Baga 2 18 - Katɔti Ɔku Kedee

Hesekia Ɔ́di Lɛga Na Yuda

¹ Na lɛkwa lɛtɛdi lɛni kemmo na Ela ubidi Hosea ɔɔdi lɛga na Israel ni, bése Ahas ubidi Hesekia lɛnɔ lɛga na Yuda.

² Na ɔ́ɔkɛ akwa aavlanyɔ-alɔ asa na úbenwini ɔga. Na ɔ́di lɛga lɛmmɔ na Yerusalem akwa aavlanyɔ-yaalenwi. Na uni ndi Sakaria ubidi Abi.

³ Na ɔ́siaku ɔti Dawid ɔbladu kama. Na ɔ́bla ala ani na Unwoti ɔɔyɔ́.

⁴ Na ɔ́bwɛ aƒiodu ani na abi eli mmɔ ƒui, na ɔ́ƒɛ atabi kedee lɛƒiɔgyii lɛni na bálɛ béte Asera baƒiɔ mmɔ. Na lɛbualagyie lɛni na Mose úti ɔ́vɔ kɔlakpi mmɔ ni, úbo-ni ɔ́bwɛ, ɔsika Israelƒuɔ baakyula oloƒui teete-ni. Na baalɔ-ni Nehustan.

⁵ Hesekia ɔ́ƒɔ Unwoti ɔni ndi Israelƒuɔ Katɔti ɔ́di. Ɔmmɔ ɔsu, Israelƒuɔ básɔ bátakɛ ɔga ɔni nse lɛni kudii na nwuna lɛga bɔdi kama.

⁶ Na ɔ́bla ala siin na Unwoti anumi na útalɛ-nwu kama kudii. Na ɔ́nu kaduɛ na ɔ́di ɔda bubo bɔni na Unwoti úti ɔ́siaku Mose lɛlɔ ƒui.

⁷ Anwuɔsu na Unwoti úlieku-nwu. Na lɛla biala na ɔ́bla ni, lɛ́tɛ líte-nwu. Na limeyi lɛdi ni, ɔ́ta unye Asiriaƒuɔ ɔga lɛlɔ na úni ka ɔkya-nwu kalɔ.

⁸ Na úkpo ɔ́di Ƒilistiƒuɔ lɛlɔ. Na úkpeli bana ala ani bébo ku ani nse-ma ƒui ɔ́ƒɔ. Ɔ́si ɔma kagyumanakɔ útédu ɔma unengudi ɔni na bátu awodu bámana. Na Gasa ku lɛma lɛni nkya-nwu amadɔ ƒui libunku.

⁹ Na lɛkwa linedi lɛlɔ ɔni na Hesekia ɔɔdi lɛga na ɔdi lɛkwa maatɛdi ka Israelƒuɔ Ɔga Hosea lɛnɔ ɔɔdi lɛga ni, Asiria Ɔga Salmaneser útékpo úduo Israel kalɔ lɛlɔ na ɔ́ka Samaria ɔma ɔ́kya.

¹⁰ Na lɛkwa lɛtɛdi lɛni na ɔ́ka Samaria ɔ́kya mmɔ ni, bádi Samariaƒuɔ lɛlɔ na Hesekia lɛga bɔdi lɛkwa lɛkundi kemmo. Na ɔdi lɛkwa yaalenwidi ka Israelƒuɔ Ɔga Hosea ɔɔdi lɛga.

¹¹ Asiriaƒuɔ ɔga úƒie Israelƒuɔ úsienku Asiria kalɔ lɛlɔ, na ɔ́ya na bétélie Hale na Gosan kalɔ kemmo na Habor Ketudɔ ku Media lɛma kemmo.

¹² Békpo bádi Samariaƒuɔ lɛlɔ, ɔsika Israelƒuɔ bátadi bana Unwoti Katɔti litemi lɛlɔ. Na ɔda ɔni na úbo-ma ɔ́siaku Mose ɔni ndi Unwoti kabla ɔblane lɛlɔ ni, bátadi ɔdi biala lɛlɔ. Na béni muedi ka benu ɔda bubo bɔmmɔ na badi-nwu lɛlɔ.

¹³ Na lɛkwa leevu-linedi kemmo ɔni na Hesekia ɔɔdi lɛga ni, Asiriaƒuɔ Ɔga Sanaherib útékpoku Yuda lɛma linengudi lɛni na bátu awodu bámana ƒui na úƒie-ni ɔ́ƒɔ.

