Etemila 2 - Katɔti Ɔku Kedee

Kayawi Ablala Ásɔ Na Étedu Átawɔlɔ

¹ Lɛ́kali na lɛ́su lɛlɔ nnii ɔƒɛni amu mɔɔta lɛsia kayawi ebiti kama blii lɛnu. Na lɛwia kayawi kamɛni kemmo ngba ala abuni. Nsu ɔmmɔ lɛnɔ uuubo kalɔ budie bɔdi.

² Kaƒɛgya na kadi ka ukyuli elie ataama uwi ndi uwi. Lɛbuni lɛmani na ukyuli adubɔkɛ si enye aawia ebiti sɔɔn?

³ Lɛ́bla kasusu laa na lɛ́kali ka muuti ntɛ lɛkya lɛlɔ ebiti blii. Nsu na mina lɛnunda lɛni na ndanku ƒui ni, kɔdɔlɔ lɛlɔ na ńtálɛ. Na lɛ́kali ka mɔɔsia ulu ɔmɛni lɛlɔ na lɛti lɛbuni lɛni geen nse nte ukyuli, na uwi klukui ɔni na úbo kalɔ kamɛni kemmo bulie na nwuna ngba kemmo.

⁴ Lɛ́tu lɛtɔ bonwu líte lɛlɔ nnii mɔɔnu lɛlɔyɔ lɛni ndubɔkya-nwu kemmo ute-mi. Na líse adingyii mmo bɔbuni.

⁵ Na lɛ́bla kevoma mmo ku lɛlɔ ebiti kɔkyakɔ kɔbuni ku adingyii abuni lidu lidu.

⁶ Lɛ́tu ntu kewikɔ bonwu na ńtaaƒɔ ɔnantu ntu teewi edula mmo ku egyii bamba mmo bɔmmɔ na bɔ́lɛ lili kaduɛ.

⁷ Líye banana ku beleku kabla bablane, na báwɔ bebi bamba udu lɛnɔ bákya-mi kaduli. Na mbo bebuo pii geen, ntulo baga bani náka-mi bulie ƒui akɔ ɔdi biala na Yerusalem.

⁸ Na lɛ́ƒɔ sika ugyiedi ku ɔƒualadi pii lɛ́siku baga ku bana kɔlɛkɛ egulabi kɔvumi kemmo. Na lɛ́ƒɔ banana ku beleku lɛnu bediene babuni ɔkpa. Na mbo basɔnɔ pii bani mɔɔdia bɔnu geen. Na lɛla biala na lɛkana lɛda ɔnana ɔkwɛ ni, líse-mi.

⁹ Ɔmmɔ ɔsu lɛ́ƒɔ lɛnyi lítulo ɔga biala ɔni nélie Yerusalem ɔ́di lɛga asa na líbo. Nsu ala amɛni ƒui kemmo ni, mina anu ese nwaa kalɛ na lɛnu ala amɛni ƒui kemmo kavumana ku bɔdia ku tadia lɛti.

¹⁰ Lɛla biala mɔɔwia ni, kɔnu kani muunene liti-ni. Na ńteni mina ɔlɔna lɛla lɛni mɔɔda-nwu ɔkwɛ lɛdi. Nsu ka lɛ́sia anu lɛ́nu ala ani ƒui na líkpoku lɛlɔ nnii mɔɔwia-nya kalɔ linu mɛni ni, lɛ́nu ka ana ƒui eeebo-mi kalɔ budie bɔdi.

¹¹ Na lɛ́nu ka úlieku kalɛ na ukyuli ɔɔbi taasiaku ɔƒɛƒɛɛ ɔnii uuƒie-nwu. Na geen ni, lɛla lɛdi lɛɛɛdi lɛla geen lɛni nnye kaduɛ.

Kavumana Keeebo Lɛnunda Ku Kɔdɔlɔ Ntɛ

¹² Lɛ́bla kasusu ka liti lɛnunda ku kɔdɔlɔ lɛ́kɔku lɛlɔ, na mɔɔkali ka lɛla linwi pɛ kani na ukyuli biala ɔdubɔsu aani mina kalɛ.

¹³ Lɛnunda lɛ́ƒɔ kuye ƒui litulo kɔdɔlɔ kalɛ kani na bukeye bɔdia butulo lɛdisa.

