Israelƒuɔ Bɔlɛ 2 - Katɔti Ɔku Kedee

Báwɔ Mose

¹ Uwi ɔmmɔ kemmo ni, ɔnana ɔdi ɔ́si Lewi ɔtɔ kemmo na úti uleku ɔdi ɔ́siku ɔtɔ ɔmmɔ kani kemmo.

² Na uleku ɔmɛni úbawɔ ɔnanabi úte-nwu. Na kalɛ na ubiwɔ ɔmɛni ɔɔdia bɔnu ɔsu ni, úti-nwu ɔ́bɛla abuli atɛ sɔɔn.

³ Nsu ka ɔ́nu ɔ́ti ka ubiwɔ ɔmɛni ɔsɔ uládia bɔbɛla ni, ɔ́wia kagyigyɛ kadi na ɔ́wia kɔma ɔ́mana-nwu kemmo ku kama kalɛ na ntu bulakana-ka kemmo buduo. Amu na úti ubiwɔ ɔmɛni ɔ́kya kagyigyɛ kamɛni kemmo. Na úti-nwu útákya ketudɔ alakpi adi akɔ na Nil Ketu kɔtu.

⁴ Na ubiwɔ ɔmɛni ɔnwani ulekubi ɔ́bɛ unye kesii kadi na unye ɔɔnu lɛla lɛni ndubɔlɛku ubi ɔmmɔ.

⁵ Uwi ɔmmɔ kani na Ɔga Ƒarao ubidi ulekubi úsie ketu mmɔ ɔnii utákpi. Na ka ɔkya ɔɔkpí ni, nwuna bebunkune lɛnɔ bakɛ ketu amadɔ mmɔ. Amu na kɔnakunwi Ƒarao ubidi ɔmɛni ɔ́nu kagyigyɛ kamɛni na livo lɛmmɔ akɔ na ɔ́tala nwuna belekubi kabla bablane bammɔ unwi ka utágyu-ka uboku-nwu.

⁶ Ka Ƒarao ubidi úbimi kagyigyɛ kamɛni ni, ɔ́nu ka ubiwɔ ɔdi ɔ́kya-nwu kemmo. Ubiwɔ ɔmɛni úse kalɔ uuwulo na nwuna lɛlɔ lɛ́kywi-nwu kaƒɔ. Mmɔ na ɔ́su ɔnini, “Ubiwɔ ɔmɛni ɔdi Hebriƒuɔ bebi akɔ ɔdi.”

⁷ Anwuɔsu ubiwɔ ɔmɛni ɔnwani ulekubi úsie ɔga ubidi ɔmɛni kudɔ na úye-nwu ɔnini, “Nteesie na ntálɔ Hebrini uleku ɔdi mboku-ɔ na uteete-nwu lɛnyii teete-ɔ?”

⁸ Amu na ɔga ubidi ɔmɛni údie kenye ɔnini, “Ɛɛn.” Mmɔ na ulekubi ɔmɛni útálɔ ubiwɔ ɔmmɔ uni geen.

⁹ Amu na ɔga ubidi ɔmɛni ɔ́su uleku ɔni bátálɔ mmɔ ɔnini, “Ti ubiwɔ ɔmɛni na eteete-nwu lɛnyii teete-mi, na ndubuteete-ɔ lɛyuƒɔla.” Anwuɔsu uleku ɔmɛni úti ubiwɔ ɔmɛni na uute-nwu lɛnyii.

¹⁰ Amu ka ubiwɔ ɔmɛni ɔ́lɛ lili blii ni, uleku ɔmmɔ úti ɔnamu ɔmmɔ úsienku ɔga ubidi ɔmmɔ, na úti-nwu ɔ́bla ubidi na ɔ́sia-nwu lɛnyi ɔnii Mose lɛni kalɔ ndi “Lídie ubi ɔmɛni lɛ́lɛku ketu kemmo.”

Mose Úkeli Úsie Midian Kalɔ Lɛlɔ

¹¹ Uwi ɔni na Mose ɔ́ɔlɛ lili ƒui kama ni, limeyi lɛdi úsie kesii kani na nwuna bekyuli bakya, na ɔ́nu kabla kpakplaa kani na baabla. Mmɔ ni, ɔ́nu ka Egyipteni ɔdi ɔkya uubó Hebrini ɔdi ɔni ndi anwu Mose lɛlɔ ukyuli.

