Etemila 1 - Katɔti Ɔku Kedee

¹ Ala ɔtinane ɔni ndi Ɔga Dawid ubidi ɔni nádi lɛga na Yerusalem etemila ani na ɔ́su ndi ani na bɔdubo bunu mɛni.

Lɛla Biala Liiibo Na Ukyuli Adubɔkana-ni Kalɔ Budie Geen Bɔwɔlɔ

² Ala ɔtinane ɔmɛni ɔɔsu ɔnini, “Lɛla biala liiibo kalɔ budie geen bɔdi, mmomu ala ƒui ese-bu suu geen!”

³ Bi ndi ukyuli kɔsia na nwuna lɛbibo kanaa kama?

⁴ Kaba kaba béebo bátɔlɔ, nsu alanu lɛla lɛdi bɔvumana geen lɛni.

⁵ Ɔƒɛ ɔɔtu taatánu na ɔsɔ ɔɔsí taabatu lɛnɔ.

⁶ Na ɔƒɛƒɛɛ uukpó teesie katɔ ku kada ku ɔƒɛnyi ɔni ku ɔni, na ɔɔkya ligede teesie teebo nsu ulesie kesii kadi.

⁷ Ntukpa bɔɔgbá teetéduo ɛpu kemmo nsu ɛpu uleyi kudii. Ɔmmɔ kama ntu bɔmmɔ bɔsɔ buunwíni teesie taatágba taasi ntukpa bɔni kemmo na bɔ́si teebeduo ɛpu kemmo.

⁸ Lɛla biala ni, bɔnɔ ku lɛlɔ butu kani na bɔdi! Ina bi na bɔ́nu ni, uledu bula anumi ɔkwɛ. Na ina bi etemila na búnu lɛnɔ ni, bula atu eléyii na bɔnɔ bunu.

⁹ Ánu dii etemila ni, ala kama bɔsia kani na bɔdi. Ana ƒui áalɛ dii. Lɛla lɛwɔdi lɛdi liiibo ɔƒɛ kalɔ kesii kadi na lɛdi lɛla lɛni na lítebo tɔ kudii.

¹⁰ Lɛla lɛdi lɛkya na ukyuli ɔdi ɔdubɔkana na ɔsu ɔnini, “Bɛnu! Aanu lɛla lɛwɔdi mɛni?” Lɛkya ɔ́si kukuuku, na líitu uwi asa na bula uwi úbo.

¹¹ Bula ɔdi ɔsɔ ulenyimo kuuku uwi ala ani nébo ábavi. Lɛni kani na bula bawɔ bawɔ bani mebo dii limeyi lɛdi basɔ belenyimo bula ala ani na bɔ́bla.

Ukyuli Lɛnunda Lɛ́sɔ Na Lítedu Lítawɔlɔ

¹² Ami ndi ala ɔtinane ɔni nélie Yerusalem, na lɛ́di lɛga na Israel ƒui lɛlɔ.

¹³ Líti mina uwi líte ka lɛwia ala kalɔ linu na liti lɛnunda kemmo liduo ala ani mɔɔlɛ́ kayawi kamɛni kemmo ƒui lɛti. Ńtesie ɔgyu asa na lɛ́nu lɛ́ti ka bɔnɔ etila lɛka na Katɔti údi ɔ́sia bayawine kaba bekyuli ƒui lili.

¹⁴ Lɛla biala na lɛkya ɔƒɛ ɔmɛni kalɔ liiibo ukyuli kalɔ budie geen bɔdi. Buse na use aani kalɛ na ukyuli ɔɔbi taasiaku ɔƒɛƒɛɛ.

¹⁵ Lɛla lɛni na líbie ni, ukyuli ulakana-ni bɔklibi. Na lɛla lɛni na lɛ́yii lɛ́kya-nwu lɛnɔ ni, ɔsɔ ulanu-ni.

¹⁶ Lɛ́kali ala adi lɛ́nu na lɛ́su lɛlɔ nnini, “Nu, mbo lɛnunda ntulo ɔga bamba biala nélie Yerusalem asa na líbo. Lɛ́da anu na ngyi lɛla ntulo bana ƒui.

¹⁷ Ɔmmɔ ɔsu líkpoku lɛlɔ nnii muudie kavumana kani nkya lɛnunda ku kɔdɔlɔ ntɛ keyi. Nsu ɔƒɛni mɔɔnu taati ka ɔmmɔ lɛnɔ úlieku ka ɔƒɛƒɛɛ kani na lɛ́bi nsiaku.”

¹⁸ Ɔsika kalɛ mɔɔnu ka mina lɛnunda líisie ɔgyu ni, lɛni kani na mina bɔnɔ lɛnɔ bɔɔkɔ́ katɔ. Na si ukyuli ɔnii ɔ́da anu ni, kɔnyana ku lɛbibo mɔɔkɔ́ katɔ teebu.