Daniel 7 - Katɔti Ɔku Kedee

Daniel Ɔ́nu Liƒu Bebweyi Ine Badi

^1-2 Daniel únweni ɔku ɔdi ɔnini, Uwi ɔni na Belsasar ɔɔdi lɛga na Babilon lɛkwa lideedi kemmo ni, lígye kɔna na lɛ́nu kɔyu kemmo ala budie taatina bɔdi na mina lɛlɛɛ kemmo usien ɔdi, na línweni líse. Lɛ́nu ka ɔƒɛƒɛɛ ɔni nási kayawi lɛƒɛnyi ine bɔmmɔ ƒui uukpó, na ɛpu bonwu ɔmmɔ ɔɔnwanɛ lɛlɔ geen.

³ Na kɔnakunwi ni, lɛ́nu ka bebweyi bayikune ine badi bávi bálɛ ɛpu ɔmmɔ kemmo na bávumanaku lɛlɔ.

⁴ Udeedi use aani gyata na ubo avwi aani kɔdigbo aasɛ kalɛ. Na ɔni na nnye mɔɔnu ni, bákpɔlɔ-nwu avwi ammɔ bédie, na báya na ɔ́ta únye ligeen na nwuna lɛgba lɛmadi inyɔ bɔmmɔ lɛlɔ aani ukyuli ɔyawine kalɛ. Na béte-nwu ukyuli ɔyawine kasusu.

⁵ Na kebweyi kanyɔdi kálɛ kegidi na káta kenye nwuna lɛgba lɛmadi lɛlɔ ligeen. Na ɔ́du aƒɛnyikubi atɛ ɔda na nwuna anyi kemmo na básu-nwu banini, “Ta na ekpoku-nwu, na akun nwuna ɔlɔna ɔni ƒui na aayɔ́.”

⁶ Na kebweyi katɛdi kese aani ebuoƒuala. Na ubo avwi ene na nwuna kama aani aasɛ kalɛ, na eli atɛ alɛ-nwu. Na béte-nwu kenyekɔ ɔyikun ka ɔdi lɛlɔ.

⁷ Na kebweyi kenedi aka kasɔ kebo ɔkplu ketulo bedeedi ƒui na kaada liƒu lɛnɔ teetulo-ma. Na abuala na béti bábla nwuna anyi bonwu bonwu ani nlɛ-nwu kenye kemmo. Na si lɛla lɛni na úteti nwuna anyi útadu ni, nwuna lɛgba na uuti teetu-ni taabwɛ. Úse ɔ́vumanaku bakladi ƒui. Na ese leevu nlɛ-nwu lili lɛlɔ.

⁸ Uwi ɔni na nnye mɔɔbla kasusu taasiku ese amɛni lɛlɔ kani na lise blii lɛdi lɛ́kɔ lɛ́lɛ. Na kɔnakunwi ni, ese atɛ ágyu álɛ ana kunyekɔ na éte libliidi lɛmɛni kuƒi. Na bekyuli anumi alɛ lise blii lɛmɛni lɛlɔ ku kenye kani muutemi ku lɛmɛnɛ bɔkun pii geen.

Katɔti Ɔ́tɛ Litemi Na Daniel Únweni

⁹ Nnye mɔɔnu, na bése agaboku adi. Na Katɔti ɔni nli uwi ƒui úsie útélie kalɔ. Na nwuna adala áƒuala ƒututuu aani etubankɛ. Na nwuna lili linwini lise ƒuala ƒuala aani unwo. Na nwuna lɛgaboku lɛmmɔ lɛɛbwɛ ogya. Na lɛgba lɛni nkya liboku lɛmmɔ kalɔ, liidie ogya unyemi.

¹⁰ Na ogya uudie linyemi ɔdubo aani ketu bɔgba taasi nwuna lɛƒɛnyi ƒui lɛlɔ taaka taamana-nwu. Na bekyuli bani na balakana-ma bumomo bɔka benye bámana-nwu baabla-nwu kabla. Na mpim leevu leevu benye-nwu anumi. Litemi bɔtɛ uwi údu. Na bébimi lɛku lɛni kemmo na bénweni bekyuli lɛlɔ ala bákya béwi.

¹¹ Amu na nnye mɔɔnu kpakplaa lɛla lɛni ndubo bɔlɛku lise libliidi lɛni na lɛ́nu ka lɛ́da lɛ́lɛ kebweyi kammɔ lili mmɔ na lɛmɛnɛ bɔkun etemila ani na ɔ́kya útaasu ɔsu. Kɔnakunwi na mina anumi lɛlɔ mmɔ ni, kebweyi kenedi kammɔ kékpi na ogya ɔ́kyula-ka ƒui.

¹² Na bebweyi ɛtɛ bakladi ama ni, béƒie bana kenyekɔ ɔyikun ɔni na nka béte-ma mmɔ báƒɔ, nsu béte kuƒi ka basɔ belie uwi klukui ɔdi bebu.

¹³ Ntɛ mɔɔnu ala ani ƒui mɔɔlɛ́ usien ɔmmɔ, na lɛ́nu ukyuli ɔdi ɔni nse aani ɔyawine ubi na ɔ́si ɔdubo na ulɔyɔ kemmo na kayaa. Na bébeti-nwu bétényene Katɔti ɔni nli uwi ƒui anumi.