¹² Amu ka Mose ɔ́tɛ anu ɔ́mana ni, ɔ́nu ka ukyuli ɔdi uuude mmɔ. Amu na úƒie Egyipteni ɔni nébo Hebrini ɔmmɔ na úbo-nwu ɔ́du. Na úti-nwu ɔ́bɛla lɛti kemmo.

¹³ Na ka kadi kégye ni, Mose ɔ́nu ka Hebriƒuɔ lɛti lɛti badi bakya beekpó. Amu na ɔ́su ɔnwa ɔni náƒiɔ ɔnini, “Bi ɔsu na eebó ƒula ɔnwa Hebrini?”

¹⁴ Amu na ɔnana ɔmmɔ údie kenye ɔnini, “Ɔma nédi-ɔ bula lɛlɔ ɔdine ku bula litemi ɔtɛne? Munuu aayɔ́ ka adu-mi aani kalɛ na ádu Egyipteni ɔmmɔ yoo?” Mmɔ na Mose ɔ́yia na ɔ́su lɛlɔ ɔnini, “Likpidi lɛni na lɛ́bla mɛni ni, bekyuli bánu-ni báti.”

¹⁵ Amu ka Ƒarao únu litemi lɛmɛni ni, ɔ́wia ulu biala lɛlɔ ka nka ɔdu Mose. Nsu Mose úkeli na útélie Midian kalɔ lɛlɔ na libiɔ lɛdi kɔtu.

¹⁶ Na ka úsie útélie mmɔ ni, Midian ɔkpane ɔdi bebi begblebi maatɛ bébo libiɔ lɛmmɔ kudɔ banii bebedu ntu na beti betéte bana ɔti baƒonu ku bese.

¹⁷ Nsu baƒonu lɛlɔ banune badi bébo libiɔ lɛmmɔ kudɔ na bábɔku begblebi bammɔ. Na Mose úkpo ɔ́ƒɔ begblebi bammɔ na údu ntu úte-ma.

¹⁸ Amu ka begblebi bammɔ bénwini bésie bana ɔti Yetro kudɔ ni, úye-ma ɔnini, “Bi nébo ɔsu na ɔmwi bíyile bubo lɛni?”

¹⁹ Amu na bédie kenye banini, “Egyipteni ɔdi úbo na úbekpo ɔ́ƒɔ-bu na baƒonu lɛlɔ banune bammɔ enu kemmo. Na úbunku na búdu bula ntu muedi búte bula bebuo.”

²⁰ Amu na úye nwuna bebi bammɔ ɔnini, “Wɛ na ɔnana ɔmmɔ ɔkya? Bi ɔsu na bɛ́ya na ɔtɔlɔ? Bitáwia-nwu biboku na bute-nwu lɛla lɛdi na ɔdi.”

²¹ Mose únu kalɔ ka ɔsɔ ɔkya ɔnana ɔmɛni kudɔ, na ɔnana ɔmmɔ úti ubidi ulekubi Sipora úte-nwu ɔnii uti.

²² Na Sipora ɔ́wɔ ubi ɔnanabi úte Mose. Na Mose ɔ́sia-nwu lɛnyi ɔnii Gerson ɔni kalɔ ndi ɔnii, “Línwini ɔƒɔ na kalɔ bamba lɛlɔ.”

²³ Akwa pii adi kama ni, Egyipteƒuɔ ɔga úbekpi. Nsu Israelƒuɔ bamu bakya bana lɛbibo kemmo. Ɔmɛni ɔsu béwulo bévele Katɔti ka ubedie-ma ɔlɛku bana lɛbibo kemmo.

²⁴ Na Katɔti únu bana budumo na únyimo bunyimi bɔni na únyimi ku Abraham ku Isak ku Yakob.

²⁵ Anwuɔsu Katɔti ɔ́nu kalɛ na Israelƒuɔ beebó abi, na litemi lɛmmɔ líkpoku-nwu.