Esra 3 - Katɔti Ɔku Kedee

Básɔku Kakpakɔ Bátu

¹ Uwi ɔni na kɔbuli maatɛdi kúdu na Israelni biala ɔ́ɔkɛ nwuna keliekɔ na nwuna ɔma ni, bana ƒui bábasala lisu aani kadi kenwi bekyuli na Yerusalem.

² Amu na Yosadak ubidi Yesua ku nwuna bakpane ku Sealtiel ku nwuna bekyuli badi bése kalɔ baatú Israelƒuɔ Katɔti lɛkpabi lɛni lɛlɔ badubo akpala butaakyula aani kalɛ na bénweni bákya Mose ɔni ndi Katɔti ukyuli ɔda bubo ɔku kemmo.

³ Ina ka bákya bátaayia bekyuli bani nkya-ma amadɔ mmɔ ni, básɔku lɛkpabi lɛmmɔ bátu na nina ɔka ɔkukudi lɛlɔ, na baabla ɔtanta ku useyi uwi akpala teete Unwoti.

⁴ Na kalɛ na bénweni bákya ɔda bubo ɔku kemmo ni, bádi Kevo Kemmo Bulie Emeyi, na bábla bɔkyula akpala bumomo bɔni na bénweni bése béte limeyi biala.

⁵ Ɔmmɔ kama ni, bábla bɔkyula akpala ku kɔbuli kɔwɔdi akpala ku akpala ani na ese ete Unwoti emeyi bɔdi. Na básɔ bábla akpala bamba ani ndi kaƒɔ ƒaa etela ani na bekyuli bammɔ béboku.

⁶ Na limeyi lideedi na kɔbuli maatɛdi kɔmmɔ kemmo ni, bése kalɔ baabla bɔkyula akpala teete Unwoti. Ina ka béteseku kalɔ ku Unwoti kakpakɔ bɔtu tɔ.

Béseku Unwoti Kakpakɔ Bɔtu Kalɔ

⁷ Ɔmmɔ kama béti egulabi adi béte lɛtɔ batune ku banwine badi. Na béti adila ku ntu ku nnɔ ka beti besienku Sidonƒuɔ ku Tiroƒuɔ kalɛ na beti sida kugyiikɛ basia ɛpu lɛlɔ basiku Lebanon beboku Yopa. Na Persiaƒuɔ Ɔga Kores úte kuƒi kɔmɛni.

⁸ Na kɔbuli kunyɔdi na lɛkwa linyɔdi kemmo ni, uwi ɔni na béduo Unwoti kaduli na Yerusalem kama ni, Sealtiel ubidi Serubabel ku Yosadak ubidi Yesua ku bana banwani bakladi ku bakpane ku Lewiƒuɔ ku bani kekpo kéƒie-ma na bénwini bébo Yerusalem bése kalɔ ku kabla. Na Lewiƒuɔ bani ƒui nákɛ akwa aavlanyɔ ku kama béti-ma bábla kabla kammɔ lɛlɔ banune.

⁹ Na Yesua ku nwuna bebi ku nwuna banwani Kadmiel ku nwuna bebi ku Hodawia kaba bebi ku Henadad bebi ku Lewiƒuɔ béti lɛlɔ básala na bakya baanu bekyuli bani nkya mɔɔtú Katɔti ɔtɔ ɔmmɔ lɛlɔ.

¹⁰ Na si batune bammɔ bákya atabi ani beeti teese Unwoti kakpakɔ ɔtɔ kalɔ bɔtu ni, na bakpane bammɔ bakya bana bakpane lɛwu na beti bana kɔkpɛɛ bada. Na Lewiƒuɔ bani nási Asaƒ kaba kemmo beti bana agyala na bemwi Unwoti aani kalɛ na Ɔga Dawid úbo-ma ɔda ɔ́vi.

¹¹ Na beedie lɛnu teemwi Unwoti na baagyá-nwu enu banini, Unwoti ɔdia geen. Na nwuna bɔyɔ bɔni na ubo ute Israel buse búsela uwi ƒui. Na bekyuli bammɔ ƒui bébo kudu momoomo bémwi Unwoti ka bákya Unwoti kakpakɔ kowodu ɔka kalɔ ɔsu.

¹² Nsu Lewiƒuɔ ku bakpane ku lɛtɔ benengu bani na badaku anumi busie pii na bánu kakpakɔ kedeedi bɔtu béwulo momoomo ka bánu ka bése kalɔ baatú kakpakɔ kammɔ. Na badi lɛnɔ beebó kudu ku lɛlɔyɔ.

¹³ Na ukyuli biala ɔdi ɔsɔ ulenu buwulo ku lɛlɔyɔ kudu kavumana kadi taati. Ɔsika kudu kɔmmɔ kɔ́kɔ katɔ geen na beenú-ku na ɔgyu kakaaka ƒui.