Esra 10 - Katɔti Ɔku Kedee

Bekyuli Bammɔ Bévele Ekpidi Buti Taakyiɛ

¹ Uwi ɔni Esra ɔkya uubó lɛlɔ taava kalɔ na uuwulo taakpali Katɔti na uudie bana alaekpidi kalɔ teevele buti taakyiɛ na Katɔti kaduli ni, bekyuli lisu pii bábaka bámana-nwu na badi beleku ku banana ku banamu na ama lɛnɔ bakya beewulo momoomo.

² Amu na Yehiel ubidi Sekania ɔni nási Elam kaba kemmo ɔ́kpɛ úde Esra na ɔ́su-nwu ɔnini, “Bɔ́lɛ bula Katɔti kama. Ɔsika búsie bɔkya buuti kadi bamba beleku bani nlie nde-bu. Nsu ɔmɛni kama ƒui ni, bɔmu bubo lɛnunsia bute Israelƒuɔ.

³ Ɔmmɔ ɔsu ni, ya na bunyimi lɛla lɛdi na Katɔti anumi na bɔbɔku beleku bamɛni ku bana bebi na batɔlɔ ɔkɛnku lɛla lɛni na awɔ ku bekyuli bani mɔɔbu Katɔti ɔda bubo bɛdubɔsu-bu. Na bɛnu ka bɔ́bla lɛla biala bɔ́siaku ɔda bubo bɔmmɔ lɛlɔ.

⁴ Ta, na abla lɛla lɛdi asiku litemi lɛmɛni lɛlɔ, na bɔdubunye-ɔ kama. Ɔmmɔ ɔsu kya kayi na esie lɛla lɛdi kalɔ.”

⁵ Ɔmmɔ ɔsu Esra ɔ́ta na ɔ́ya na bakpane ku Lewiƒuɔ benengu ku Israelƒuɔ bakladi bése kenye ka badubɔbla lɛla lɛni na Sekania ɔ́su mmɔ.

⁶ Na ɔmmɔ kama ɔ́ta ɔ́lɛ bekyuli bammɔ akɔ na Kakpakɔ anumi mmɔ, na útéduo Eliasib ubidi Yohanan kaduli na ɔtɛ mmɔ uuwulo usien umodi ɔni na útadi iye útani lɛla lɛdi na kalɛ na Israelƒuɔ bekyuli beƒiedi bani nénwini bébo mmɔ bálɛ Katɔti kama ɔsu.

⁷ Amu na bákɔ lɛsa na Yuda ku Yerusalem kalɔ lɛlɔ básu banini, “Bekyuli bani ƒui na kekpo kéƒie-ma na básɔ bénwini bébo mmɔ ni, babasala lisu na Yerusalem.

⁸ Na si awɔ ɔni na étebo emeyi atɛ kama ni, badubuti kɔnu basia ƒula akɛla ƒui lɛlɔ, aani kalɛ na benengu ku bakutine bényimi bése. Na badubɔda ukyuli ɔmmɔ bedie Israelƒuɔ bani kekpo kéƒie-ma akɔ.”

⁹ Na emeyi atɛ ammɔ kemmo ni, bekyuli bani ƒui nási Yuda ku Benyamin bábasala na Yerusalem. Na limeyi aavlanyɔdi lɛlɔ na kɔbuli yaalenwidi kemmo ni, na bana ƒui báasa beli Katɔti ɔtɔ anumi kaduli kemmo. Na ɔnantu ɔni nkya mɔɔna ku lɛla lɛni na limeyi lɛmmɔ ablala adanku ɔsu ni, kɔnyana ku kayi bɔkpulu bɔ́ƒɔ ukyuli biala lɛlɔ kemmo ƒui.

¹⁰ Mmɔ na ɔkpane Esra ɔ́ta únye na ɔ́su bekyuli bammɔ ɔnini, “Bɛ́lɛ Katɔti kama na bíti kadi bamba beleku na bɛ́bla likpidi bɛ́sia Israelƒuɔ ekpidi ani na bábla kama.

¹¹ Anwuɔsu ɔƒaani ni, bidie bina ekpidi kalɔ bɛtina bina Unwoti ɔni ndi bina bati kuuku Katɔti na bivele-nwu. Na bɛbla lɛla lɛni mayɔ-nwu kaƒɔ. Na bɛda lɛlɔ bɛmami kadi bamba bekyuli bani na beli bámana-mii mmɔ lɛlɔ na bɛnyonu bana beleku bammɔ.”

¹² Amu na bekyuli bammɔ ƒui bédie kenye ku kudu básu banini, “Lɛla lɛni na ásu lɛdi ulu! Na ɔdi ka bɔbla bɔsiaku lɛni.

¹³ Nsu bekyuli lisu lɛmɛni líbomo lɛ́gya na ɔnantu lɛnɔ ɔɔna momoomo na bulakana-nwu akɔ bɔsɔ bunye lɛni. Na ɔni nsɔ nsia ni, bulakana litemi lɛmɛni udu bɔdaku bɔwɔlɔ na limeyi linwi iye emeyi anyɔ kemmo. Ɔsika bɔƒiɔ geen na bɔdi-bu na lɛla lɛmɛni kemmo.