¹⁴ Amu na Hesekia ɔ́sia kenye úmene Asiria ɔga na Lakis ɔnini, “Lɛ́bla lɛla lɛni naaadia. Ɔmmɔ ɔsu da ƒula bukpoku bɔni na aayɔ́ ka ebekpoku-bu mmɔ ya. Na lɛla biala na aawia asiku-mi kudɔ ni, ndubute-ɔ.” Anwuɔsu Asiriaƒuɔ ɔga ɔmmɔ únye Ɔga Hesekia lɛlɔ ka uti sika ɔƒualadi antabi aƒo eti anyɔ unu ku sika ugyiedi antabi aƒo leevu unu uboku-nwu.

¹⁵ Na Hesekia úti sika ɔƒualadi ɔni ƒui nkya kakpakɔ kavumii ku ɔga kavumii kemmo,

¹⁶ na ɔ́sɔ útámami sika ugyiedi ɔni mma Unwoti kakpakɔ kɔyakun lɛlɔ ku kɔni na anwu ɔlati úti ɔ́mana kɔyakun kɔlɛmikɔ mmɔ lɛlɔ. Na úti ala ammɔ ƒui úte Asiriaƒuɔ ɔga.

Sanaherib Ɔ́kya Yerusalemƒuɔ Liƒu

¹⁷ Ɔmmɔ kama ni, Asiriaƒuɔ ɔga úti bekpone batɔnkune lidu ɛtɛ ɔ́siku nwuna bekpone akɔ na bátɔnku bekpone pii badi básiku Lakis na bésie Ɔga Hesekia kudɔ na Yerusalem. Na ka bétéduo Yerusalem ni, béduo ɔkwalɛ ulu ɔni na ntu bɔɔsí teetéwi ligyu lɛni nnye katɔ kakɛ kemmo.

¹⁸ Mmɔ na benengu bamɛni bátala ka batálɔ Hesekia. Amu na Hesekia ɔ́tala Hilkia ubidi Eliakim ɔni mɔɔnu ɔga kaduli lɛlɔ ku Sebna ɔni ndi litemi bɔtɛ ɔku unwenine ku Asaƒ ubidi ɔni mɔɔnu kɔkunkɛ kemmo ka besie na batásiaku bekpone bammɔ.

¹⁹ Mmɔ na Asiriaƒuɔ bekpone bammɔ unengu ɔ́su-ma ɔnini, “Bɛsu Ɔga Hesekia bɛnini, “ ‘Lɛni na Ɔga ɔyikune Asiriaƒuɔ ɔga ɔɔsu. Bi ndi ƒula kama kekpokɔ ɔsu na eesé kayi lɛni?

²⁰ Aasu ka ebo kekpo kɔkwɛ na ebo kekpo ɔyikun, nsu lɛmɛne kani na aakun. Na ɔma geen na aanu ɔsu na áta énye-mi lɛlɔ?

²¹ Nu! Mɔɔsu-ɔ ka Egyipteƒuɔ lɛlɔ na ékpo kama. Nsu mɔɔyá-a na ati ka ugyii kakɛ kani ndubo bɔƒɛ bɔtu-ɔ kɔnu si éti ƒula unu ƒui ásia-nwu lɛlɔ na ɔdi! Ɔyikun ɔmmɔ udu na Ƒarao Egyipteƒuɔ ɔga ubo ute bani ƒui néti bana anu básia-nwu lɛlɔ.

²² Na si bɔsu na ada-mi lɛnɔ anii, “Bula Unwoti Katɔti lɛlɔ na búkpo kama” ni, ɔɔɔdi Unwoti ɔmɛni na Hesekia ɔ́ya báƒɛ nwuna akpabi, na ɔ́su Israelƒuɔ ku Yudaƒuɔ ka bataakpa Unwoti ɔmmɔ na lɛkpabi lɛni nlɛ Yerusalem lɛlɔ kani?

²³ “ ‘Bo na awɔ ku mina unengu Asiriaƒuɔ ɔga binyimi lɛla lɛdi. Na ndubute-ɔ bapɔnkɔ mpim inyɔ si adubɔkɛ bekyuli bani melie-ma lɛlɔ.

²⁴ Na mɔɔsu-ɔ ka alakana Asiriani ukpone ɔnamudi ƒui muedi lɛlɔ bɔdi ina ka éti anu ásia Egyipteƒuɔ bapɔnkɔ beliene ku bana bapɔnkɔ kɛɛkɛ lɛlɔ.

