Ester 2 - Katɔti Ɔku Kedee

¹ Kama ni, kɔnyi kúbayɔ Ɔga Ahasweros, nsu ɔ́mu ɔkya ɔɔbla kasusu na Beleku Ɔga Wasti lɛla lɛni na ɔ́bla mmɔ lɛlɔ. Na ɔ́kali lɛla lɛni na ɔ́ya na bákɔ lɛsa bávi na kɔlɛkɛ kɔmmɔ ƒui kemmo lɛlɔ ɔkɛnku anwu ɔsu.

² Mmɔ na kabla bablane bani nkya Ɔga Ahasweros kaduli geen básu-nwu banini, “Ɔga ɔbune, ya na ƒula benengu basia kɔlɛkɛ kɔmmɔ ƒui anu na baƒuna beleku babuni bani mɔɔdia bɔnu geen bete-ɔ.

³ Akana na edie batɔnkune na kalɛkɛ biala kemmo na bakpanku beleku bammɔ beboku Hegai ƒula kabla ɔblane ɔni mɔɔnu ƒula beleku lɛlɔ teete-ɔ mmɔ, na basɔ bakya kesii kani na ƒula beleku baakya na Susa ɔma unengudi ɔmmɔ kemmo. Anwu ndubɔnu ka báklibi-ma kaduɛ na bákya-ma akya kalɛ na bataadia bɔnu geen ka ɔmmɔ kabla na ɔɔbla ɔsu.

⁴ Na awɔ ɔlati aƒuna bana akɔ ugblebi ɔni na aayɔ́, na eti-nwu abla beleku ɔga na Wasti kenye.” Na kenye kamɛni káda-nwu ebiti geen sɔsɔ.

⁵ Na Susa ɔma unengudi kemmo na ɔga kesii mmɔ ni, Yudani ɔdi baalɔ banii Mordekai ɔ́kya. Na ɔti baalɔ Yairo, na Yairo ɔti baalɔ Simei, na Simei ɔti baalɔ Kis, na ɔ́si Benyamin kɔdua kemmo.

⁶ Mordekai ɔmɛni lɛnɔ ubunku bekyuli bani na Ɔga Nebukadnesar úƒie ɔ́tɔlɔku Yerusalem úsienku Babilon uwi ɔni na úƒie Yudaƒuɔ Ɔga Yekonia.

⁷ Na Mordekai ubo ɔnwani ulekubi ɔni mɔɔdia bɔnu geen ɔdi na baalɔ-nwu Hadasa, na nwuna lɛnyi linyɔdi baalɔ Ester. Ulekubi ɔmɛni ɔdi Mordekai uni ɔnwani ɔnana ubidi, nsu anwu nánu-nwu lɛlɔ, ɔsika ulekubi ɔmmɔ bawɔne béyile bukpi, anwuɔsu únwini aani ubidi.

⁸ Uwi ɔni na Ɔga Ahasweros úte bɔti ka bavi baƒuna belekubi bani mɔɔdia bɔnu geen bésienku Susa ni, na Ester lɛnɔ ɔ́kya-ma akɔ. Na béti-nwu bésienku ɔga kesii na Hegai ɔɔnu-ma lɛlɔ na beleku kakyakɔ kammɔ.

⁹ Na ɔ́si limeyi lideedi lɛmmɔ lɛlɔ kani na Ester ala éƒie Hegai kayi, ɔsu úse kalɔ ɔɔklibi-nwu kɔnakunwi na ɔɔkya-nwu akya ani udu naaabɔ. Uute-nwu adila abuni geen na ɔɔdi, na Hegai ɔ́wia belekubi kabla bablane maatɛ úte-nwu, na úte-ma lɛtɔ lɛni mɔɔdia bɔnu teetulo ƒui na ɔga kesii mmɔ na bakya.

¹⁰ Nsu Mordekai ɔ́ɔgyu ɔ́tɔ na ɔ́su Ester ɔnii utaya na bati banii Yudani na ɔdi kudi kudii. Na anwu lɛnɔ únu úte-nwu.

¹¹ Mordekai ɔɔyɔ́ ɔti lɛla lɛni mɔɔlɛ́ku ubidi Ester ɔsu ni, limeyi ndi limeyi uusié taasɔ na beleku bammɔ kakyakɔ anumi mmɔ na ɔɔwia unu lɛla lɛni nsɔ ndubo bɔlɛ.