¹⁴ Na ɔnundane ɔɔnu nwaa, nsu ɔdɔlɔdi anwu ɔɔnya-nwu taakya gyuma gyuma lɛnumbwɛ kemmo. Nsu lɛ́nu lɛ́ti ka banundane ku badɔlɔdi ƒui ni, kawɔlɔkɔ kenwi kani nse nte bana ƒui.

¹⁵ Bana inyɔ ƒui beekpi. Na kalɛ kani na ɔdɔlɔdi ɔdubo bukpi ni, lɛni na ami lɛnɔ ndubo bukpi. Na bi ndi mina lɛnunda kɔsia? Ɔmmɔ ɔsu na lɛ́su lɛlɔ nnini, “Ɔmɛni ƒui uuubo kalɔ budie bɔdi!”

¹⁶ Ɔsika ɔnundane o-o, ɔdɔlɔdi o-o ni, bana inyɔ ƒui beekpi na uwi ɔdubo na bekyuli badubo bana inyɔ ƒui bɔyiƒala.

Lɛlɔ Butu Buuubo Kalɔ Budie

¹⁷ Anwuɔsu muukisi ngba bumodi bɔmmɔ, ɔsika lɛlɔ lɛni na ukyuli uutú na ɔƒɛ kemmo bɔdi etila geen. Na ɔmɛni ƒui uuubo kalɔ budie. Mmomu use aani kalɛ na beekeli taasiaku ɔƒɛƒɛɛ.

¹⁸ Ala ani ƒui na lítu lɛlɔ na ɔƒɛ kemmo na lɛ́kɛ ni, álɛ-mi kayi na naaayɔ-nya, ɔsika ndubo-nya bɔda búwi ukyuli bamba ɔni masia-mi kama.

¹⁹ Na ɔma ngyi si ɔnundane na ukyuli ɔmmɔ wabla iye ɔdɔlɔdi? Nsu ala ani ƒui na lítu lɛlɔ ku mina lɛlati ku lɛnunda na lɛ́bla ku lɛbibo na ɔƒɛ kemmo ni, anwu ndubo-nya lɛlɔ ɔyikun bɔkɛ. Na uuubo kalɔ budie bɔdi.

²⁰ Ɔmɛni ɔsu na kayi kaakpulu-mi na mina lɛlɔtu ɔsu.

²¹ Bi ɔsu na nka ukyuli uti nwuna lɛlati ku lɛnunda ku ɔyikun ɔbla kabla na ɔnyonu nwuna lɛlakɛ lɛmmɔ use ukyuli bamba ɔni na útetu lɛlɔ lɛdi? Alánu ka uuubo kalɔ kadi?

²² Na bi kɔsia geen na ukyuli ubo na lɛbibo kanaa bɔmɛni kama.

²³ Uuubo bɔnwuna bɔdi limeyi kemmo. Nwuna emeyi ƒui adi lɛlɔ bususu ku ɔlɛ bunu na lɛlɔ lɛɛdu-nwu. Na si ɔtɛ usien lɛnɔ uláda kasusu buti taaya. Nsu ɔmɛni ƒui uuubo kalɔ budie bɔdi.

²⁴ Lɛla lɛni mɔɔnu ka ukyuli ɔkana bɔbla ndi ka unye nwuna kabla lɛlɔ, na ɔdi adila na ɔni na ɔkya lɛlɔ kubiti aani lɛla lɛni na Katɔti úte-bu.

²⁵ Ɔsika si anwu ulete-bu lɛla lɛdi ni, ɔma ndubɔkɛ adila ɔdi iye ɔkɛ lɛlɔyɔ?

²⁶ Ukyuli ɔni mɔɔbla Katɔti lɛƒɔyɔ ni, anwu na Katɔti ɔɔyá na ɔɔdá anu na uunú ala kalɔ na ɔɔyá na lɛlɔ lɛɛyɔ́ ukyuli ɔmmɔ. Nsu si bɔɔbla likpidi ni, bɔdubo lɛlɔ bususu geen bute bula lɛdila, nsu Katɔti ɔdubɔƒɔ bula akɛla ute ukyuli ɔni mɔɔbla-nwu lɛƒɔyɔ. Na nwuna kalɔ budie bɔbambadi bɔdi buuubo buuutulo ka ɔƒɛƒɛɛ kama bɔbi taasiaku kani na ɔdi.