Etemila 11 - Katɔti Ɔku Kedee

Kogyoklo Bɔbla Kɔdia

¹ Taabla lɛƒɔndia na adubɔkɛ ƒula lɛyuƒɔla limeyi lɛdi.

² Le lɛla lɛni na ákɛ te nkyuli maatɛ ku maane ƒaa, ɔsika aaagyi limeyi lɛni na ayaki adi adububo ebeyu-ɔ atu.

³ Si ɔnantu ava bonwu bonwu asia kayaa ni, aana ɔnantu. Na kesii biala na kugyii kɔ́ƒɛ kúsie ni, mmɔ kani na kɔɔtɛ.

⁴ Si áyia ɔƒɛƒɛɛ ɔni muukpó ni, alakana edula bɔkya, lɛni kani na si ánu ɔnantu ava na alakana edula bɔƒɛ.

⁵ Kalɛ na ukyuli ɔɔɔgyi kesii kani na ɔƒɛƒɛɛ uukpó teesie iye kalɛ na kaƒɔ keenwíni ubi na uleku kaƒɔ kemmo ni, lɛni kani na ukyuli ɔdi ulakana Katɔti kalɔ bunu kalɛ na ɔɔbla ala. Anwu nábla ala ƒui.

⁶ Nye kabla lɛlɔ kpakplaa na akya edula lɛdigye ku useyi uwi ka aaagyi ani geen ndubo bɔdia iye si ana ƒui madia.

⁷ Lɛla lɛdi liládia bɔnu teetulo ɔtanta ɔƒɛ ɔni nátu ɔdubo.

⁸ Ina dɛ na élie ábi lɛlɔ ni, ya na lɛlɔ lɛyɔ-ɔ na ƒula ngba emeyi ƒui kemmo. Ɔsika ɔƒɛ ɔdubo ubasa ɔkya-a na asɔ akya lɛdisa lɛmmɔ kemmo na uwi utu. Na kalɔ bunu bɔdi buuubo ɔmɛni kemmo.

Bɔlɛ Úte Bakloƒu

⁹ Lɛlɔ lɛyɔ-ɔ na ƒula lɛkloƒu uwi na enu ngba emini. Na teni lɛbuni biala na ánu iye ƒula kayi kaayɔ́ tete lɛlɔ. Nsu tayiƒala ka Katɔti ɔdubɔtɛku-ɔ litemi na lɛla biala lɛni na ábla lɛlɔ.

¹⁰ Taya na kasusu kekpoku-ɔ na ulu biala lɛlɔ na akya lɛlɔ ɔlɛ, ɔsika lɛkloƒu uwi ala abuni ammɔ adubo abavi ɔƒɛni kani.