¹² Lɛkwa limodi na beeti taaklibi beleku bammɔ asa na bada balɛ ɔga anumi ɔdi biala ku ƒula limeyi. Na abuli aku edeedi ni, nnɔmii bɔni mɔɔbla lɛlɔ suɛlɛ suɛlɛ na baalɔ-mu mira, na baawɛɛ-ma. Na abuli aku ani nsɔ nsia na bawɛɛ-ma ugyulo ƒɛƒɛɛ lidu lidu.

¹³ Si limeyi lɛni na údu ka uleku ɔdi usie ɔga kudɔ na nwuna kesii mmɔ ni, anwu ɔlati mɔɔsu lɛla lɛni na ɔɔyɔ́ ka uti ɔda asa na usie na badubuti-ni bete-nwu.

¹⁴ Useyi uwi na uleku ɔni na ƒula uwi údu ka esie ɔga kudɔ ésela na atákya mmɔ útálɛ kadi bugye ɔtanta. Na si ási mmɔ ni, badubɔkpanku-ɔ besienku ɔga basɔnɔ lɛlɔ ɔnune ɔni baalɔ Sasgas na atákya basɔnɔ bammɔ kakyakɔ mmɔ na aka kese bun. Na si ƒula lɛlɔ lɛ́da ɔga ebiti ni, anwu na ɔdubɔya na basɔ baalɔ-ɔ bete-nwu.

¹⁵ Ka uwi údu ka Ester ɔni na ɔdi Mordekai uni ɔnwani ɔnana Abihail ubidi usie ɔga kudɔ ni, úteye lɛla bamba lɛdi biala útetulo lɛla lɛni na nwuna lɛlɔ ɔnune Hegai ɔsu ɔnii uti. Na Ester ɔ́da ukyuli biala kayi sɔsɔ.

¹⁶ Anwuɔsu na Yudaƒuɔ abuli bɔka kɔbuli leevudi kɔni baalɔ Tebet na Ɔga Ahasweros lɛga bɔdi lɛkwa maatɛdi kemmo ni, bákpanku Ester béboku-nwu.

¹⁷ Ka Ahasweros ɔ́nu Ester ni, ɔ́da-nwu kayi geen útulo beleku bammɔ ƒui na nwuna kayi kásia-nwu lɛlɔ kɔnakunwi útulo begblebi bakladi ƒui. Anwuɔsu úti kagabwa kammɔ úbi-nwu lili na ɔ́bla-nwu beleku ɔga na Wasti kenye.

¹⁸ Ɔmmɔ kama ni, Ɔga Ahasweros ɔ́lɔ nwuna benengu ku lɛku batine ɔ́siku kɔlɛkɛ kɔmmɔ ƒui kemmo úboku limeyi bonwu lɛdi kadikɔ úti ɔ́kya Ester ebiti, na úte bekyuli ala geen, na ɔ́su lɛnɔ ka ɔdi utabla kabla kadi limeyi lɛmmɔ.

¹⁹ Na begblebi bammɔ bɔsɔ bɔsa kunyɔdi ni, na Mordekai ɔkya ɔga kabla bablane benengu akɔ na uunye ɔga kesii ɔban kayakun.

²⁰ Na uwi ɔmmɔ ƒui ni, Ester útaya na ɔdi ɔti kesii kani na ɔ́si aani kalɛ na Mordekai ɔ́su-nwu kalɛ. Ɔsika ɔ́mu uunú-nwu litemi aani kalɛ kani na útaabla ɔ́si lɛnamu uwi.

²¹ Nkyuli inyɔ badi na baalɔ Bigtana ku Teres lɛnɔ bátaabla ɔga kabla na ama mɔɔgyumana ɔga kayakun. Nsu nkyuli inyɔ bamɛni bébeti kasusu kekpidi kadi na Ɔga Ahasweros lɛlɔ ka badu-nwu.

²² Na Mordekai úbanu ɔmɛni ɔ́ti, na ɔ́su Beleku Ɔga Ester ɔnii ɔya na ɔga ɔti.

²³ Ka báwia litemi lɛmmɔ kalɔ laa na bánu ka sɔsɔ na ɔdi ni, ɔga ɔ́ya na bátákya-ma abuli limɔ báƒala akpa lɛlɔ na békpi. Na ɔga ɔ́ya na bénweni ala ani nálɛ ƒui bákya nwuna ɔku ɔni kemmo na baakya ala alɛdi kemmo bése.