Daniel 12 - Katɔti Ɔku Kedee

Bekpine Badubɔsɔ Bata Bebelie Ngba

¹ “Uwi ɔmmɔ kemmo ni, ƒula kadi bekyuli ɔgyumanane unengu ƒui, Mikael ɔni na Katɔti ɔdubɔtala ni, ɔdubɔta ubo. Na lɛbibo kpakplaa lɛni udu nétebo tɔ kudii ɔ́si kalɔ kesekɔ lɛdubɔlɛ. Na ukyuli biala ɔni na nwuna lɛnyi lɛkya ngba ɔku kemmo ni, ɔdubo-nwu bɔgyumana.

² Na bekyuli pii bani néekpi na bakya kekpine badubɔsɔ bata. Na Katɔti ɔdubɔya na bana badi belie ngba bɔni nsɔ naaadubo bɔsa kudii. Na ɔya na kɔƒa kukpo badi na anumi ewi-ma kalɔ uteesie uwi.

³ Na bani ƒui náda anu na bana ngba bulie kemmo ni, badubukeye kede kede aani kayaa kani bɔɔnu. Na bani lɛnɔ na bátɔnku bekyuli na bábla Katɔti lɛyɔla ni, badubukeye aani ayabi.

⁴ “Na ɔƒaani ni, Daniel, muubo-ɔ ɔda ka abɛla linyesia lɛni na ɔku ɔmɛni ɔdanku uti utédu uwi ɔmɛni kawɔlɔkɔ, ina ka bekyuli pii badubɔsia ulu biala lɛlɔ na kesi kesii banii baawia bati lɛla lɛni nkya ɔku ɔmmɔ kemmo.”

Lɛla Lɛdi Lɛdubɔlɛ Na Uwi Ɔmmɔ Kawɔlɔkɔ

⁵ Mmɔ na ami, Daniel, lɛ́nu lɛ́mana na lɛ́nu ka nkyuli inyɔ bamba badi benye. Unwi unye ketu ɔvi ɔmɛni na unyɔdi lɛnɔ unye ɔvi ɔni ngye.

⁶ Na Katɔti ɔtu ɔni nátɛmiku-mi unye sɛsɛɛ ɔ́siku-ma kudɔ na ketu kammɔ katɔ kakɛ na ɔkya awu ɔni náƒɔ kuye. Mmɔ na nkyuli inyɔ bani nnye lituvi inyɔ bɔmmɔ akɔ unwi úye ɔtu ɔmmɔ ɔnini, “Uwi ɛlɛ násɔ úbu asa na ala enengudi amɛni adubɔlɛ?”

⁷ Amu na Katɔti ɔtu ɔmmɔ ɔ́kɔliku nwuna enu anyɔ katɔ na ɔ́su ɔnini, “Na Katɔti ɔni nli ngba uwi ƒui lɛnyi kemmo ni, muusé kenye kpakplaa ka lɛkwa linwi ku akwa anyɔ ku kakɛ. Na lɛla biala lɛdububo kawɔlɔkɔ uwi ɔni na Katɔti bekyuli lɛbibo lɛmmɔ lɛdubɔsa.”

⁸ Línu lɛla lɛni na Katɔti ɔtu ɔmmɔ ɔ́su, nsu ńtenu-ni kalɔ. Anwuɔsu líye-nwu nnini, “Ati dɛ na ala ammɔ adubo bɔlɛ?”

⁹ Mmɔ na údie kenye ɔnini, “Daniel, sie anumi na enye ataabla ƒula kabla, ɔsika linyesia lɛmɛni kalɔ bunu bɔdubɔbla lɛbɛla uti utédu uwi ɔmmɔ kawɔlɔkɔ.

¹⁰ Bekyuli pii badubɔda bana ngba sɛɛn na babla bana kɔyi lɛnɔ kedee. Nsu bekyuli bekpidi ama ni, bana likyulikpi ala bɔbla lɛlɔ kani na badubo bunye, na baaadubo ɔmɛni kalɔ bunu kudii. Banundane kani ndubo kalɔ bunu.

¹¹ “Na ɔ́si uwi ɔni na badubo bɔda limeyi ndi limeyi akpala bɔbla baya útédu uwi ɔni na badubuti lɛla lɛni na Katɔti uukisi na liisé lɛlɔ bebese mmɔ ni, ɔdubɔbla emeyi apim unwi ku emeyi eti alɔ ku aavlene (1,290).

¹² Ukyuli biala na ɔ́kɛ kayii buɛɛ útédu ka emeyi apim unwi ku emeyi eti aku ku avlaatɛ-alɔ (1,335) ávi ni, Katɔti ɔdubute ukyuli ɔmmɔ kusɛ kusɛ.

¹³ “Anwuɔsu ni, Daniel, siaku ƒula Katɔti kama siin na talɛ-nwu kama uti utédu kawɔlɔkɔ! Adubo bɔnwuna na asɔ ata alɛ kekpine abáƒɔ ƒula lɛyuƒɔla.”