Esra 6 - Katɔti Ɔku Kedee

Bánu Ɔga Kores Kakunkɛ Kani Na Únweni

¹ Anwuɔsu Ɔga Dario úbo ɔda na báwia kuuku lɛku lɛbɛladi lɛni nse egulabi kesekɔ na Babilon mmɔ kemmo bánu.

² Nsu ɔma kagyumanakɔ kpakplaa kani nkya ɔma unengudi ɔni baalɔ banii Ahmeta na Media kalɛkɛ na bátánu kakunkɛ kammɔ. Na bénweni bákya banini,

³ “Na Ɔga Kores lɛga bɔdi lɛkwa lideedi kemmo ni, úbo ɔda ka basɔku Yerusalem kakpakɔ batu aani kesii kani na bataabla akpala. “Na kakpakɔ kammɔ bɔkuku bɔdi lɛgba bɔka liti ku aavlene na nwuna bɔbɛbɛ lɛnɔ bɔbla lɛni kani.

⁴ Na nwuna awodu ni, beti ligyii basia atabi atɛ lɛlɔ. Na kayu biala na kadanku kabla kammɔ lɛlɔ ni, na bedie basiku ɔga kavumi kemmo.

⁵ Lɛnɔ ni, sika ugyiedi ku ɔƒualadi ɔni na Ɔga Nebukadnesar úti ɔ́siku Yerusalem kakpakɔ na úti úbese Babilon ni, basɔku besienku Yerusalem na beti bese kesii kani béti-nwu.”

Ɔga Dario Úbo Ɔda Ka Kabla Kammɔ Kesie Anumi

⁶ Amu na Ɔga Dario úti kakunkɛ kamɛni úmene. “Amii Tatenai ketu ɔvi kalɔ lɛlɔ ɔnune ku Setar-Bosnai ku bina kabla benengu bani nkya ketu ɔvi, bɛtɔlɔ kakpakɔ kammɔ kudɔ biteesie.

⁷ Na bitebile kabla kammɔ anumi busie. Na bɛya na Yudaƒuɔ benengu basɔku Katɔti kakpakɔ batu na kesii kani na báka-ka bɔtu kudeedi.

⁸ “Na ɔƒɛni ni, muubó-mii ɔda na lɛla lɛni na ɔlɛka bɛbla bite Yudaƒuɔ benengu bamɛni na ɔtɔ ɔmɛni bɔtu kemmo. “Kayu kani ƒui na bekyuli bamɛni badubo bubo ni, ɔdi ka baƒɔ-ka basiku ɔga kavumi kani na bekyuli bani nkya ketu ɔvi béeyi taabakya-ka kemmo, kalɛ na kabla kammɔ kelédi kelenye.

⁹ Na lɛla biala na Yerusalem bakpane badubo bɔwia aani ɔmantɛ bakɔ iye edula ebi iye mma iye nnɔ iye ntɛ ka beteeti taabla limeyi ndi limeyi akpala na Katɔti ɔni nkya Katɔ kakpakɔ ni, na beteete-ma na beteni ɔdi bute.

¹⁰ Bɛbla ala amɛni kalɛ na babla akpala ani na maƒɔ Katɔti ɔni nkya katɔ anu, na bataakpali Katɔ teete ɔga ɔmmɔ ku bebi kadia.

¹¹ “Na ɔni nsɔ nsia ni, muubó ɔda ka ukyuli biala na wavumana lɛla lɛni na lɛ́lɛ ugyii mɛni ni, nwuna lɛsa na badubo ɔta bɔni budie na baƒala-nwu ugyii ɔmmɔ lɛlɔ. Na likpidi lɛni na ɔ́bla ɔsu ni, badubɔgyingya nwuna ɔtɔ umodi ɔmmɔ balɛ lisu aani alakpi.

¹² Na mɔɔkpali Katɔti ɔni náya na nwuna lɛnyi lɛ́kɛ keliekɔ na mmɔ ka ɔtu ɔga biala iye bekyuli bani mata menye lɛla lɛmɛni lɛlɔ iye bakali ka babwɛ kakpakɔ kammɔ na Yerusalem udie ntɛ bɔmmɔ. “Ami Dario nébo ɔda lɛni. Bɛnu ka bɛ́sia anu na bɛ́di-mu lɛlɔ ulu lɛlɔ siin.”

