Etemila 10 - Katɔti Ɔku Kedee

¹ Kalɛ na si balɔlɔ békpi bákya nnɔmii ƒɛƒɛɛ kemmo na ɔɔyá na nnɔmii bɔmmɔ ɔnyi ɔɔbla buɛ buɛ ni, lɛni na kɔdɔlɔ kɔɔyá na lɛnunda ku ɔbu ɔɔyii udu.

² Banundane kayi kaatɔnku-ma na baabla ala abuni. Lɛni kani na badɔlɔdi kayi kaatɔnku-ma na baabla likpidi.

³ Si ina ɔgbami na ɔdɔlɔdi ɔkɛ muedi ni, nwuna busie lɛti lɛti bɔɔtina-a kalɛ na ɔ́dɔlɔ.

⁴ Si ƒula ɔtɔnkune ɔ́kɛ kɔnyi ɔ́kya-a ni, teni ƒula kabla na ada-ka ewi. Ɔsika lɛlɔ kalɔ buboku buɛɛ uutile na uuboku kɔnyi ku ala pii kalɔ.

⁵ Lɛ́nu likpidi bamba bɔbla na kalɔ kamɛni lɛlɔ. Na batɔnkune bani mɔɔdi bekyuli lɛlɔ mɔɔbla likpidi lɛmɛni.

⁶ Na ama muuti badɔlɔdi teenyene kunyekɔ kɔni mbo ɔbu na balakɛne mmomu na beeboku kalɔ.

⁷ Lɛ́nu ka bekyuli bani nkya bekyuli kudɔ baabla-ma kabla mmomu nlie bapɔnkɔ kama na bagabi bakɛ lɛgba aani ama mmomu ndi kabla bablane.

⁸ Bekyuli bani muukú libu teese bana bakpana ni, ama alati mɔɔnú-ni kemmo. Lɛni kani na bekyuli bani mɔɔbwɛ kɔwodu taawia kasiakɔ ni, balakpi mɔɔdu-ma.

⁹ Ukyuli ɔni na atabi na aabwɛ ni, akana na aƒɔ ɔlɛ na ana bɔbwɛ kemmo. Na si egyii lɛnɔ na aabwɛ ni, ɔgbankpi ɔkana na ɔsiaku-ɔ.

¹⁰ Oloma ɔni neeebo ɔbi ni, amu ntu ébeyi ku ɔyikun momoomo. Nsu si agyi-nwu kemmo ni, adubɔbwɛ lɛla lɛni na aayɔ́ abwɛ.

¹¹ Si kɔlakpi kɔ́ɔdu ukyuli kɔ́wɔlɔ asa na ukyuli ɔni ngyi bɔkanti ɔnii ɔɔbala-ku bɔdu ni, kekeeke na ɔdi.

¹² Ɔnundane etemila ani mɔɔlɛ́-nwu kenye aatina lɛƒɔndia. Nsu ɔdɔlɔdi etemila mɔɔyila-nwu udu.

¹³ Badɔlɔdi balabla kasusu si baatɛmi. Na ɔmmɔ muuboku-ma ɔgbankpi na kawɔlɔkɔ.

¹⁴ Na badɔlɔdi bammɔ beemomo atɛ nsu bula ɔdi ɔɔɔgyi lɛla lɛni masia. Lɛni kani na bɔɔɔgyi lɛla lɛni ndubo kama.

¹⁵ Ɔdɔlɔdi kabla ni, lɛlɔ butu bukpludi na bɔdi, ɔsika ɔɔɔgyi ulu ɔni na ɔsia uduo ɔma.

¹⁶ Kalɔ kani ɔtɔnkune mɔɔbla anamula na bɔdi ku bɔni emeyi bɔdi kani na nwuna benengu belie bete ni, bɔbuɛ na beete kalɔ kammɔ.

¹⁷ Nsu kalɔ kani ɔtɔnkune ndi ukyuli ɔni náni ɔ́kɔ na nwuna benengu baládi taani kani ni, kalɔ kammɔ keesié anumi.

¹⁸ Kɔkɔsɔ kuutulo bekyuli geen ɔni na si ɔtɔ ɔni kemmo beli muedi uudú ni, balakana na betile liƒi lɛmmɔ. Na beenye taanu na ɔtɔ umodi ɔmmɔ ɔƒɛ uwi kalɔ.

¹⁹ Bɔdi ku bɔni bɔɔyá na lɛlɔ lɛɛyɔ́ ukyuli geen nsu egulabi mɔɔbla lɛla biala.

²⁰ Tabɛ takya ƒula ɔtɔ kemmo na ataalɔ ɔga iye ɔlakɛne ɔdi lɛnyi eteedumi na eteewida-nwu. Ɔƒɛni kalɛ aasɛ blii ɔdi úveyi ɔɔví eli na ɔdubuti-ɔ litemi utásu-ma.