Ester 7 - Katɔti Ɔku Kedee

¹ Amu na ɔga ɔmmɔ ku Haman bésie na bátádi ku Beleku Ɔga Ester.

² Na ka basɔ badaku ntɛ bɔni kunyɔdi ni, ɔga ɔmmɔ ɔ́sɔ úye Uleku Ɔga Ester ɔnini, “Bi na aawia ka lɛbla lite-ɔ. Su-mi na ndubute-ɔ útédu mina lɛga kadikɔ kakɛ kenwi muedi ƒaa.”

³ Mmɔ na ulekudi beleku ɔga údie kenye ɔnini, “Mina ɔbune, si ɔ́yɔ-ɔ kaƒɔ ƒaa ka abla lɛla lɛni na muuvele-ɔ ku lɛlɔ kalɔ buboku ete-mi ni, na anu-mi kɔnyana kalɛ na baládu-mi ku mina kadi bekyuli lɛnɔ.

⁴ Ɔsika béti ami ku mina kadi bekyuli ƒui béye kalɛ na badu-bu na bayila-bu udu ƒui kede kede. Na si nka buye na banii beeti-bu beye na bunwini kabla bablane kani ni, nka lɛɛɛdubo nnii mbete-ɔ lɛƒɛda lɛdi, ɔsika ɔmmɔ lɛti uláya na mbada lɛlɛ awɔ mina ɔga anumi.”

⁵ Kɔnakunwi ni, Ɔga Ahasweros úye Beleku Ɔga Ester ɔnini, “Ɔma nábla ɔtɔtɔ ɔmmɔ udu? Ntele ukyuli ɔmmɔ?”

⁶ Amu na Ester údie kenye ɔnini, “Ukisine ukpidi kati kati ɔmmɔ ndi Haman ɔni nli-ɔ kudɔ mɛni.” Mmɔ kani na liƒu bonwu líƒie Haman na Ɔga Ahasweros ku Beleku Ɔga Ester anumi mmɔ.

⁷ Mmɔ mmɔ ni, ɔga ɔ́ta nwuna keliekɔ ku kɔnyi na ɔ́tɔlɔ úsie nwuna kevoma kemo kani nkya kaduli mmɔ. Nsu ka Haman ɔ́nu ɔ́ti ka ɔga ɔ́ɔbla nwuna kasusu na lɛla lɛni na ɔdubo-nwu bɔbla lɛlɔ ɔsu ni, ɔ́ƒɔ lɛlɔ ulie kama ɔnii uukpi Uleku Ɔga Ester kɔtɔ kalɛ na ɔga uládu-nwu.

⁸ Na ɔni kani na Haman ɔɔyu ɔɔlɛ akɔnkɔ na liboku lɛni kemmo na beleku ɔga ɔmmɔ ukpo kudɔ kani na Ɔga Ahasweros ɔ́si úbeduo. Mmɔ kani na ɔga ɔmmɔ ɔ́va ku lɛdi momoomo ɔnini, “Buƒie muedi na asɔ adubo mina uleku buƒie na mina anumi mɛni na ami ɔlati kaduli?” Ɔga ɔmmɔ útawɔlɔ tɔ kenye kammɔ bɔsu asa na nwuna beleku lɛlɔ banune báka bámana Haman, na béti ala bébi-nwu lili.

⁹ Amu na Habona bana akɔ unwi úye ɔga ɔnini, “Atabi akpa ku ɔta kangyaa ɔdi unye Haman ɔmɛni kaduli na anwu kani nátu-nwu únyene mmɔ úte ka badu Mordekai ɔni nédie awɔ bula ɔga ngba na ɔgbankpi kemmo.”

¹⁰ Mmɔ kani na ɔga ɔmmɔ údie lɛdi úte-ma ɔnini, “Bɛgyunku-nwu na bitákya-nwu ɔbuli limɔ bɛƒala mmɔ!” Anwuɔsu béti-nwu na bátaƒala-nwu na anwu ɔlati ugyii lɛlɔ. Na ɔga ɔmmɔ kɔnyi kɔ́yɔ-nwu na kaƒɔ lɛnɔ kába-nwu.