Esra 8 - Katɔti Ɔku Kedee

Ɔtɔ Benengu Bamɛni Básiaku Esra

¹ Bekyuli bani anyi ndubo mɛni ndi lɛtɔ benengu bani anyi na bénweni bébunku bani ƒui násiaku Esra bási Babilon bénwini bébo Yerusalem na Ɔga Artasasta lɛga bɔdi uwi.

² Pinehas kaba ni, Gersom, Itamar kaba ni, Daniel, Dawid kaba ni, Hatus,

³ na ɔ́si Sekania kaba kemmo. Paros kaba ni, Sakaria, na bana banana bumomo bɔdi 150.

⁴ Pahat-Moab kaba ni, Serahia ubidi Eliehoenai, na bana banana 200 nsiaku-nwu.

⁵ Na Sekania kaba ni, Yahasiel ubidi, na bana banana 300 nsiaku-nwu.

⁶ Na Adin kaba ni, Yonatan ubidi Ebed, na bana banana 50 nsiaku-nwu.

⁷ Na Elam kaba ni, Atalia ubidi Yesaia, na banana 70 nsiaku-nwu.

⁸ Na Seƒatia kaba ni, Mikael ubidi Sebadia, na banana 80 nsiaku-nwu.

⁹ Na Yoab kaba ni, Yehiel ubidi Obadia, na bana banana 218 nsiaku-nwu.

¹⁰ Na Bani kaba ni, Yosiƒia ubidi Selomit na bana banana 160 nsiaku-nwu.

¹¹ Na Bebai kaba ni, Bebai ubidi Sakaria, na bana banana 28 nsiaku-nwu.

¹² Na Asgad kaba ni, Hakatan ubidi Yahona, na banana 110 nsiaku-nwu.

¹³ Na Adonikam kaba kekplodi ni, bana anyii mɛni, Eliƒelet ku Yeiel ku Semaia, na bana banana 60 nsiaku-ma.

¹⁴ Na Bigwai kaba ni, Utai ku Sabud, na bana banana 70 nsiaku-ma.

Kalɛ Na Bénwini Bésie Yerusalem

¹⁵ Amu na ami Esra lɛ́ya na bekyuli bani ƒui nsiaku-mi mmɔ bédi bénye ketu kani mɔɔgbá taavi Ahawa ɔma kemmo mmɔ. Na bɔ́kya mmɔ emeyi atɛ sɔɔn. Na mmɔ na lɛ́nu ka bakpane bakya bekyuli bammɔ akɔ. Nsu Lewiƒuɔ beeebo-ma kemmo.

¹⁶ Amu na lɛ́tala na bátálɔ batɔnkune bani ndi Elieser ku Ariel ku Semaia ku Elnatan ku Yarib ku Elnatan ku Natan ku Sakaria ku Mesulam ku ala batinane inyɔ bani ndi Yoiarib ku Elnatan béboku-mi.

¹⁷ Na lɛ́tala-ma lɛ́kya Ido ɔni ndi Kasiƒia ɔtɔnkune kudɔ. Na lɛ́su-ma lɛla lɛni na badubusie batásu Ido ku nwuna banwani ku kakpakɔ kabla bablane bani nkya Kasiƒia ɔma kemmo mmɔ kalɛ na bawia bekyuli badi bemene-bu na bababla kabla na Katɔti kakpakɔ kammɔ lɛlɔ.

¹⁸ Na ka bula Katɔti kɔnu kɔsia-bu lɛlɔ ɔsu ni, bákpanku ɔbune Serebia ɔni na ɔ́si Lewi ubidi Mahli ɔni ɔti ndi Israel kaba kemmo ku nwuna banwani ku nwuna bebi leevu-maane béboku.

¹⁹ Na Hasabia ku Yesaia bani nási Merari kaba kemmo ku bana badi aavlanyɔ lɛnɔ básiaku-ma bébo.

²⁰ Na úbunku bammɔ ni, bekyuli bani na Dawid ku nwuna benengu bédie bése ka bataabla kakpakɔ kammɔ kabla teebunku Lewiƒuɔ na bana bumomo bɔdi 220 ni, bákpanku ama lɛnɔ béboku. Na bénweni bana ƒui anyi bákya ɔku kemmo.

²¹ Amu uwi ɔni na búdu Ahawa Ketu kudɔ ni, mmɔ na líbo ɔda na ɔ́ya na búnyimi kenye kalɛ na buboku lɛlɔ kalɔ na Katɔti anumi na buvele-nwu ka ɔgyumana abu ku bula bebi ku bula ala ani ƒui na bɔdanku kalɛ na bula ulu busie bɔbla buɛɛ.

