina lɛnyi katɔ ni, ndubɔyu libo na mbete-mii kusɛ kusɛ.

²⁵ Na si bíti atabi bɛɛbla lɛkpabi bite-mi ni, biteti atabi ani na abuala na béti bábuɛ-nya, ɔsika si bíti atabi ammɔ udu bɛ́tu-ni ni, bɛdubɔya na uteese-mi lɛlɔ.

²⁶ Na bitabla akpabi na bɛsia ubili bitédu-nwu kudɔ kalɛ na bilakɔ libili lɛmmɔ na ɔdi wetédie lɛlɔ kasɔngya.’ ”