Israelƒuɔ Bɔlɛ 14 - Katɔti Ɔku Kedee

Israelƒuɔ Bávia Ɛpugyie

¹ Amu na Unwoti ɔ́su Mose ɔnini,

² “Kɔ lɛsa, na asu Israelƒuɔ na benwini kama beteesie batáwia keliekɔ na Pi-Hahirot, na Migdol ku Ɛpu ntɛ. Na basɔ bakya Ɛpu ɔmmɔ kudɔ, na Baal-Seƒon ɔƒɛnyi kakɛ.

³ Mmɔ ni, Ƒarao ɔdubuti kasusu ɔnini, ‘Ngyi ka Israelƒuɔ bétéƒu bakya ketele kammɔ kemmo baaví susuusu na balati bana kasiakɔ.’

⁴ Na ami Unwoti ndubɔya na Ƒarao kayi kayu ɔkplu, na lɛya na ɔbi ɔsiaku-ma. Na ndubɔdi Ƒarao ku nwuna bekpone lɛlɔ. Na mmɔ na Egyipteƒuɔ badubɔnu ka ami ndi Unwoti.” Na bábla básiaku lɛni kani.

⁵ Amu ka básu Ƒarao ka Israelƒuɔ békeli bátɔlɔ ni, anwu ku nwuna benengu bávumana kasusu na béye lɛlɔ banini, “Bi adɔlɔla adi na bɔ́bla mɛni? Bɔ́ya na Israelƒuɔ békeli bátɔlɔ. Na ɔma bene nsɔ ndubɔbla kabla bete-bu?”

⁶ Amu na Ƒarao úti nwuna bapɔnkɔ kɛɛkɛ na úbo nwuna bekpone ɔda ka baklibi lɛlɔ.

⁷ Amu na úti bapɔnkɔ kɛɛkɛ eti leevu-anyɔ (600) lɛni nkya-nwu kudɔ ku kɛɛkɛ lɛbambadi lɛni nkya Egyipte kalɔ lɛlɔ ku bana bekpone bani ngyi bukpo geen ɔ́da.

⁸ Na Unwoti ɔ́ya na Ƒarao kayi káyu ɔkplu na báta banii batábi basiaku Israelƒuɔ bani náta báyu ulu bésela ku kayi buse.

⁹ Na Egyipte bekpone ƒui ku bana bapɔnkɔ ku bana bapɔnkɔ kɛɛkɛ ƒui ku bana bakane báta na bábi básiaku Israelƒuɔ bamɛni. Na sɔsɔ ni, bátánu-ma na Ɛpugyie kudɔ na Pi-Hahirot, na Baal-Seƒon ɔƒɛnyi, ka bewi mmɔ.

¹⁰ Amu ka Israelƒuɔ bánu bémene ka Ƒarao ku nwuna bekpone basia-ma kama badubo ni, liƒu libendi lɛ́da-ma. Na bése kalɔ baava taakpali Unwoti ka ubebunku-ma.

¹¹ Amu na béye Mose banini, “Bɔkɛ na bɔɔɔdubo bɔkɛ kesii kani na bava-bu na Egyipte ɔsu na ákpanku-bu éboku ketele kemmo mɛni anii bubekpi?

¹² Bútasu-ɔ na Egyipte ƒui bɔnini, ‘Nyonu-bu kpoo na bunye butaabla kabla teete Egyipteƒuɔ’? Ɔdia-bu ka bunye butaabla kabla teete-ma utulo ka bubekpi na ketele kemmo mɛni!”

¹³ Amu na Mose ɔ́su Israelƒuɔ bammɔ ɔnini, “Liƒu litada-mii. Binye kpakplaa na bɛdubɔnu kalɛ na Unwoti ɔdubukpo ute-mii ɔmwi kadi. Na mɔɔsu-mii ka Egyipteƒuɔ bani na bɛɛnu ɔmwi mɛni ni, bɛsɔ bɛɛɛdubo-ma bɔnu kudii.

¹⁴ Unwoti ɔdubo bukpo bute-mii, amii ɔdi kani ndi ka binye kpoo bitaanu.”

¹⁵ Amu na Unwoti úye Mose ɔnini, “Bi ɔsu na bɛɛva taakpali-mi? Su Israelƒuɔ bammɔ na batɔ bana anumi.

¹⁶ Talaku ƒula ugyii ɔdadi ɔmmɔ katɔ na enene kɔnu atina Ɛpugyie ɔmmɔ na ntu bɔmmɔ bɔbwɛ kemmo inyɔ na Israelƒuɔ basia ɛpu ɔmmɔ kemmo balɛ kalɔ kakwiidi lɛlɔ.

¹⁷ Na ndubɔya na Egyipteƒuɔ bammɔ kayi kayu ɔkplu na basia-ma kama lɛni kani. Na ɔkɛnku Ƒarao ku nwuna bekpone bammɔ ku bapɔnkɔ kɛɛkɛ ku bapɔnkɔ beliene bammɔ ƒui lɛlɔ ɔsu na mina lɛnyi likeye.

