Ester 8 - Katɔti Ɔku Kedee

¹ Limeyi lɛmmɔ kani ni, Ɔga Ahasweros úti Haman Yudaƒuɔ ukisine ɔmmɔ kaduli ku ala ani na nse-nwu ƒui úte ulekudi Beleku Ɔga Ester. Na ka Ester ɔ́su ɔga ɔmmɔ ka nwuna lɛlɔ ukyuli na Mordekai ɔdi ɔsu ni, ɔga ɔmmɔ úti-nwu ɔ́bla nwuna unengu na nwuna kaduli.

² Na ɔga ɔmmɔ údie nwuna kakwɛnimi kani na ɔ́ƒɔ ɔ́siku Haman kudɔ úte Mordekai. Ɔmmɔ kama ni, Ester úti Mordekai únyene Haman ala ƒui kenye.

³ Ester ɔ́sɔ úsie Ɔga Ahasweros kudɔ na ɔmmɔ kama, na útayu úwi-nwu lɛgba kalɔ ku keku na úvele-nwu ɔnini, “Buvele geen na nda-a mɔɔyɔ́ ka abla lɛla lɛdi asiku Haman, Ɔga Agag kaba kemmo ubi, ɔmmɔ kasusu kekpidi kani na úboku na Yudaƒuɔ kadi bekyuli lɛlɔ mmɔ lɛlɔ.”

⁴ Amu ka ɔga ɔmmɔ únene nwuna sika ugyiedi ɔgagyii ɔ́tina Ester ni, ɔ́ta úbenye-nwu anumi.

⁵ Na ɔ́su-nwu ɔnini, “Ɔga ɔbune, si ɔɔyɔ́-ɔ kaƒɔ na aayɔ́-mi geen na ánu lɛnɔ ka ɔdia ni, na ete kati kpakplaa na etile kenye kani na Hamedata ubidi Haman ɔni ndi Ɔga Agag kaba kemmo ubi ɔ́su ɔ́siku Yudaƒuɔ lɛlɔ mmɔ, kalɛ na basɔ baladi litemi lɛmmɔ lɛlɔ na badu-ma na kɔlɛkɛ kɔmmɔ ƒui kemmo.

⁶ Ɔsika lɛɛɛdubo bɔkana bulie bɔnu na ɔgbankpi bonwu ɔmɛni udu ubo mina kadi bekyuli lɛlɔ na bakyula-ma ƒui.”

⁷ Amu na Ɔga Ahasweros ɔ́su Beleku Ɔga Ester ku Mordekai ɔni nnye mmɔ ɔnini, “Kasusu kekpidi kani na Haman úti na Yudaƒuɔ lɛlɔ ɔsu na lɛ́ya na bákya-nwu ɔbuli limɔ na báƒala-nwu, na líti nwuna kaduli ku ala ƒui líte Beleku Ɔga Ester.

⁸ Anwuɔsu nweni lɛla lɛni na ánu ka lɛ́manku Yudaƒuɔ na etu ɔku ɔmmɔ kɔnu ku mina kakwɛnimi kani mɔɔtina ka ami ɔga nákya ɔku ɔmmɔ kɔnu. Na ukyuli biala ulakana lɛla lɛni na nkya ɔku ɔmmɔ kemmo bɔvumana.”

⁹ Kɔnakunwi ni, Mordekai ɔ́lɔ kalɔ kammɔ lɛku benwenine benengu úboku na bénweni lɛku lɛmmɔ na kɔbuli kɔtɛdi kɔni na baalɔ Sivan limeyi aavlanyɔ lɛtɛdi lɛlɔ. Lɛku benwenine bammɔ bádi Mordekai litemi lɛlɔ na bénweni lɛku lɛmmɔ béte Yudaƒuɔ ku lɛlɔ badine ku aban bagadine benengu bammɔ ƒui na kɔlɛkɛ eti anyɔ ku aavlanyɔ maatɛ kɔmmɔ ƒui lɛlɔ ɔ́si India útédu Etiopia. Na ɔ́ya na bénweni lɛku lɛmmɔ na kɔlɛkɛ kɔmmɔ ƒui adi butemi ku bunweni kemmo.

¹⁰ Mordekai ɔ́ya na bénweni lɛku lɛmmɔ na Ɔga Ahasweros lɛnyi kemmo, na bétu ɔku ɔmmɔ ku nwuna kakwɛnimi. Na batu bani ngyi kalɛ na beelie bapɔnkɔ bani na bátumini béte ɔga, na beekeli usi momoomo geen na ɔ́ya na béti lɛku lɛmmɔ bésienku kɔlɛkɛ kɔmmɔ ƒui.

¹¹ Na ɔku ɔni na bénweni mɛni uute Yudaƒuɔ ƒui kuƒi ku ɔyikun ka bekpo kadi biala bekyuli mata banii beekpó ama Yudaƒuɔ na kɔlɛkɛ kɔmmɔ ƒui kemmo, na bakyula kadi kammɔ bekyuli, na bayila-ma udu ku bana bebi ku beleku ƒui.

¹² Na limeyi lɛni na bálɛ ugyii bése ka babla lɛla lɛmɛni ndi kɔbuli kɔtɛdi limeyi leevu-lɛtɛdi lɛlɔ.

¹³ Na ɔlɛka bete bɔti aani lɛla lɛni na bényimi na kɔlɛkɛ kɔmmɔ ƒui kemmo, na kadi biala bekyuli benu kalɛ na Yudaƒuɔ baklibi lɛlɔ bese bete lɛla lɛmɛni, na benye kagyumana bete lɛlɔ na bana bekisine ɔsu.

¹⁴ Batu bani béte ɔga bapɔnkɔ bani muukeli usi mmɔ, békeli momoomo bátɔlɔ ku lɛku lɛmmɔ ka ɔga údie lɛdi. Na Susa ɔma unengudi ɔmmɔ kemmo lɛnɔ béte bɔti bɔmmɔ.

¹⁵ Ɔmmɔ kama ni, Mordekai ɔ́da lɛlɔ na ɔ́vi ɔ́lɛ ɔ́si ɔga kesii mmɔ. Na ɔda agala ani ndi lɛwu lɛƒualadi ku ligyiedi, na ubi sika ugyiedi kagabwa lili na ɔkya awu ɔbunidi ɔni náƒɔ kuye geen. Na kudu kúwi na Susa ɔma unengudi ɔmmɔ ƒui kemmo.

¹⁶ Na kenye kani na Yudaƒuɔ bénu mmɔ únwini-ma lɛlɔyɔ ku ebiti geen aani si lɛlɔ na báadi muedi.

¹⁷ Na geen geen na kɔlɛkɛ kɔmmɔ lɛma linengudi ƒui kemmo ni, Yudaƒuɔ badi limeyi ku ebiti geen na kadi bamba bekyuli badi muedi béti lɛlɔ bénwini Yudaƒuɔ, ɔsika baayia-ma geen.