²⁵ Munuu aakali ka bɔta kani na lɛ́ta mbekpoku-mii keeke ɔni na ɔɔɔdi Unwoti násu-mi lɛla lɛdi? Mɔɔsu-mii nwaa ka ni, Unwoti ɔlati násu-mi ka mbekpoku kalɔ kamɛni ƒui na lɛyila-mii udu.’ ”

²⁶ Amu na Hilkia ubidi Eliakim ku Sebna ku Yoa básu bekpone unengu ɔmmɔ banini, “Awɔ ku ƒula bekpone bammɔ bɛtɛmiku-bu na Siriaƒuɔ lɛdi kemmo na abu bɔdubunu kalɔ. Na bitatɛmi na Yudaƒuɔ lɛdi kemmo bitete-bu. Ɔsika bekyuli bani ƒui na bákɔ benye awodu amɛni lɛlɔ beenú.”

²⁷ Amu na bekpone benengu bammɔ bédie kenye banini, “Bɛɛkali ka amii ku bina ɔga kani na bula ɔga ɔ́tala ɔ́kya ka bubasu-mii etemila amɛni? Oowo! Bekyuli bani na bákɔ benye awodu lɛlɔ lɛnɔ ɔlɛka benu ɔdi. Ɔsika ama lɛnɔ badubɔdi bana kuvodɔ na bani bana kɔnɔ aani bina kalɛ!”

²⁸ Amu na unengu ɔmmɔ ɔ́ta únye na údie lɛdi momoomo na Yudaƒuɔ lɛdi kemmo na ɔ́su ɔ́nini, “Binu, Asiriaƒuɔ ɔga ɔyikune ɔnini,

²⁹ ‘Bitaya na Hesekia ɔtɔlɔ-mii. Ɔɔɔdubo bɔkana na ɔƒɔ-mii ɔlɛku mina enu kemmo.

³⁰ Na bitaya na Hesekia ɔdɔdɔ-mii na uƒu-mii kasusu na biti bina anu bɛsia bɛnii, “Unwoti ɔdubudie-bu na ulu biala lɛlɔ, na ɔɔɔdubo ɔma unengudi ɔmɛni bɔnyonu bɔkya Asiriaƒɔ ɔga enu kemmo.” ’

³¹ “Bitenu Hesekia litemi. Bɔsu na Asiriaƒuɔ ɔga ɔda-mii ɔnii, ‘Bibo na buwi kenye ntu mmomu, na biti bina lɛlɔ bite-mi. Na ndubɔya na bina ƒui bɛkɛ kuƒi na bɛdi bina adingyii mmo ebi na bɛni ntu na bina abiɔ kemmo

³² úti utédu ka bula ɔga ɔmmɔ ɔ́wia-mii kɔkyakɔ kɔni nse aani amii alati kɔdi. Mmɔ ni, bɛdubɔkɛ edula ku ntɛ bɔbuni na bɛkɛ adila ku adingyii abuni ku nnɔ egyii ku uwɔ. Bɛƒuna ngba na ɔɔɔdi kukpi!’ “Bitenu Hesekia litemi, ɔsika bɔkpanku na ɔda-mii utáyila si ɔɔsu ɔnii, ‘Unwoti ɔdubo-mii budie.’

³³ Bíinu dii ka kalɔ kadi baƒiɔ báaƒɔ bana bekyuli básiku Asiriaƒuɔ ɔga enu kemmo?

³⁴ Na wɛ na Hamat ku Arpad baƒiɔ bakya? Na wɛ lɛnɔ na Seƒarwaim ku Hera ku Iwa baƒiɔ bakya? Na ɔdi úukpo ɔ́ƒɔ Samaria ɔ́lɛku-mi enu dii?

³⁵ Na kalɔ kamani geen baƒiɔ néekpo báƒɔ bana kalɔ bekyuli básiku-mi enu kemmo? Na dɛ na Unwoti anwu ɔdubɔkana na ɔƒɔ Yerusalem na mina enu kemmo?”

³⁶ Nsu bekyuli bammɔ ƒui bábla kpoo aani kalɛ na Ɔga Hesekia ɔ́su-ma úse ɔnini, “Bitedie-nwu lɛla biala kenye.”

³⁷ Ɔmmɔ kama Hilkia ubidi Eliakim ɔni ndi ɔga kesii lɛlɔ ɔnune ku ɔku unwenine Sebna ku Asaƒ ubidi Yoa ekposela ala unwenine báni bana lɛwu bábwɛ na bénwini bésie Ɔga Hesekia kudɔ na bátásɔku ala ani na básu-ma ƒui básu-nwu.