²² Kɔƒa kuukpó-mi ka lɛsu ɔga ɔmmɔ na ute-mi bekpone ku bapɔnkɔ beliene na bagyumana-bu balɛku bula bekisine enu kemmo, ɔsika lɛ́su ɔga ɔmmɔ nnini, “Bula Katɔti kɔnyana bɔnu ɔdanku ukyuli biala ɔni mɔɔsia-nwu anu. Na nwuna kɔnyi kɔɔsiaku ukyuli biala menwini kama makya-nwu.”

²³ Anwuɔsu búnyimi kenye na búti etemila ammɔ bɔ́va Katɔti anumi na únu bula bɔkpali.

²⁴ Amu na lídie bakpane benengu leevu-inyɔ na Serebia ku Hasabia bebunku-ma ku bana banwani leevu líbunku-ma lɛlɔ.

²⁵ Na lɛ́kɔku sika ugyiedi ku ɔƒualadi ku akyami ani na ɔga ku nwuna kasusu bakyane ku benengu bamba ku Israelƒuɔ ƒui béyi ka béti bebunku Katɔti kakpakɔ kammɔ kabla. Na líti-nya líte bakpane bammɔ.

²⁶ Na ala ani na líti líte-ma ndi sika ɔƒualadi ebi antabi aƒo bonwu 250 unu ku sika ɔƒualadi ala kɔlɛmii antabi aƒo avlaatɛ unu.

²⁷ Na líte-ma sika ugyiedi antabi akyami bonwu aavlanyɔ ani kuye ndubɔbla sika ugyiedi ebi apim unwi.

²⁸ Amu na lɛ́su-ma nnii, “Amii ku sika ugyiedi ku ɔƒualadi ɔmmɔ ƒui ni, bɛdi ala ani bédie bese sɛsɛɛ béte Unwoti. Na sika ɔƒualadi ku ugyiedi ɔmmɔ ni, adi kaƒɔ ƒaa etela akpala ete Katɔti ɔni ndi bina bati kuuku Katɔti.

²⁹ Bɛgyumana ala ammɔ kaduɛ utédu ka bɛ́kɔku-nya na Unwoti kaduli kani nkya Yerusalem. Na bakpane benengu ku Lewiƒuɔ ku Israelƒuɔ lɛtɔ benengu bammɔ anumi.”

³⁰ Mmɔ ni, bakpane ku Lewiƒuɔ bammɔ báƒɔ sika ugyiedi ku ɔƒualadi ɔni bákɔku bánu mmɔ ku ala akladi ani na ɔdi ka beti besienku Katɔti Kaduli na Yerusalem mmɔ.

³¹ Na limeyi leevu-linyɔdi na kɔbuli kudeedi kemmo ni, bɔ́ta bɔ́si Ahawa Ketudɔ na búti anumi bɔ́tina Yerusalem na Katɔti ɔdanku-bu. Na ɔ́gyumana-bu ɔ́lɛku bula bekisine ƒui enu kemmo na ulu lɛlɔ.

³² Ɔmmɔ ɔsu bútéduo Yerusalem na bɔ́nwuna emeyi atɛ na mmɔ.

³³ Na limeyi linedi lɛlɔ ni, búti sika ɔƒualadi ku ugyiedi ɔni bɔ́kɔku ku ala akladi ƒui búsienku Katɔti kaduli na bútákɔku-nya búte Uria ubidi Meremot ɔni ndi ɔkpane ku Pinehas ubidi Eleasar ɔni muubunku-nwu. Na Lewiƒuɔ bani ndi Yesua ubidi Yosabad ku Binui ubidi Noadia lɛnɔ bénye mmɔ ɔdi.

³⁴ Na bákɔku lɛla biala na nina bɔkɔku ku bumomo kenye na bénweni bákya ɔku kemmo bése uwi ɔmmɔ kemmo.

³⁵ Na bekyuli bani ƒui na kekpo kéƒie na ami ku-ma búnwini búbo mmɔ ni, bábla bɔkyula akpala béte Israel Katɔti. Na bada ɔmantɛ bakɔ leevu-inyɔ ku baƒonu bagyani liti ku aavlene-ɛku ku baƒonu bagyani bakɔdi liti ku aavlanyɔ-maatɛ. Na béti betukpa leevu-inyɔ bábla likpidi butitakyiɛ buvele akpala. Na ala amɛni ƒui na básala bábla bɔkyula akpala ammɔ béte Katɔti.

³⁶ Na béti ɔga kɔkunkɛ kɔni ndanku ɔda ɔni na úbo béte aban bagadine ku kɔlɛkɛ kɔni na Euƒrate Ketu ɔvi lɛlɔ badine benengu bammɔ na bénu kalɔ na béte kebunku na Katɔti ɔtɔ ɔmmɔ bɔtu kemmo.