¹⁴ Na aya na bula bakutine basɔ bakya Yerusalem na beti kabla kamɛni basia lɛlɔ. Na ukyuli biala na uti kadi bamba uleku ni, bete-nwu uwi na ubo ubasiaku benengu ku litemi batɛne bani nási nwuna ɔma. Na bɔdubɔbla lɛni wetédu ka kaƒɔ káyɔ Katɔti na udie nwuna kɔnyi na litemi lɛmɛni lɛlɔ.”

¹⁵ Na ukyuli biala útata útenye kasusu kamɛni lɛlɔ ntu Asahel ubidi Yonatan ku Tikwa ubidi Yahasia, na Mesulam ku Sabetai ɔni ndi Lewini bénye-ma kama.

¹⁶ Anwuɔsu bekyuli bani na kekpo kéƒie-ma na bénwini bébo mmɔ báƒɔ kasusu kani badaku mmɔ. Na ɔkpane Esra údie banana ɔlɛku kaba benengu bammɔ akɔ na únweni bana anyi ɔ́kya ɔku kemmo. Na limeyi lideedi na kɔbuli leevudi kemmo ni, bekyuli bammɔ bése bana kabla kalɔ.

¹⁷ Na ɔni na uteedu kɔbuli kudeedi limeyi lideedi ni, báwɔlɔ ku bekyuli bani néti kadi bamba beleku mmɔ ƒui etemila kemmo buduo.

Bálɛ Banana Bani Néti Kadi Bamba Beleku Anumi

¹⁸ Na banana bani néti kadi bamba beleku anyi ndi amɛni. Yosadak ubidi Yesua ku nwuna banwani ku Maaseia ku Elieser ku Yarib ku Gedalia.

¹⁹ Na bése kenye ka badubɔnyonu bana beleku, na béte ɔmantɛ akɔ ɔkɔdi na béti babla likpidi lili buvele akpala.

²⁰ Na Imer kaba kemmo ni, ama ndi Hanani ku Sebadia

²¹ Na Harim kaba kemmo ni, Maaseia ku Elia ku Semaia ku Yehiel ku Usia.

²² Na Pashur kaba kemmo ni, ama ndi Eliehoenai ku Maaseia ku Ismael ku Netanel ku Yosabad ku Elasa.

²³ Na Lewiƒuɔ akɔ ni, Yosabad ku Simei ku Kelaia ɔni ndi Kelita ku Petahia ku Yuda ku Elieser.

²⁴ Na lɛnu batune akɔ ni, Eliasib. Na kɔyakun bagyumanane ni, Salum ku Telem ku Uri

²⁵ Na Israelƒuɔ bamba lɛnɔ ndi bamɛni. Na Paros kaba kemmo ni, Ramia ku Yisia ku Malkiya ku Miyamin ku Eleasar ku Malkiya ku Benaia.

²⁶ Na Elam kaba kemmo ni, Matania ku Sekaria ku Yehiel ku Abdi ku Yeremot ku Elia.

²⁷ Na Satu kaba kemmo ni, Elieoenai ku Eliasib ku Matania ku Yeremot ku Sabad ku Asisa.

²⁸ Na Bebai kaba kemmo ni, Yehohanan ku Hanania ku Sabai ku Atlai.

²⁹ Na Bani kaba kemmo ni, Mesulam ku Maluk ku Adaia ku Yasub ku Seal ku Yeremot.

³⁰ Na Pahat-Moab kaba kemmo ni, Adna ku Kelal ku Benaia ku Maaseia ku Matania ku Besaleel ku Binui ku Manase.

³¹ Na Harim kaba kemmo ni, Elieser ku Yisia ku Malkia ku Semaia ku Simeon

³² ku Benyamin ku Maluk ku Semaria.

³³ Na Hasum kaba kemmo ni, Matenai ku Matata ku Sabad ku Eliƒelet ku Yeremai ku Manase ku Simei.

³⁴ Na Bani kaba kemmo ni, Maadai ku Amram ku Uel

³⁵ ku Benaia ku Bedeia ku Keluhi

³⁶ ku Wania ku Meremot ku Eliasib

³⁷ ku Matania ku Matenai ku Yaasu.

³⁸ Na Binui kaba kemmo ni, Simei

³⁹ ku Selemia ku Natan ku Adaia

⁴⁰ ku Maknadebai ku Sasai ku Sarai

⁴¹ ku Asarel ku Selemia ku Semaria

⁴² ku Salum ku Amaria ku Yoseƒ.

⁴³ Na Nebo kaba kemmo ni, Yeiel ku Matitia ku Sabad ku Sebina ku Yadai ku Yoel ku Benaia.

⁴⁴ Bekyuli bamɛni ƒui néti kadi bamba beleku, na badi báwɔ bebi básiku beleku bammɔ kudɔ.