Daniel 5 - Katɔti Ɔku Kedee

Ɔga Belsasar Úse Adila Kadikɔ Úte Bekyuli

¹ Limeyi lɛdi useyi uwi ni, Ɔga Belsasar use adila kadikɔ bonwu kadi úte nwuna bakutine benengu mpim mpim, na anwu ku-ma báni ntɛ básala.

² Ntɛ búbo bɔɔda-nwu na ɔ́tala nwuna kabla bablane ɔnii besie na betéti sika ugyiedi ku ɔƒualadi lɛɛƒɛɛ lɛni na ɔti Nebukadnesar ɔ́da úti na Katɔti kakpakɔ na Yerusalem mmɔ beboku. Na ɔɔwia lɛɛƒɛɛ lɛmmɔ kalɛ na anwu ku nwuna beleku ku benengu bani na ɔ́lɔ úboku kadikɔ mmɔ bani ntɛ na nina kemmo.

^3-4 Amu ka béti lɛɛƒɛɛ lɛmmɔ béboku ni, ukyuli biala ɔni nkya adila ammɔ kadikɔ mmɔ ɔ́ni ntɛ na lɛɛƒɛɛ lɛmmɔ kemmo na beemwi baƒiɔ bani na béti sika ugyiedi ku ɔƒualadi ku abuala egyiedi ku atabi ku egyiiku bávɔ iye bánwi mmɔ.

⁵ Mmɔ kani ni, ukyuli lɛnuku lɛdi lɛ́da lɛ́lɛ na bánu ka uunweni ala adi taasia kɔwodu kɔmmɔ lɛlɔ.

⁶ Ɔga ɔmɛni ɔ́yia geen na nwuna anumi ávumana ábla aani ɔlɛne kukuuku ɔdi, na akɔnkɔ aatɔ́-nwu, na nwuna lɛgba ƒui lɛ́bla kpɛtɛ kpɛtɛ.

⁷ Amu na ɔga ɔmmɔ ɔ́kpali nwuna bevone bani mɔɔtɛmiku bekpine ayu ku ama bani mɔɔnu ayabi na beebó like ɔnii bebo. Na ɔ́su banundane bamɛni ɔnini, “Ukyuli ɔni ndubɔkana ala amɛni bɔka na udie-nya kalɔ ute-mi ni, ɔdubunwini ukyuli ɔtɛdi ɔni ndubɔkɛ kenyekɔ ku ɔyikun butulo ƒui na mina lɛga kadikɔ. Na ɔdubo awu ɔni náƒɔ kuye geen butaakya na ɔkya sika ugyiedi kɔsɛɛ ɔkwɛ.”

⁸ Ɔga Belsasar banundane bammɔ ƒui bébo, nsu ɔdi útakana na udie lɛla lɛni na lɛnuku lɛmmɔ línweni mmɔ kalɔ iye ɔkana bɔka muedi.

⁹ Na lɛla lɛmmɔ líkpoku-ma na béƒu benye, anwuɔsu ɔga ɔmmɔ ɔ́sɔ ɔ́yia úbu na nwuna anumi ábla aani ukpine anumi.

¹⁰ Amu uwi ɔni na nwuna uleku ɔga únu lɛla lɛni na ɔga ɔmmɔ ku nwuna banundane badaku ni, úbo úbeduo-ma kudɔ mmɔ na ɔ́su ɔnini, “Ɔga Ɔbune, mɔɔwia ka elie ngba uwi ƒui! Na tayia na ƒula anumi abla ƒuƒuu lɛni.

¹¹ Ukyuli ɔdi ɔkya ƒula lɛga kadikɔ kemmo na baƒiɔ kedee béte-nwu ɔyikun sɛsɛɛ ɔdi. Uwi ɔni na ƒ'ɔti Nebukadnesar ɔdi ɔga ni, uwi ɔmmɔ ƒui na bagyi ka ukyuli ɔmɛni ɔdi ɔnundane na ɔgyi lɛla, na ɔɔnu ala taati pla pla geen aani baƒiɔ bammɔ alati kani. Anwuɔsu na ƒ'ɔti úti-nwu únyene bevone bani mɔɔtɛmiku bekpine ayu ku ama bani mɔɔnu ayabi na beebó like mmɔ ƒui kenye.

¹² Na ɔ́vumana-nwu lɛnyi lɛnɔ ɔ́sia ɔnii Beltesasar. Na ɔɔɔdi anu kani na ɔ́da na ɔgyi lɛla, mmomu ɔɔkana na uudie ana ku agyolo lɛnɔ kalɔ, na lɛla biala na libo ɔkplu dɛ ni, ɔɔkɛ́-ni kakwɛ. Anwuɔsu tala na batálɔ Daniel beboku na ɔdubudie ala bunweni bɔmmɔ kalɔ.”

¹³ Amu ka bátákpanku Daniel béboku ni, ɔga ɔmmɔ ɔ́su ɔnini, “Básu-mi ka awɔ ndi Daniel ɔni nkya bekyuli beƒiedi bani na mina ɔti ɔ́kpanku ɔ́siku Yuda kalɔ lɛlɔ úboku mɛni akɔ!

¹⁴ Muunú ka baƒiɔ béte-ɔ ɔyikun sɛsɛɛ ɔdi ɔni náya na áda anu na agyi lɛla geen.

¹⁵ Mina banundane ku bekyuli bani mɔɔtɛmiku bekpine ayu ɔdi útakana na udie ala ani na bénweni básia mɛni bɔka iye ana kalɔ budie búte-mi.

