Baga 2 23 - Katɔti Ɔku Kedee

Ɔga Yosia Úgyingya Akpabi Ani Ƒui Bátu Bálɛ

¹ Amu na Ɔga Yosia ɔ́ya bálɔ batɔnkune bani ƒui nkya Yuda ku Yerusalem,

² na ɔ́ya bésie na bátása na kakpakɔ. Mmɔ mmɔ na bakpane ku kenye bediene ku bekyuli bakladi ƒui ku balakɛne ku bawabane ƒui bébo bábasala. Na bekyuli bammɔ ƒui anumi ni, ɔga ɔmmɔ úti ɔda bubo ɔku ɔni na bánu na kakpakɔ mmɔ na ɔ́ka ɔku ɔmmɔ úte-ma na bénu.

³ Na ɔ́ta na úténye bagadine kenyekɔ na únyimiku Unwoti ka ɔdubunu-nwu litemi. Na úti nwuna kɔyu ku kayi ƒui utaadi etemila ammɔ lɛlɔ, na unye utaabla ala ani ƒui ɔda bubo bɔmmɔ bɔɔtina. Na bekyuli bammɔ ƒui bése kenye ka badubɔdi ɔda bubo bɔmmɔ lɛlɔ.

⁴ Ɔmmɔ kama ni, Ɔga Yosia ɔ́ya ɔkpane unengudi Hilkia ku nwuna ɔmansiane ɔkpane ku bagyumanane bani nkya mɔɔbla kabla na kakpakɔ kayakun ka bedie baƒiɔ Baal ku Asera baƒiɔ ku ala ani bada baakpá ayabi na ese kakpakɔ mmɔ balɛku. Amu na ɔga ɔmmɔ ɔ́kyula ala ammɔ ƒui na Kidro ɔma kɔwɛ kabanye. Na béti ntɔ bɔmmɔ bésienku Betel.

⁵ Na ɔga ɔmmɔ ɔ́bɔku bakpane bani Yudaƒuɔ ɔga úti úse ka bataabla akpabi akpala na Yuda abi eli ku Yerusalem amadɔ. Na ɔ́sɔ ɔ́bɔku bakpane bani ƒui baabla akpala teete Baal ku ɔƒɛ ku kɔbuli ku ayabi ku ala bamba akladi.

⁶ Na ɔ́da Asera ɔƒiɔgyii údie kakpakɔ mmɔ úsienku Kidron Kɔwɛ na útákyula-nya. Na úti ntu ɔ́nwu ntɔ bɔmmɔ kpɛtɛ kpɛtɛ na útakuna-nwu úwi bekyuli kavakɔ.

⁷ Na ɔ́ya na bégyingya ɔtɔ ɔni bátu béte banana bayalɛ na kakpakɔ mmɔ. Na mmɔ na beleku bani muudi Asera baƒiɔ lɛwu bakya.

⁸ Amu na Yosia ɔ́kpanku bakpane bani ƒui nkya Yuda, na úgyingya akpabi ani ƒui nkya ɔ́si Geba útédu Beer-Seba na kesii kani na bakpane bammɔ baakyula oloƒui. Na ɔ́sɔ ɔ́ƒɛ baƒiɔ lɛtɔ lɛni bátu bálɛ kɔyakun si ási kayakun kani baalɔ Yosua Kayakun adubo na kesii kani na ɔma unengudi lɛlɔ ɔnune kayakun kakya na kɔmii kakɛ.

⁹ Na kuƒi kuuubo bakpane bammɔ ka babla bakpane kabla na kakpakɔ mmɔ. Nsu bebo kuƒi ka badi bodobodo ɔni néteƒu ɔni béti béte bana bakpane kpana.

¹⁰ Na Ɔga Yosia ɔ́sɔ úbie Toƒet ɔni nnkya Hinom Kɔwɛ kalɛ na ukyuli biala ɔ́sɔ ulákɛ kuƒi na uti ubidi ulekubi iye ɔnanabi utábla bɔkyula akpala ute Molek baƒiɔ lɛnɔ.

¹¹ Na ɔ́sɔ ɔda bapɔnkɔ bani na Yudaƒuɔ ɔga úti úte ka béti bataakpa ɔƒɛ údie. Na ɔ́kyula bapɔnkɔ kɛɛkɛ bani na bédie bése béte ɔƒɛ baƒiɔ bammɔ. Na béti bapɔnkɔ bammɔ bákya kakpakɔ amadɔ na kayakun kudɔ. Na útagyunku unengu ɔni baalɔ banii Natan-Melek kesii.

¹² Na akpabi ani na Yudaƒuɔ baga bátu bálɛ Ɔga Ahas ɔtɔ eli ni, Ɔga Yosia ɔ́ƒɛ-nya ɔ́salaku akpabi ani na Ɔga Manase ɔ́tu. Na úgyingya akpabi ammɔ na úƒwimi-nya útákya Kidron Kɔwɛ kemmo.

