Israelƒuɔ Bɔlɛ 17 - Katɔti Ɔku Kedee

Ntu Bɔ́lɛ Lɛtakpɛ Kemmo

¹ Uwi ɔmmɔ ni, Israelƒuɔ bammɔ ƒui báta bási Sin ketele kemmo na bakɛ beelie taata aani kalɛ na Unwoti úbo-ma ɔda. Bátáda keliekɔ na Reƒidim, nsu ntu bɔni na bani buuubo mmɔ.

² Amu na bekyuli bammɔ bakya baadɔnku Mose banini, “Te-bu ntu na bɔni.” Mmɔ na Mose údie kenye ɔnini, “Bi ɔsu na bɛɛdɔnku-mi? Na bi ɔsu na bɛɛkɔ́ku Unwoti taanu?”

³ Nsu ka utukwɛ mɔɔda bekyuli bamɛni ɔsu ni, baadɔnku Mose banini, “Bi ɔsu na ákpanku-bu ásiku Egyipte na áya na utukwɛ ɔdubo abu ku bula bebi ku bebuo ƒui bɔdu?”

⁴ Ɔmɛni ɔsu Mose ɔ́kpali Unwoti momoomo na ɔ́su-nwu ɔnini, “Bi na ndubo bekyuli bamɛni bɔbla ɔƒɛni? Benye kagyumana ka bebo-mi atabi badu.”

⁵ Amu na Unwoti ɔ́su Mose ɔnini, “Tiku Israel batɔnkune bammɔ badi da na bisie lɛtɔtɔ blii. Na si bísela ni, na eti ƒula ugyii ɔdadi ɔni na éti áƒiɛmi Nil ntu anumi mmɔ ada.

⁶ Na ami Unwoti ndubunye-ɔ kudɔ na lɛtakpɛ lɛni nlɛ Horeb kɔbi lili mmɔ lɛlɔ. Na eti ugyii ɔmmɔ aƒiɛmi lɛtakpɛ lɛmmɔ, na ntu bɔdubɔlɛ bɔsiku-ni kemmo na bekyuli bammɔ bani.” Na Mose ɔ́bla kalɛ kani na Unwoti ɔ́tina-nwu na batɔnkune bammɔ anumi.

⁷ Anwuɔsu básia kesii kani na ntu bɔmmɔ bɔ́lɛ lɛnyi banii Masa, ɔni kalɔ ndi bɔkɔku taanu ku Meriba ɔni lɛnɔ kalɔ ndi Bɔdɔ, ɔsika mmɔ na Israelƒuɔ bammɔ bádɔ na bákɔku Unwoti bánu na béye banini, “Unwoti ɔkya-bu akɔ ɔƒɛni?”

Israelƒuɔ Békpoku Amalekƒuɔ

⁸ Amu na Amalekƒuɔ báta ka bébekpoku Israelƒuɔ na Reƒidim.

⁹ Amu na Mose ɔ́su Yosua ɔnini, “Tiku banana badi na bitékpoku Amalekƒuɔ. Ndubɔkɔ lisie nténye kɔbi kɔmmɔ lili kɔnaadi na liti Katɔti ugyii ɔdadi ɔmmɔ lɛda.”

¹⁰ Anwuɔsu Yosua ɔ́ta útékpoku Amalekƒuɔ bammɔ aani kalɛ na Mose úbo-nwu ɔda mmɔ. Na Mose ku Aaron ku Hur bákɔ bésie kɔbi lili.

¹¹ Na uwi ɔni ƒui na Mose enu aƒa katɔ mmɔ ni, Israelƒuɔ baadi kekpo kammɔ lɛlɔ. Nsu si ɔ́nya ɔ́yula enu kalɔ pɛ na Amalekƒuɔ bénwini baadi Israelƒuɔ lɛlɔ.

¹² Uwi ɔni na Mose enu aƒa katɔ laa na ɔ́ɔnɔ ni, Aaron ku Hur báwia lɛtabi lɛdi béte Mose na ɔ́sɔ úlie-ni lɛlɔ. Na unwi unye ɔƒɛnyi ɔmɛni na unwi lɛnɔ unye ɔƒɛnyi ɔngye. Na béƒie-nwu enu bada benye na aƒa katɔ laa úti útédu ka ɔƒɛ ɔ́nu.

¹³ Na ulu ɔmmɔ lɛlɔ na Yosua ɔ́sia na úti kewii ɔ́yila Amalekƒuɔ bekpone bammɔ ƒui.

¹⁴ Amu na Unwoti ɔ́su Mose ɔnini, “Nweni kekpo kamɛni lɛlɔ bɔdi etemila kya kakunkɛ kadi kemmo na aya na Yosua unu, na unwini enyimo na uteese, ɔsika ndubo Amalekƒuɔ ƒui udu bɔyila na kalɔ kamɛni lɛlɔ na ukyuli ɔdi ɔsɔ uleti-ma lɛlɔ kasusu.”

¹⁵ Mmɔ na Mose ɔ́tu lɛkpabi na ɔ́sia-ni lɛnyi ɔnii, “Unwoti mɔɔyá na mɔɔdi lɛlɔ.”

¹⁶ Na Mose údie kalɔ ɔnini, “Ɔsika Unwoti lɛlɔ na líti kama líkpo, nsu uwi ɔni mebo kemmo ni, Unwoti ɔdubukpoku Amalekƒuɔ ɔsia kama ɔ́si kaba úsie kaba.”