Esekiel 5 - Katɔti Ɔku Kedee

Yerusalem Udu Bɔyii Bɔsia Ulu

¹ “Esekiel, ɔyawine ubi, wia kewii kani na kebo ɔbi kaduɛ na ekulo ƒula lili linwini lɛmmɔ na ekpeyi ƒula keduo kalɔ linwini lɛmmɔ ƒui. Ti linwini lɛmmɔ na átákɔku-ni unu anu na ele-ni kemmo akpa atɛ likeke.

² Na si uwi ɔni na ékpoku lɛtabi lɛni nnye nte Yerusalem mmɔ áwɔlɔ ni, na akyula linwini lɛmmɔ lɛkpa linwi na lɛtabi lɛmmɔ lɛlɔ. Na eti lɛkpa linyɔdi na ekulo-ni wɛlɛ wɛlɛ ewi aka amana lɛtabi lɛmmɔ lɛlɔ. Na lɛkpa lɛtɛdi ni, bo-ni kɔliku kayaa na ɔƒɛƒɛɛ kemmo na ami ndubo-ni bukulo ku mina kewii.

³ Bu linwini lɛmmɔ blii lɛdi se na eti ebo likpo akya ƒula awu kɔtu.

⁴ Ɔmmɔ kama na ada lɛdi edie na ebo akya ogya kemmo na lɛkywi. Na ogya ɔmɛni ɔdubo bɔkywi usie amadɔ kama kama ƒui na ɔkyula ukyuli biala na Israel.

⁵ “Ami ndi Unwoti Katɔti na lɛ́bla na Yerusalem ɔdi ɔma ɔni na ɔ́ƒɔ kuye geen utulo ƒui na kayawi ku kadi bamba kɔlɔ ƒui akɔ na ɔɔda bekyuli kubiti.

⁶ Nsu Yerusalemƒuɔ báta bénye-mi lɛlɔ na banii belenu-mi litemi. Béni mina ɔda bubo na bénwini alaekpidi bablane bonwu betulo kadi bamba bekyuli bani náka bámana-ma muedi.

⁷ “Anwuɔsu na mɔɔsu Yerusalemƒuɔ nnini, ‘Ami ndi Unwoti Katɔti! Na bíni na biládi mina litemi ku ɔda bubo lɛlɔ. Mmomu kadi bamba bekyuli bani na bina amadɔ ɔda bubo lɛlɔ na bɛɛdi na bɛ́ta bínye-mi lɛlɔ na bɛɛbla alaekpidi ani na etulo ama adi ƒui!’

⁸ “Na ɔƒaani ni, kadi bekyuli bammɔ badubunye banu kalɛ na mɔɔní-mii kɔtu

⁹ na bina alaekpidi ɔsu. Na bina kɔtu bɔni bɔmmɔ bɔdubo ɔkplu bɔyu geen na butulo lɛla biala na lɛ́ɛbla ḿbavi iye lɛni na nsɔ mabla lɛnɔ uwi ɔni mebo ƒui kemmo na uladia bɔnu.

¹⁰ Lɛdila lɛni na bamini bakya kenye muedi ɔdubo ubenwini lɛnungyiela geen lite bebi bati ku bebi beni ɔni na badubuti ama alati bebi muedi bakun. Na bebi lɛnɔ bakun bana bawɔne. Na bekyuli bani ndubɔlɛ ɔgbankpi ku liƒu ala ani ndubɔlɛ mɛni kemmo muedi badubo-ma bɔbɔku bugyingya bɔkya ekpo ekpo na lɛƒɛnyi ƒui lɛlɔ.

¹¹ Bina alaekpidi ani na bɛɛbla na eesé lɛlɔ mmɔ áya na mina kakpakɔ kasɔ kaaadi kesii kani námanku ka bakpa-mi. Anwuɔsu na lɛ́kpali lɛlɔ líse kenye ka ndubo kama bunwini bɔkya-mii na nsɔ lɛɛɛdubo-mii kɔnyana kɔdi bɔnu lɛnɔ.

¹² Bina kadi ƒui lɛkpa lɛtɛdi bekyuli badubo bukpi na Yerusalem mɛni na kɔka iye ɔlɛ ɔsu. Na lɛkpa lɛtɛdi bamba lɛnɔ bekpi na kekpokɔ. Na lɛbɔku lɛkpa lɛtɛdi lɛkladi lɛkya kadi bamba bekyuli ƒui akɔ lɛmana. Na badubɔsia-mii anumi na bedie-mii balɛku na badu-mii ƒui.

¹³ “Bɛdubo mina kɔnyi kpakplaa kɔni na líti lɛ́kya-mii ablala ɔlɛ bunu kaduɛ geen butédu uwi ɔni na medie-mii kasi mawɔlɔ. Na bɛdubo bɔnu bɔti ka kɔnyi kukpidi kɔ́kɔ ami Unwoti na bina litemi tenu ɔsu.

¹⁴ “Ukyuli biala ndubɔsi mmɔ ɔlɛ ɔdubo-mii bɔma na kalɛ na lɛ́yila-mii udu ɔsu. Na kadi bamba bekyuli

¹⁵ badubo-mii budumi na bakya-mii lɛlɔ lɛma, nsu liƒu lɛnɔ lɛdubo-ma bɔda geen na ala ani na lɛ́bla-mii ɔsu.

¹⁶ Ndubo-mii edula bubile butédu ka kɔka kɔ́du-mii na ɔgbankpi lidu lɛnɔ lɛdubo-mii butaalɛku aani kalɛ na beebó atula taalɛ ukyuli.

¹⁷ Kɔka ku beƒiebuo ndubo bina bebi bɔdu. Na ndubo-mii kɔtu bɔni ku lɛlɛ likpidi na bina bekisine lɛnɔ bekpo-mii na badu-mii ku bana kuwii. Ami Unwoti násu.”