¹³ Na Ɔga Yosia úbile akpabi ani na Ɔga Salomo ɔ́tu ɔ́lɛ ɔƒɛ katukɔ kakɛ na Oliƒ Kɔbi kada kakɛ. Nka akpabi ammɔ lɛlɔ na bátaakpa Sidon baƒiɔ bani baalɔ banii Astarot, ku Moab baƒiɔ Kemos, ku Amon baƒiɔ Molek.

¹⁴ Na Ɔga Yosia ɔ́kɔ atabi ammɔ kpɛtɛ kpɛtɛ ɔ́bla ɔtumu, na ɔ́gyu Asera liƒiɔgyii lɛmmɔ údie. Na kesii kani na ɔ́gyu ligyii lɛmmɔ údie ni, úti bekyuli ekubi útébile bana ekisila na mmɔ.

¹⁵ Na Ɔga Yosia ɔ́sɔ úgyingya akpabi ani lɛlɔ na baakpá na Betel na Nebat ubidi Ɔga Yerobeam ɔ́tu ɔ́lɛ mmɔ uwi ɔni na ɔ́kpanku Israelƒuɔ útákya likpidi kemmo. Ɔga Yosia ɔ́ƒɛ lɛkpa lɛmmɔ na ɔ́bwɛ atabi ammɔ na ɔ́kɔ-nya ɔ́bla ntɔ. Na ɔ́kyula Asera baƒiɔ bani bávɔ bálɛ mmɔ.

¹⁶ Ɔmmɔ kama ni, Ɔga Yosia ɔ́tɛ anu ɔ́mana na ɔ́nu kɔƒiɔtɔ kɔdi na abi lɛlɔ na ɔ́ya bétéku ekubi ani nkya kɔƒiɔtɔ kɔmmɔ kemmo béboku. Na ɔ́ya bákyula-nya béwi akpabi ammɔ lɛlɔ. Na lɛni na úti úbile lɛkpabi lɛmmɔ ekisila aani kalɛ na kenye udiene ɔdi ɔ́su kukuuku úbavi uwi ɔni na Ɔga Yerobeam únye lɛkpabi lɛmmɔ kudɔ ɔɔbla akpala. Ɔmmɔ kama ni, Ɔga Yosia ɔ́sɔ ɔ́tɛ anu ɔ́mana na ɔ́nu kaƒiɔtɔ kani báva kenye udiene ɔni násu litemi lɛmmɔ.

¹⁷ Amu na Ɔga Yosia úye ɔnini, “Ɔma kaƒiɔtɔ kadi ngye?” Amu na Betel bakyuli bammɔ bédie kenye banini, “Kenye udiene ɔdi ɔni nási Yuda kadi na kadi. Anwu násu úse lɛla lɛni na ábla na lɛkpabi lɛmɛni lɛlɔ.”

¹⁸ Amu na Ɔga Yosia úbo-ma ɔda ɔnini, “Biteku nwuna likubi. Mmomu bɛnyonu-nya na eteese kalɛ kani na ese.” Ɔmmɔ ɔsu, béteku nwuna likubi iye kenye udiene ɔni nási Samaria ɔdi.

¹⁹ Na Israel ɔma biala ni, Ɔga Yosia úgyingya akpabi ani ƒui Israelƒuɔ bátu bálɛ na ákya Unwoti kɔnyi. Na lɛni na ɔ́bla akpabi ani ƒui nkya Betel.

²⁰ Na ɔ́du bakpane bani ƒui mɔɔkpá na akpabi ammɔ lɛlɔ uwi-nya lɛlɔ. Na ɔ́kyula ekubi úwi akpabi ammɔ ƒui lɛlɔ. Na ɔmmɔ kama únwini úsie Yerusalem.

Ɔga Yosia Ɔ́di Kukpi Lili Bɔvia Limeyi

²¹ Na ɔmmɔ kama ni, Ɔga Yosia úbo bekyuli bammɔ ɔda ka badi Kukpi Lili Bɔvia Limeyi bete Unwoti aani kalɛ na bénweni bákya ɔda bubo ɔku kemmo mmɔ.

²² Na bátadi Kukpi Lili Bɔvia Limeyi libendi lɛmɛni udu kudii úti ɔ́si uwi ɔni bése Israelƒuɔ baga útédu uwi ɔni na litemi batɛne baadi Israel lɛlɔ.

²³ Nsu na Ɔga Yosia lɛga bɔdi lɛkwa leevu-maanedi kemmo ni, bádi-ni bete Unwoti na Yerusalem.

