Etemila 9 - Katɔti Ɔku Kedee

Kawɔlɔkɔ Kenwi Nse Nte Ala Ƒui

¹ Ka lɛ́bla kasusu lɛ́siku ala amɛni ƒui lɛlɔ ni, línu kalɔ ka Katɔti ubo ɔyikun na ukyuli biala lɛlɔ, ku abu bani náda anu na bɔsiaku-nwu kama siin lɛnɔ lɛlɔ. Lɛla biala udu lɛkana na lɛlɛku bula akɔ ɔdi biala. Na bulakana bɔti si ngba bɔdubɔtɛku-bu iye bɔdububieku-bu.

² Lɛlakpa linwi lɛmmɔ kani udu ndubo bɔlɛku bula ƒui na kawɔlɔkɔ. Bɔsiaku na bɔsiaku-nwu kama siin na bɔɔbu-nwu o-o, bɔbu na bulabu-nwu o-o ni, kawɔlɔkɔ kenwi kammɔ kani nse nte-bu. Akpala na bɔɔkyula teete-nwu o-o, bɔkyula na bulakyula adi teete-nwu o-o, si bɔɔdi bula linyese lɛlɔ o-o, buladi-ni lɛlɔ o-o ni, kawɔlɔkɔ kammɔ kani na kadi.

³ Nka ubo ɔkplu na ɔɔɔdia ka kɔnyana litemi lɛmɛni udu lɛlɛku bekyuli babuni ku bekpidi ɔsala. Bula ngba uliewi ƒui ni, bɔdi bekyuli bani na bɔ́sɔ na bɔ́dɔlɔ lɛnɔ. Ɔmɛni kemmo kani na bɔɔkya laa na buti bukpi.

⁴ Nsu si bulie ngba bɔdi ni, bɔdubo anumi butaanu ka lɛbuni lɛdi lɛdububo. Ɔsika si ina akpewe ɔni nkya ngba ɔdia utulo gyata ukpine!

⁵ Bayawine bagyi ka badubo bukpi nsu bekpine ama basɔ balasia lɛla lɛdi anu, ɔsika basɔ baaagyi lɛla lɛdi. Na basɔ beeebo lɛyuƒɔla lɛdi lɛnɔ. Na ukyuli ɔdi ɔsɔ ulényimo-ma muedi.

⁶ Bana bekyuli bɔyɔ ku bekyuli bukisi ku bana lɛnungyie ƒui ni, békpi bátɔlɔku-ni ɔni bana kɔnu kɔsɔ kulakya kayawi kamɛni lɛla lɛdi bɔbla kemmo.

⁷ Di adila na ani na akya lɛlɔ kubiti, ɔsika Katɔti nése ɔmɛni úse úte ukyuli ɔ́si kukuuku.

⁸ Tada lɛlɔ tese kalɛ kalɛ mmomu da lɛlɔ na egyeli lili na aklibi lɛlɔ kaduɛ.

⁹ Ngba bútene, na ka aayɔ́ ƒ'ulekudi ɔsu ni, bitesie bitaya lɛlɔ. Ɔmɛni na ɔ́lɛka bɛbla na uwi ɔni kemmo na bɛkya kayawi kamɛni kemmo biisusu lɛlɔ.

¹⁰ Kabla biala na ɔdi aabla ni, nye-ka lɛlɔ kpakplaa. Ɔsika uwi uletu asa na adubo-ka bɔda búwi na atɔlɔ etéduo kekpine, kesii kani na ukyuli ɔdi ɔsɔ ulabla kabla kadi iye ulie uteeti kasusu kadi iye ɔti lɛla lɛdi muedi.

¹¹ Lɛ́nu lɛla bamba lɛnɔ lɛ́ti na kayawi. Ɔɔɔdi bekyuli bani ngyi usi bukeli kaduɛ kani muukeli taadi lɛlɔ. Na ɔɔɔdi bekpone bani ngyi kekpo lɛlɔ ala kani muukpó taadi lɛlɔ. Lɛni kani na ɔɔɔdi banundane kani mɔɔkɛ́ adila abuni taadi. Na ɔɔɔdi bani kasusu kemmo nse nwaa kani muunwíni balakɛne iye bani ngyi bana kabla kadi lɛlɔ ala mɔɔƒɔ́ lɛnyi. Mmomu uwi ku lilidia kuƒi kubunku.

¹² Na lɛnɔ ni, ukyuli ɔdi ɔɔɔgyi uwi ɔni na nwuna uwi ɔdubo ubedu. Kalɛ na kabɛ keeduo agyakuo kemmo iye aasɛ ɔɔnú kamia ni, lɛni na uwi ukpidi uubo taabasiaku bekyuli aani kalɛ na baanú kakpagyuɛ.

¹³ Na kayawi mɛni ni, lɛ́nu lɛnunda udu bamba ɔdi lɛnɔ lɛ́ti ɔni néte-mi kasusu geen.

¹⁴ Úbebo úte uwi ɔdi kemmo, ka ɔma unengudi ɔdi na nkyuli ɛlɛɛ badi kani nkya-nwu kemmo ni, ɔga ɔdi ɔ́ta ka ubekpo ɔma ɔmmɔ. Anwuɔsu nwuna bekpone bábaka bámana-nwu na bábla kunyekɔ ƒui bése ku kɔbɛkɔ kunengudi kesii kani na badubunye na bekpo badi ɔma ɔmmɔ lɛlɔ.

¹⁵ Na ɔma ɔmmɔ kemmo ni, ɔwabane ɔdi ɔ́kya na ɔ́da anu geen. Na anwu náƒɔ ɔma ɔmmɔ úse na nwuna lɛnunda ɔsu. Nsu útaƒɔ uwi asa na báyiƒala ɔnana ɔmɛni.

¹⁶ Anwuɔsu lɛ́su nnini, “Lɛnunda lɛdia litulo ɔyikun.”

¹⁷ Banundane kabɛnsɛ kani baatɛmi ni, kadia kétulo badɔlɔdi batɔnkune kɔvanu.

¹⁸ Si ukyuli ubo lɛnunda ni, ɔdia utulo si ada ekpola. Nsu ukyuli ukpidi unwi ɔɔkana na ubile ala abuni pii.