Bátu Kakpakɔ Báwɔlɔ Na Béti-ka Bákya Katɔti Lɛkɔkɔ

¹³ Ɔmmɔ kama ni, Ɔga Dario ɔda bubo bɔni na úti úmene aban ɔgadine Tatenai ɔni mɔɔnu bani nkya Euƒrate Ketu ɔvi lɛlɔ ku Setar-Bosnai ku bana bebunkune ɔsu ni, básia anu na bábla lɛla biala ulu lɛlɔ.

¹⁴ Anwuɔsu Yudaƒuɔ benengu bésie anumi ku bana bɔtu kabla kammɔ na bálɛ lili geen ɔkɛnku kenye udiene Hagai ku Sakaria ɔni ndi Ido kaba kemmo ubi etemila kenye budie teete-ma ɔsu. Na báwɔlɔ kakpakɔ kammɔ bɔtu aani kalɛ na Israel Katɔti ɔ́tina ku Ɔga Kores ku Dario ku Artasasta bani ndi Persiaƒuɔ baga ɔda ɔni na bébo-ma ɔsu.

¹⁵ Báwɔlɔ kakpakɔ kammɔ bɔtu na Yudaƒuɔ kɔbuli kɔni baalɔ Ada kuna limeyi lɛtɛdi lɛlɔ na Ɔga Dario lɛga bɔdi lɛkwa lɛkundi kemmo.

¹⁶ Amu na Yudaƒuɔ ku bakpane ku Lewiƒuɔ bammɔ ƒui bádi kakpakɔ kammɔ buti taakya Katɔti lɛkɔkɔ limeyi ku lɛlɔyɔ.

¹⁷ Na kakpakɔ buti taakya Katɔti lɛkɔkɔ limeyi lɛmɛni bɔdi kemmo ni, béte ɔmantɛ bɔkɔ eti anyɔ ku baƒonu bagyani eti ene ku baƒonu bagyani bakɔdi eti maane ka beti babla likpidi buti taakyiɛ buvele akpala na Israel kadi bekyuli ƒui lili. Na béte betukpa leevu-inyɔ na Israelƒuɔ adua leevu-anyɔ ammɔ kenye.

¹⁸ Na báya na bakpane bammɔ ku Lewiƒuɔ bammɔ bénye bana kunyekɔ na bana esu esu kenye na Yerusalem ka babla kabla bete Katɔti aani kalɛ na bénweni bákya Mose Ɔku kemmo.

Kukpi Lili Bɔvia Lɛlɔ Litemi

¹⁹ Na Yudaƒuɔ kɔbuli kudeedi limeyi leevu-linedi lɛlɔ ni, bekyuli bani na béƒie bátɔlɔku mmɔ bádi Kukpi Lili Bɔvia Limeyi.

²⁰ Na bakpane ku Lewiƒuɔ bammɔ békisi lɛlɔ na bábla lɛlɔ bɔbla sɛɛn ɔdi ɔmmɔ. Na Lewiƒuɔ bammɔ bádu Kukpi Lili Bɔvia koƒonu ubi béte bekyuli beƒiedi bammɔ ƒui ku bana banwani ku bakpane ku ama alati lɛnɔ bana lɛlɔ.

²¹ Ɔmmɔ ɔsu bekyuli beƒiedi bani nénwini bébo mmɔ ƒui bádi, úbunku kadi bamba bekyuli bani náda lɛlɔ bámami bana banwani ku bana ablala ƒui lɛlɔ ka basiaku Israel Katɔti kama.

²² Na emeyi maatɛ na béti bádi Bodobodo Ɔni Néteƒu Limeyi ku lɛlɔyɔ, ɔsika Katɔti ɔ́ya na lɛlɔyɔ lɛ́ƒɔ-ma lɛlɔ kemmo ɔkɛnku kalɛ na ɔ́ya na Asiriaƒuɔ ɔga ɔ́vumana nwuna ɔbladu na úbunku na bátu Katɔti ɔtɔ ɔmmɔ béte Israel Katɔti ɔsu.