Ɔga Yosia Ɔ́sɔ Ɔ́bla Kavumana Kadi

²⁴ Kalɛ na ɔda bubo ɔku ɔni na ɔkpane Hilkia ɔ́nu na kakpakɔ mmɔ ɔ́su kpakplaa ɔsu ni, Ɔga Yosia ɔ́bɔku bekyuli bani muubó like ku bekyuli bani muuye ala teenu ɔ́lɛku Yerusalem ku Yuda lɛma lɛkladi kemmo. Na úbile kɔduli baƒiɔ ku baƒiɔ lɛtɔ ka ala ani ƒui muusé lɛlɔ mmɔ.

²⁵ Na ɔga ɔdi útelie aani Ɔga Yosia ɔni na úti nwuna kayi ƒui ku kɔyu ƒui ku ɔlɔkplu ƒui ɔ́siaku Unwoti kama, na ɔ́di Mose ɔda bubo etemila ƒui lɛlɔ. Na ɔga ɔdi lɛnɔ útalɛ-nwu kudii.

²⁶ Nsu Unwoti kɔnyi kúbakɔ na Yudaƒuɔ lɛlɔ ɔ́si lɛla lɛni na Manase ɔ́bla ɔ́su, na kɔnyi kútebo kalɔ.

²⁷ Unwoti ɔ́su ɔnini, “Ndubɔbla Yudaƒuɔ lɛla lɛni na lɛ́bla Israelƒuɔ. Na ndubukulo Yudaƒuɔ lidie mina anumi na lini Yerusalem ɔma unengudi ɔni lɛ́ƒuna na lɛ́su ka batu mina kakpakɔ balɛ na bataakpa-mi mmɔ.”

Ɔga Yosia Kawɔlɔkɔ

²⁸ Na ala bamba ani na Ɔga Yosia ɔ́bla ni, bénweni-nya bákya Yudaƒuɔ baga lɛlɔ kɔtɛ ɔku kemmo.

²⁹ Uwi ɔni Yosia ɔɔdi lɛga ni, Egyipteƒuɔ ɔga ɔ́kpanku nwuna bekpone na béténye Euƒrate Ketudɔ ka ubunku Asiriaƒuɔ ɔga kekpo. Na Ɔga Yosia ɔ́kya ɔkplu ka unye utile Egyipteƒuɔ bekpone bammɔ na Megido. Nsu úkpi na kekpo kammɔ kemmo.

³⁰ Na nwuna kabla bablane béti nwuna ukpine básia ɔpɔnkɔ kɛɛkɛ lɛlɔ bésienku Yerusalem. Na bátáva-nwu na baga kavakɔ. Na Yudaƒuɔ báƒuna Yosia ubidi Yehoahas na béti-nwu bése lɛga.

Yehoahas Ɔ́di Lɛga Na Yuda

³¹ Na Yehoahas ɔ́kɛ akwa aavlanyɔ-atɛ asa na bése-nwu lɛga na Yuda. Na ɔ́di lɛga lɛmmɔ na Yerusalem abuli atɛ. Na uni baalɔ banii Hamutal ɔni ndi Yeremia ubidi ɔni nási Libna.

³² Na anwu lɛnɔ ɔ́siaku nwuna bati kuuku ɔbladu kama. Anwuɔsu anwu lɛnɔ ɔ́bla likpidi na Unwoti anumi.

³³ Na nwuna lɛgadi líbo kawɔlɔkɔ uwi ɔni na Egyipteƒuɔ Ɔga Neko úti-nwu útákya aban ɔtɔ na Ribla na Hamat kalɔ lɛlɔ. Na Egyipteƒuɔ ɔga ɔ́ya na Yudaƒuɔ baaƒɔ sika ɔƒualadi mpim maatɛ eti leevu (7,500) ku sika ugyiedi liti ku aavlanyɔ-ɛlɔ teete Egyipteƒuɔ ɔga.

³⁴ Na Ɔga Neko ɔ́ya na Yosia ubidi Eliakim ɔbla ɔga na Yuda, na ɔ́ya na úlie ɔti keliekɔ. Na ɔ́vumana-nwu lɛnyi ɔ́bla Yehoiakim. Na Ɔga Neko úti Yehoahas útákya Egyipte kalɔ lɛlɔ, na mmɔ na útékpi.

Bése Yehoiakim Lɛga Na Yuda

³⁵ Na Yehoiakim ɔ́ƒɔ kuyi ɔ́siku Yudaƒuɔ bammɔ kudɔ kalɛ na ɔdi biala lɛkɛ lise. Na úti ɔ́ƒɔ kayu kani na Egyipteƒuɔ ɔga úkulo úte-ma mmɔ.

³⁶ Na Yehoiakim ɔ́kɛ akwa aavlanyɔ-alɔ asa na bése-nwu lɛga na Yuda. Na ɔ́di lɛga lɛmmɔ na Yerusalem akwa leevu-unwi. Na uni ndi Pedaia ubidi Sebuda ɔni nási Ruma.

³⁷ Na anwu lɛnɔ ɔ́siaku nwuna bati kuuku ɔbladu kama, na ɔ́bla likpidi na Unwoti anumi.