¹⁸ Na si lɛ́di Ƒarao ku nwuna bapɔnkɔ kɛɛkɛ bakane ku bapɔnkɔ beliene bammɔ lɛlɔ lɛni na mina lɛnyi líkeye ni, na Egyipteƒuɔ banu bati ka ami ndi Unwoti.”

¹⁹ Amu na Katɔti ɔtu ɔni ntɔnku Israelƒuɔ únwini útákpɛ-ma kama. Na liƒlukutu lɛni ntɔ-ma anumi lɛnɔ línwini lítákpɛ-ma kama

²⁰ na lɛ́kya Egyipteƒuɔ bekpone ku Israelƒuɔ ntɛ. Na usien umodi ɔmmɔ ni, liƒlukutu lɛmmɔ lɛ́ya na lɛdisa líduo kakɛ kadi na kakɛ kadi lɛnɔ bukeye bɔkya mmɔ, na ɔdi utakana ɔkpanadi kudɔ bɔkpɛ bude usien ɔmmɔ ƒui kemmo.

²¹ Amu na Mose únene nwuna ugyii ɔdadi ɔmmɔ ɔ́tina Ɛpugyie ɔmmɔ, na Unwoti ɔ́ya na ɔƒɛƒɛɛ bonwu ɔdi úkpo ɔ́si ɔƒɛ katukɔ kakɛ na ɔƒɛƒɛɛ ɔmɛni údi ɛpu ntu bɔmɛni úsienku kama na ɔ́ya na kalɔ kakwiidi kálɛ. Ntu bɔmmɔ búle lɛlɔ kemmo inyɔ,

²² na Israelƒuɔ bésie bávia ɛpu ɔmmɔ kemmo kalɔ kakwiidi lɛlɔ. Na ntu bɔmmɔ bɔ́bla awodu bonwu bɔ́kya-ma kɔmii ku kɔdianu.

²³ Na Egyipteƒuɔ ku bana bapɔnkɔ ku bana bapɔnkɔ kɛɛkɛ ku bana bakane bábi básiaku-ma na béduo Ɛpugyie ɔmmɔ kemmo.

²⁴ Na asa kadi keteegye ni, Unwoti ɔ́nu Egyipteƒuɔ bekpone bamɛni úmene ɔ́siku nwuna lɛgyavonku ku liƒlukutu bonwu lɛmmɔ kemmo na ɔ́ya na béƒu bábla susuusu.

²⁵ Na ɔ́ya na bana bapɔnkɔ kɛɛkɛ lɛmmɔ lɛgba lɛ́ƒɛ na lɛsɔ liládia bɔni. Amu na Egyipteƒuɔ básu lɛlɔ banii, “Unwoti ɔkya uukpóku-bu teete Israelƒuɔ, anwuɔsu bɛya na bɔda-ma bɔnyonu na bɔtɔlɔ-ma kudɔ.”

²⁶ Amu na Unwoti ɔ́su Mose ɔnini, “Nene kɔnu tina ɛpu ɔmmɔ na ntu bɔmmɔ bɔbwɛ bubebi Egyipteƒuɔ ku bana kɛɛkɛ ku bana bakane ƒui lɛlɔ.”

²⁷ Anwuɔsu Mose únene nwuna kɔnu ɔ́tina ɛpu ɔmmɔ, na asa kadi keteegye ni, ntu bɔmmɔ bɔ́sɔ bɔ́sala lɛlɔ na bɔ́gbala Egyipteƒuɔ bammɔ ɔ́sɔku úwi ɛpu ɔmmɔ kemmo ina ka báyɔ ka nka bekeli.

²⁸ Na ntu bɔmmɔ bɔ́nyina Ƒarao bekpone bani nábi basiaku Israelƒuɔ bɔ́kya ɛpu ɔmmɔ kemmo ku bana kɛɛkɛ ku bana bakane, na ina unwi útakɛ ngba.

²⁹ Nsu Israelƒuɔ bésie bávi ɛpu ɔmmɔ kemmo kalɔ kakwiidi lɛlɔ, na ntu bɔmmɔ bunye aani awodu na bana kɔmii ku kɔdianu kakɛ ƒui.

³⁰ Na limeyi lɛmmɔ Unwoti úkpo ɔ́ƒɔ Israelƒuɔ ɔ́lɛku Egyipteƒuɔ enu kemmo. Na Israelƒuɔ bánu kalɛ Egyipteƒuɔ bamɛni békpi bewi ɛpu kɔtu.

³¹ Amu ka bánu kalɛ na Unwoti údie nwuna ɔyikun keyi na Egyipteƒuɔ bamɛni lɛlɔ ni, báyia Unwoti na báƒɔ anwu ku Mose nwuna kabla ɔblane bádi na béti bana anu básia-ma lɛlɔ.