¹⁶ Nsu básu-mi ka awɔ agyi lɛla biala na aakɛ́ ala ani na ebo ɔkplu geen muedi kasusu. Na ɔƒɛni ni, si ákana na áka ala amɛni na édie-nya kalɔ lɛnɔ éte-mi ni, adubo bunwini ukyuli ɔtɛdi ɔni ndubunye kenyekɔ kenengudi na ubo ɔyikun geen lɛnɔ na mina lɛga kadikɔ. Na adubo awu ɔni náƒɔ kuye geen butaakya na akya sika ugyiedi kɔsɛɛ ɔkwɛ.”

¹⁷ Amu na Daniel údie kenye ɔnini, “Ɔga Ɔbune, ndubɔka ala ani na bénweni básia mmɔ na lidie-nya kalɔ lɛnɔ, nsu ƒula etela ni, eteese-ɔ iye ti-nya te ukyuli bamba ɔni na aayɔ́.

¹⁸ “Ati, Katɔti Ɔni Ntulo Ƒui ɔ́bla na ƒ'ɔti únwini ɔyikune geen na ɔ́ƒɔ lɛnyi na ɔ́ya na bekyuli baabu-nwu na uukeye lɛnɔ.

¹⁹ Ala enengudi ammɔ udu na Katɔti ɔ́bla úte-nwu na ɔ́bla kayawi adi lidu batɛmine ƒui dɛye dɛye, na lɛlɔ lɛ́tɔ-ma ku bɔyia geen. Ƒ'ɔti ɔ́kɛ ɔyikun geen na ukyuli biala lɛlɔ ɔni na ɔkana na ɔya na elie ngba iye ɔya na badu-ɔ muedi, na ɔkana na ɔkɔliku-ɔ katɔ iye ɔyila-a udu kalɛ biala na ɔ́su na ɔdi-nwu lɛƒɔyɔ.

²⁰ Nsu ka úbo ɔɔbla atuɔkplu na ɔɔtalaku lɛlɔ katɔ na ɔsɔ ulabu Katɔti ni, úkpeli nwuna lɛgadi lɛmmɔ ɔ́lɛku-nwu lɛkɔkɔ.

²¹ Nwuna kasusu kénwini ebuo kadi, na bábɔku-nwu na ɔ́lɛ bekyuli akɔ úsie uliku alakpi akɔ bebuo na ɔ́kun livo aani ɔmantɛ bakɔ. Na alakpi akɔ mmɔ kani na ɔɔtɛ, na amii eewi-nwu. Bénye-nwu lɛlɔ na ɔ́bla ɔmɛni úti útédu uwi ɔni na ɔ́nu ɔ́ti ka Katɔti Ɔni Ntulo Ƒui mɔɔdi kayawi lɛga kɔdikɔ ƒui lɛlɔ. Na anwu kani muudie lɛlɔ badine bani na ɔ́ƒuna ka badi lɛga.

²² “Ɔga Belsasar, agyi ala amɛni ƒui na adi átabɛ-ɔ, nsu ébulo anii eleboku lɛlɔ kalɔ.

²³ Mmomu áta énye Unwoti ɔni nli mɔɔdi lɛlɔ ɔ́siku katɔ ƒui lɛlɔ, na áya na bététi lɛɛƒɛɛ lɛni nse nwuna kakpakɔ béboku mɛni. Na awɔ ku ƒula beleku ku bakutine benengu bɛ́ni ntɛ na nina kemmo. Na binye biimwi baƒiɔ bani na béti sika ugyiedi ku ɔƒualadi ku abuala egyiedi ku atabi ku egyiiku bávɔ iye bánwi, ina ka ala amɛni elenu na alanu iye alákana kasusu buti muedi. Ébulo anii alakya lili kalɔ elete Katɔti ɔni muute-ɔ ɔƒɛƒɛɛ ɔni na aanwuna na ɔɔdi ƒula lɛla biala na aabla lɛlɔ.

²⁴ Anwuɔsu na ɔ́tala kɔnu kɔmɛni ɔnii uti kenye kamɛni uboku-ɔ na únweni lɛla lɛmɛni ɔ́sia-a kowodu lɛlɔ.

²⁵ “Na etemila ani na bénweni básia mmɔ ndi MENE, MENE, TEKEL, PARSIN

^26-28 “Na Mene ni, nwuna kalɔ ndi báka ƒula emeyi bumomo. “Tekel ni, bánu-nya unu. “Parsin ni, ásɔ na béle-nya kemmo. “Na ɔɔtina ka Katɔti ɔ́ka ƒula lɛga kadikɔ kammɔ emeyi na asɔ eeemomo, na ɔ́ya na ébo kawɔlɔkɔ. Na ɔ́kɔku ƒula unu lɛnɔ na nwuna unu lɛkɔkula lɛlɔ, na étedu kalɛ na akana na adi lɛga. Anwuɔsu Katɔti úle ƒula lɛga kadikɔ kammɔ kemmo úte Mediaƒuɔ ku Persiaƒuɔ.”

²⁹ Mmɔ kani ni, Belsasar údie lɛdi ɔnii beti Daniel benyene ɔyikun kenye katɛdi lɛlɔ na nwuna lɛga kadikɔ na beti awu ɔni náƒɔ kuye geen mmɔ bakya-nwu na bakya-nwu sika ugyiedi kɔsɛɛ ɔkwɛ.

³⁰ Amu na usien ɔmmɔ kani lɛlɔ ni, bádu ɔga ɔmmɔ.

³¹ Na Mediani ɔni baalɔ banii Dario úti nwuna lɛga kadikɔ kammɔ. Na Dario ɔmɛni ni, ɔ́ɔƒɔ akwa liti ku leevu-inyɔ na uwi ɔmmɔ kemmo.