¹⁴ Na bébi-nwu kagabwa bése-nwu lɛga, na béte-nwu ɔyikun na uukeye. Na bani nási kadi ƒui akɔ ku adi ƒui batɛmine na kalɔ biala lɛlɔ bákya-nwu lili kalɔ. Ɔdubo lɛga bɔdi uwi ƒui, na nwuna lɛga kadikɔ kalása kudii, na ɔdi lɛnɔ ulakana-ka lɛlɔ bɔdi.

¹⁵ Ala amɛni bɔnu bɔ́ya na liƒu lɛ́da ami Daniel geen, na nsɔ lɛɛɛgyi lɛla lɛni na mina kasusu kaatina-mi.

¹⁶ Anwuɔsu líye bekyuli bani nnye mmɔ akɔ unwi lɛla lɛni mɔɔlɛ́. Mmɔ na údie ala ammɔ kalɔ ku etemila amɛni ɔnini,

¹⁷ “Bebweyi ine bani na ánu ni, ama ndi lɛga kɔdikɔ ine kɔni nkya kalɔ lɛlɔ.

¹⁸ Nsu Katɔti ɔni ntulo ƒui ɔdubo nwuna lɛga kadikɔ buti bute bekyuli bani na ɔ́ƒuna na kenwini ama kadi úsela uwi ƒui.”

¹⁹ Nsu ɔmmɔ kama ni, nsɔ mɔɔwia lɛti lɛla lɛni nálɛku kebweyi kenedi kammɔ. Ɔsika anwu úse ɔ́vumana geen na bakladi kudɔ, na kana lɛlɔ lɛnɔ kebo liƒu geen. Na abuala anyi ani nkya-nwu kenye ku nwuna lɛgba aƒiɔ ani ndi abuala egyiedi ku lɛgba lɛni na uuti taabwɛ lɛla lɛni na nwuna anyi átakana bɔdu bɔbwɛ ni, bi na ala amɛni adanku na nwuna kalɔ budie ndi bi?

²⁰ Na lɛnɔ ni, mɔɔwia ka lɛti lɛla lɛni na ese leevu ammɔ enye ete. Na ɔni na utulo ƒui ndi lise libliidi lɛni nábaƒɔ ese atɛ amɛni kunyekɔ ku anumi ani nlɛ-ni lɛlɔ ku lɛla lɛni ɔsu na ɔɔtɛmi ku lɛmɛnɛ bɔkun lɛni aani si butulo na utulo bakladi ƒui.

²¹ Mina anumi lɛlɔ na lise lɛmɛni líse kalɔ liikpóku Katɔti bekyuli baƒunadi, na ɔdaku-ma lɛlɔ bɔdi sɔsɔ.

²² Amu na Unwoti ɔni ntulo ƒui na ɔdi Katɔti ɔni nli uwi ƒui mɛni úbo na úbatɛ litemi na úte nwuna bekyuli baƒunadi bamɛni ubo, ɔsika uwi ɔni na beti lɛga kadikɔ kammɔ bete-ma údu.

²³ Mmɔ na ukyuli ɔni nnye mmɔ ɔ́su-mi ɔnini, “Kebweyi kenedi kammɔ ndi lɛga kadikɔ kenedi kani ndubo kalɔ kammɔ lɛlɔ bɔkya na ɔdubo bɔvumana ku lɛga kɔdikɔ kɔni néebo kúbavi ƒui. Anwu ɔdubo busie bɔvi kalɔ kammɔ ƒui lɛlɔ na utu-ka ugyingya kpɛtɛ kpɛtɛ.

²⁴ Na ese leevu ammɔ ƒui adi baga bani ndubɔsi lɛga kadikɔ kamɛni kemmo. Na ɔga ɔbambadi lɛnɔ ɔdubɔsia-ma kama. Na lise lɛmɛni lɛdubo bɔvumana ku akladi, na ɔdubɔdi baga ɛtɛ bammɔ lɛlɔ.

²⁵ Na ɔga ɔmɛni ɔdubo Katɔti ɔni ntulo ƒui budumi na ɔlɔ-nwu anyikpi. Na ɔdubo Katɔti bekyuli baƒunadi bammɔ kalala bɔbla. Na ɔdubo ulu biala bɔwia ka ɔvumana Katɔti ɔda bubo bɔmmɔ ku emeyi buni bɔdi uwi ɔni bése bése mmɔ. Na ɔdubɔkana na ɔbla ɔmɛni uwi klukui ɔdi aani lɛkwa linwi iye anyɔ ku kakɛ kemmo.

²⁶ “Nsu kawɔlɔkɔ ni, Katɔti ɔdubɔtɛku-nwu litemi na nwuna lɛga kadikɔ kammɔ kabwɛ kayii udu.

²⁷ Ɔmmɔ kama ni, lɛga kadikɔ kani ndi kenengudi ƒui kadububo kete Katɔti ɔni ntulo ƒui bekyuli baƒunadi. Na nwuna lɛga kadikɔ kammɔ kadubuse keteesie uwi ƒui, na bakladi ƒui badubo-nwu lili kalɔ bɔkya na benu-nwu litemi na babla-nwu kabla.”

²⁸ Ala ani na lɛ́nu na línu lɛnɔ kawɔlɔkɔ mɛni. Na ɔ́bla-mi dɛye dɛye ku liƒu, na ɔkya-mi kasusu kemmo kpoo.