Esra 1 - Katɔti Ɔku Kedee

Kores Úbunku Bekyuli Bani Kekpo Kéƒie-ma Na Bénwini Bébo Ɔma

¹ Na Persia kalɔ Ɔga Kores lɛga bɔdi lɛkwa lideedi kemmo ni, Unwoti úti ɔ́sia-nwu kayi ka ute bɔti bɔdi na nwuna kalɛkɛ lɛlɔ ƒui kalɛ na Yeremia kenye kani na ɔ́su kebo-nwu kemmo na ɔ́ya na bénweni lɛla lɛmmɔ bése.

² Na ɔda ɔni na úbo ndi ɔmɛni. Lɛni na ami Ɔga Kores mɔɔsu. Unwoti Katɔti Ɔyikune úti kayawi lɛga kɔdikɔ ƒui ɔ́kya-mi kalɔ na ɔ́ƒuna-mi ka lɛtu kakpakɔ lite-nwu na Yerusalem na Yuda kalɔ lɛlɔ.

³ Nwuna kadi bekyuli akɔ ɔdi biala na ɔkya-mii akɔ ni, nwuna Katɔti ɔsiaku-nwu na unwini usie Yerusalem na utátu Unwoti ɔni ndi Israel Katɔti ɔni nli Yerusalem kakpakɔ kammɔ.

⁴ Na kalɔ biala kemmo na Katɔti kadi bekyuli bamɛni akɔ bani nébu ɔdi ɔkya ni, kalɔ kammɔ bekyuli bete-ma sika ɔƒualadi ku ugyiedi ku ala bamba ku bebuo ku kaƒɔ ƒaa etela ute Katɔti kakpakɔ kamɛni bɔtu na Yerusalem.

⁵ Amu na Yuda ku Benyamin adua batɔnkune ku bakpane ku Lewiƒuɔ ku bani ƒui na Katɔti útuku-ma kayi báklibi lɛlɔ ka basɔ benwini batátu Unwoti kakpakɔ na Yerusalem.

⁶ Na bana liku bekyuli béte-ma sika ɔƒualadi ku ugyiedi ku ala ku bebuo ku ala abuni abambadi úbunku kaƒɔ ƒaa etela ani na béte-ma.

⁷ Na Ɔga Kores ɔ́sɔku akyami ku lɛɛƒɛɛ lɛni na Ɔga Nebukadnesar úti ɔ́tɔlɔku Yerusalem kakpakɔ mmɔ, na úti-nya útése nwuna baƒiɔ kakpakɔ ɔtɔ mmɔ úte-ma.

⁸ Na Persiaƒuɔ Ɔga Kores úti kabla kammɔ ƒui ɔ́kya Sesbasar ɔni ndi bana egulabi lɛlɔ ɔnune enu kemmo, na únweni ala ani ƒui béte-ma ɔ́kya ɔku kemmo.

⁹ Na anya ndi sika ugyiedi akyami 30 ku sika ɔƒualadi akyami 1,000 ku akyami bamba 29.

¹⁰ Sika ugyiedi akyami wɛlɛ wɛlɛ 30 ku sika ɔƒualadi akyami wɛlɛ wɛlɛ 410 ku kanwakɔ akyami bamba 1,000.

¹¹ Na ala ammɔ bumomo ƒui adi ala 5,400. Na ala amɛni na Sesbasar úti ɔ́da uwi ɔni na anwu ku bekyuli bani kekpo kéƒie-ma bási Babilon bésie Yerusalem.