Ester 4 - Katɔti Ɔku Kedee

¹ Ka Mordekai únu ɔku ɔmmɔ kenye ni, ɔ́ni nwuna awu ɔni na ɔkya ɔ́bwɛ, na úti adikpi ɔ́sabla, na ɔ́kpi ntɔ anumi, na ɔkɛ uuwulo momoomo taavi na Susa ɔma ɔmmɔ ƒui kemmo.

² Nsu útakana ɔga kesii buduo, ɔsika kuƒi kuuubo ka adala ammɔ udu eduoku mmɔ. Anwuɔsu kayakun kenye kani na ɔ́wɔ.

³ Na kalɛkɛ biala lɛlɔ na báka ɔku ɔmmɔ ni, Yudaƒuɔ bani nkya mmɔ keku kani na beewulo na baaƒɛ́ enu, na badi béti adikpi bényimi na báyu béwi ntɔ akɔ.

⁴ Uwi ɔni na Ester kabla bablane belekubi ku ɔga kabla ɔblane ɔni mɔɔnu Ester lɛlɔ básu-nwu kalɛ na Mordekai ɔɔbla ni, kayi kákpulu Ester, na lɛla lɛmmɔ líkpoku-nwu geen. Anwuɔsu ɔ́wia adala adi úte ɔnii besienku-nwu na ɔda, na ɔɔɔdi ammɔ udu kemmo na ɔlɛka ɔkya. Nsu Mordekai úni ɔnii uláƒɔ-nya.

⁵ Amu na Ester ɔ́lɔ Hatak ɔga beleku lɛlɔ banune akɔ unwi ɔni mɔɔnu-nwu lɛlɔ ɔnii usie na utéye unu lɛla lɛni geen mɔɔbla Mordekai, na ubasu-nwu.

⁶ Hatak úsie útásiaku Mordekai na ɔma kemmo kaduli kani nwi ɔga kesii anumi mmɔ.

⁷ Mmɔ na Mordekai ɔ́sɔku ɔ́su-nwu lɛla lɛni mɔɔlɛ́ ku kayu kani na Haman ɔnii ɔdubɔƒɔ akya ɔga kavumi kemmo si bákana na bádu Yudaƒuɔ ƒui bédie.

⁸ Mordekai údie ɔku ɔni na bénweni banii badu Yudaƒuɔ mmɔ ɔdi úte Hatak ɔnii uti usienku Ester, na udie lɛla biala kalɔ ute-nwu na ɔkya ɔkplu na usie ɔga anumi, na utévele na ama Yudaƒuɔ lili.

⁹ Anwuɔsu Hatak únwini úsie na útásu Ester lɛla lɛni na Mordekai ɔ́su-nwu.

¹⁰ Mmɔ na anwu lɛnɔ ɔ́sɔku-nwu ɔ́tala ɔnii utásu Mordekai ɔnini,

¹¹ “Ɔga benengu bammɔ ƒui ku bagadine bani na bakya kɔlɛkɛ kɔmmɔ lɛlɔ ƒui bagyi ka ukyuli ɔni na adubɔda bɔlɛ-nwu lɛlɔ na ɔɔɔdi anwu násu ɔnii balɔ-ɔ beboku ni, ɔnana na adi o-o uleku na adi o-o ni, bɔdu na badubo-ɔ. Na si kuli kɔ́dia-a na úti nwuna sika ugyiedi ɔgagyii ɔ́kywɛ-ɔ ni, na anwu na adubulie ngba. Ɔƒɛni ni, ɔ́ɔbla aani emeyi avlaatɛ mɛni ka bálɔ-mi na lísie-nwu kudɔ.”

¹² Ka Mordekai únu Ester kenye kamɛni ni,

¹³ ɔ́sɔku ɔtu ɔmmɔ kani ɔ́kya Ester ɔnini, “Takali anii ka akya ɔga kesii ɔsu ni, baaadubo awɔ lɛla lɛdi bɔbla na awɔ kani ndubɔlɛ ɔgbankpi ɔmɛni kemmo.

¹⁴ Na si átakana na abla lɛla lɛdi na uwi ɔmɛni udu kemmo ni, kebunku kadubɔsi kesii bamba kudɔ kete Yudaƒuɔ bammɔ ƒui na bakɛ bɔƒɔ, nsu awɔ ku ƒula bati ku bina ɔtɔ kemmo bɛdubo udu bɔyii ƒui. Ɔma ngyi lɛla lɛni ɔsu na ákɛ kuƒi ka éduo likpo lɛmɛni udu uwi ɔmɛni kemmo?”

¹⁵ Amu na Ester údie kenye ɔnii batásu Mordekai ɔnini,

¹⁶ “Sala Yudaƒuɔ bani ƒui nkya Susa ɔma kemmo lisu, na binyimi kenye emeyi atɛ usien ku ɔƒɛ na ami ɔsu, na ɔdi utadi lɛla lɛdi. Ami ku mina beleku kabla bablane bani mɔɔnu-mi lɛlɔ lɛnɔ bɔdubɔbla lɛni kani. Na si bɔ́wɔlɔ ɔmɛni ni, ndubusie ɔga kudɔ ina ka kuƒi kuuubo lɛni. Na si kukpi na ɔdi ka likpi lɛnɔ ni, na likpi ƒaa.”

¹⁷ Mordekai lɛnɔ úsie na útábla lɛni kani sɔsɔ.