Eƒesoƒuɔ 2 - Katɔti Ɔku Kedee

Katɔti Ɔ́ya Na Bɔkɛ Ngba Ɔkɛnku Kristo Lɛlɔ

¹ Uwi ɔdi návi kemmo ni, bíse aani bekyuli bani nékpi na kɔyu kemmo, ɔsika bítaabla atuɔkplu ku ekpidi.

² Na bɛ́siaku kayawi ala ekpidi kama ku ukisine ɔni mɔɔdi ayu ekpidi ƒui lɛlɔ na kayaa, na anwu kani mɔɔdi batuɔkplune ƒui lɛlɔ ɔƒɛni.

³ Lɛni geen na abu lɛnɔ búlie ngba aani bana kalɛ na bɔ́siaku bula ɔlɔna ɔkwɛ adala kama na bɔ́bla ala ani na bula ɔlɔna ku kasusu kaayɔ́. Na ka bula ukyuli udu útavumanaku bani mɔɔbla ala ammɔ udu ɔsu ni, bɔ́manku ka Katɔti ɔni abu lɛnɔ kɔtu aani bekyuli bakladi kalɛ.

⁴ Nsu ka Katɔti ɔɔnu-bu kɔnyana pii na nwuna bɔyɔ bɔni na ubo úte-bu lɛnɔ bumomo ɔsu ni,

⁵ uwi ɔni na búkpi na kɔyu kemmo ɔ́si bula alaekpidi bɔbla ɔsu ni, Katɔti ɔ́ya na bɔ́sɔ búnwini búbo bulie ngba ku Kristo. Na ɔkɛnku Katɔti lɛƒɔndia ɔsu na bɔ́kɛ ngba bɔƒɔ bɔmɛni.

⁶ Na ɔmmɔ ɔɔtina ka abu ku Yesu Kristo na Katɔti ɔ́gyila ɔ́lɛku bekpine akɔ kalɛ na bɔdiku-nwu lɛga na katɔ.

⁷ Katɔti ɔ́bla ɔmɛni úti ɔ́tina bekyuli na uwi ɔni ndububo ƒui kemmo kalɛ na banu nwuna lɛƒɔndia lɛni na ubo ute-bu ka liiibo bɔkɔku bɔdi ɔkɛnku bɔyɔ bɔni na ɔɔyɔ́-bu na Yesu Kristo ɔsu.

⁸ Ɔsika Katɔti lɛƒɔndia ɔsu na bɛ́kɛ ngba bɔƒɔ. Na útasi amii alati kudɔ. Mmomu ɔ́si Katɔti bɔƒɔtaadi litela lɛni na úte-mii ɔsu.

⁹ Na útasi bina kabla kadi lɛnɔ kemmo kalɛ na ɔdi ɔkun lɛmɛnɛ lɛdi.

¹⁰ Katɔti ɔkɛnku Kristo Yesu lɛlɔ na údie-bu kalɛ na bɔbla ala abuni ani na anwu ɔlati ɔ́klibi úse úte-bu ka bɔbla.

Kristo Úti Bekyuli Ƒui Ɔ́sala

¹¹ Binyimo ka uwi ɔdi návi ni, báwɔ-mii aani bekyuli bani naaagyi Katɔti. Na Yudaƒuɔ bani nékulo lego ni, baalɔ-mii banii kadi kani bekyuli nétekulo ago. Nsu geen ni, bani nábla ɔlɔna bukulo ɔdi ɔmɛni ni, ɔlɔna lɛlɔ kabla kani na ɔdi. Na uuubo kɔsia kɔdi na kɔyu kemmo na Katɔti anumi.

¹² Binyimo ka uwi ɔmmɔ ni, amii ku Kristo bɛɛɛdi unwi, na bɛdi baƒɔ bani naaadi Yudaƒuɔ bani na Katɔti ɔ́ƒuna. Na biiibunku kenye kani na Katɔti úse úte nwuna bekyuli na kenye kani na únyimiku-ma kemmo. Na biiibo lɛnunsia lɛdi na ngba bɔni na bilie kemmo. Na bítenu Katɔti lɛnɔ kɔku kudii na bina ngba kemmo.

¹³ Nsu ɔƒɛni ni, amii bani na nka bɛ́gyunku Kristo Yesu ni, ɔkɛnku nwuna ubugya ɔni na úti úwi kalɔ na bina lili ɔsu ni, bɛ́kpɛ bíde-nwu.

¹⁴ Ɔsika Kristo ɔlati úte-bu bɔnwuna uwi ɔni na úti Yudaƒuɔ ku bani naaadi Yudaƒuɔ ƒui ɔ́sala. Na údie bukisi bɔni nse anii kowodu na ɔkya bana ntɛ.

¹⁵ Úti nwuna ɔlɔna ɔ́kpa úte Katɔti aani ala ani na beti bakpa bedie ekisila ani na Yudaƒuɔ ɔda bubo ƒui bɔdanku. Lɛla lɛni ɔsu na úti lɛlɔ ɔ́kpa ndi ka uti bana akpa anyɔ bammɔ ɔsala na babla benwi na nwuna kemmo, na keyi buɛɛ kebo-ma akɔ.

¹⁶ Na lɛnɔ ni, Kristo kukpi na ugyii lɛlɔ ɔ́klibi bana inyɔ ƒui ku Katɔti ntɛ, na ɔ́da bukisi ala ani ƒui ńkya-ma ntɛ údie, na bábla unwi ku Katɔti.

¹⁷ Anwuɔsu Kristo úbo úbakɔ keyi buɛɛ litemi buni lɛmmɔ lɛsa úte bekyuli bani nágyunku-nwu ku bani nákpɛ béde-nwu ƒui.

¹⁸ Ɔkɛnku Kristo lɛlɔ na bula akpa anyɔ ƒui, Yudaƒuɔ ku bani naaadi Yudaƒuɔ, bɔkɛ Katɔti Kɔyu kunwi lɛlɔ búbo Katɔti anumi.

¹⁹ Anwuɔsu amii bani naaadi Yudaƒuɔ mɛni bɛsɔ bɛɛɛdi baƒɔ iye belusiene keeke. Mmomu ɔƒɛni ni, bɛdi Katɔ Ɔga Ɔma bekyuli akɔ badi ku Katɔti bebi geen.

²⁰ Amii lɛnɔ bise aani kowodu kɔni na bátu bálɛ kpakplaa kɔni na batalane ku kenye bediene bammɔ bátu. Na Kristo ɔlati ndi kowodu kalɔ lɛtabi lɛni nda kowodu kɔmmɔ.

²¹ Na anwu ndi ukyuli ɔni náda ɔtɔ ɔni na bátu mmɔ ɔ́sala na ɔ́ya na únwini Katɔti kakpakɔ kedee.

²² Na Kristo ɔmmɔ kemmo na baatú abu lɛnɔ aani ɔtɔ kalɛ na bunwini keliekɔ bute Katɔti na kɔyu kemmo.