Baga 2 22 - Katɔti Ɔku Kedee

Yosia Ɔ́di Lɛga Na Yuda

¹ Akwa maane na Yosia ɔ́ƒɔ asa na úbenwini Yudaƒuɔ ɔga. Na úlie Yerusalem ɔ́di lɛga akwa avlaatɛ-unwi. Na uni ndi Adaia ubidi Yedida ɔni nási Boskat.

² Na Yosia ɔ́bla lɛla lɛni náƒɔ Unwoti anu. Na ɔ́siaku ɔti kuuku Ɔga Dawid ɔbladu kama siin. Na ɔ́di Katɔti ɔda bubo ƒui lɛlɔ.

Bánu Unwoti Ɔda Bubo Bɔni Náyii Mmɔ

³ Na lɛkwa leevu-maanedi kemmo na Ɔga Yosia lɛga bɔdi uwi ni, ɔ́tala ɔku unwenine Saƒan ɔni ɔti ndi Asalia ɔni ɔti ndi Mesulam, ka úsie kakpakɔ na utánu ɔkpane unengudi Hilkia na ɔsu-nwu ɔnini,

⁴ “Nu ɔkpane ɔni muunye kakpakɔ kayakun taaƒɔ bekyuli egulabi. Na eye-nwu enu egulabi ani na ɔ́ɔkɛ.

⁵ Na asu-nwu na uti egulabi ammɔ ƒui ute bekyuli bani mɔɔklibi kakpakɔ kammɔ.

⁶ Na beti baƒɔ bekyuli bani mɔɔtú kayu na bedie ɔdi baƒɔ kugyiikɛ ku atabi ani béye béti baaklibi kakpakɔ kammɔ.

⁷ Na bekyuli bani mɔɔbla kakpakɔ kabla kammɔ ni, baabla ala ulu lɛlɔ. Anwuɔsu útamanku ka babu egulabi ammɔ akunta adi.”

⁸ Na Saƒan ɔ́su Hilkia ɔga kenye kammɔ. Na Hilkia lɛnɔ ɔ́su-nwu ɔnini, “Lɛ́nu ɔda bubo ɔku ɔmmɔ na kakpakɔ mmɔ.” Na Hilkia úti ɔda bubo ɔku ɔmmɔ úte Saƒan. Na Saƒan ɔ́ka ɔku ɔmmɔ.

⁹ Ɔmmɔ kama Saƒan únwini úsie Ɔga Yosia kudɔ na útásu-nwu ɔnini, “Ƒula benengu béti kakpakɔ egulabi ammɔ bésienku bekyuli bani nkya mɔɔklibi kakpakɔ kammɔ.”

¹⁰ Na ɔ́sɔ ɔ́su ɔga ɔmmɔ ɔnini, “Aanu ɔku ɔni na ɔkpane Hilkia úti úte-mi.” Amu na Saƒan ɔ́ka ɔku ɔmmɔ kemmo etemila úte ɔga.

¹¹ Uwi ɔni na Ɔga Yosia únu etemila ammɔ ni, ɔ́ta na ɔ́ni nwuna adala ɔ́bwɛ.

¹² Na ɔga úbo ɔda úte ɔkpane Hilkia ku Ahikam ubidi Saƒan ku Mikaia ubidi Akbor ku ɔku unwenine Saƒan ku kabla ɔblane Asaia ɔda ɔnini,

¹³ “Bisie na bitánu Unwoti bite ami ku Yudaƒuɔ ƒui lili ku ala ani na ɔku ɔmɛni kemmo etemila aasu. Ɔsika Unwoti úti kɔnyi ɔ́kya-bu ka bula bati kuuku bátabla bátasiaku ala ani na ɔku ɔmɛni kemmo etemila aasu ka bɔbla.”

¹⁴ Na ɔkpane Hilkia ku Ahikam ku Akbor ku Saƒan ku Asaia bésie uleku Kenye Udiene Hulda ɔni nli Yerusalem ɔvi unyɔdi kudɔ. Na ɔgyani baalɔ banii Salum, na ɔti baalɔ Tikwa. Na nwuna nana ɔti baalɔ Harhas, na anwu mɔɔnu kakpakɔ kammɔ lɛnu batune lɛwu lɛlɔ. Na básu uleku Kenye Udiene ɔmmɔ lɛla lɛni nálɛ.

¹⁵ Na uleku ɔmmɔ ɔ́su-ma ka benwini beteesie,

¹⁶ ɔsika lɛni na Unwoti ɔɔsu ɔnini, “Ndubo Yerusalem ku bekyuli bani nkya mmɔ bɔkyula aani kalɛ na bénweni bákya ɔku ɔni na ɔga ɔmmɔ ɔ́ka kemmo.

¹⁷ Ɔsika bekyuli bammɔ béni-mi na bábla akpala béte benwoti babambadi. Na ɔkɛnku ala ani bábla mmɔ ɔsu bákya-mi kɔnyi. Na lɛ́kɛ kɔnyi kɔni na kulebo kalɔ na Yerusalemƒuɔ lɛlɔ.

¹⁸ Nsu ɔga ɔmmɔ ɔlati amu ni, lɛni na ami Unwoti ɔni ndi Israelƒuɔ Katɔti mɔɔsu nnii, ‘Lɛ́nu lɛ́ti ka énu etemila ani bénweni bákya ɔku ɔmmɔ kemmo.

¹⁹ Na ávumana kayi na éboku lɛlɔ kalɔ éte-mi. Na áni ƒula adala ábwɛ na akya eewulo uwi ɔni na énu ásiku ɔku ɔmmɔ kemmo ka ndubo Yerusalem ku bekyuli bammɔ ƒui kɔtu bɔni na lɛbla-ma aani ewida lɛla. Anwuɔsu línu ƒula katɔ bɔkpali.

²⁰ Na kɔtu kɔni ndubo Yerusalem bɔni mmɔ ni, kɔdububo ƒula kekpima. Na ndubɔya na ekpi ku atubɔyɔ.’ ” Amu na bekyuli bammɔ bénwini bésie Ɔga Yosia kudɔ na bátásu-nwu kenye kammɔ.