Baga 2 17 - Katɔti Ɔku Kedee

Hosea Ɔ́di Lɛga Na Israel

¹ Na lɛkwa leevu-linyɔdi kemmo ɔni na Ɔga Ahas ɔɔdi lɛga na Yuda ni, bése Ela ubidi Hosea lɛnɔ lɛga na Israel. Na ɔ́di lɛga lɛmmɔ na Samaria akwa yaalenwi.

² Ɔ́bla likpidi na Unwoti anumi. Nsu nwuna likpidi lɛni na ɔ́bla ni, lítedu Israelƒuɔ baga bani nélie bávi lɛdi.

³ Na Asiriaƒuɔ Ɔga Salmaneser útékpoku Ɔga Hosea. Na Hosea ɔ́kya-nwu kalɔ aani kadi bekyuli bani lɛlɔ na ɔɔdi kalɛ. Ɔmmɔ ɔsu, uuyi kuyi teesienku Asiriaƒuɔ ɔga lɛkwa biala.

⁴ Nsu lɛkwa lɛdi ni, Ɔga Hosea ɔmɛni ɔ́tala bekyuli ɔ́kya Egyipteƒuɔ ɔga ɔni baalɔ banii So ka ubebunku-nwu na betékpoku Asiriaƒuɔ na ɔda nwuna lɛkwa ndi lɛkwa kuyii kɔmmɔ bɔyii ɔya. Na ka Ɔga Salmaneser únu litemi lɛmɛni ni, ɔ́ya béteƒie Ɔga Hosea bákya ɔtɔ.

⁵ Ɔmmɔ kama ni, Asiriaƒuɔ ɔga ɔ́nwanɛ lɛlɔ úduo Israel kalɔ lɛlɔ, na ɔ́ka Samaria ɔma ɔ́kya akwa atɛ.

⁶ Na Ɔga Hosea lɛga bɔdi lɛkwa yaalenwidi kemmo ni, Asiriaƒuɔ ɔga úƒie Israelƒuɔ bammɔ úsienku Asiria. Na ɔ́ya na bélie Hala kalɛkɛ lɛlɔ na ɔma ɔni baalɔ banii Gosan na Habor Ketudɔ ku Mediaƒuɔ lɛma kemmo.

Kekpo Kéƒie Israelƒuɔ Na Likpidi Ɔsu

⁷ Ala amɛni ƒui álɛku Israelƒuɔ na likpidi lɛni na bábla báƒiɔ bana Unwoti Katɔti ɔni nékpo ɔ́ƒɔ-ma ɔ́lɛku Egyipteƒuɔ kalɔ lɛlɔ ku bana Ɔga Ƒarao enu kemmo ɔsu. Bákya bátaakpa baƒiɔ lidu bamba,

⁸ na básiaku bekyuli bani na Unwoti ɔ́bɔku ɔ́lɛku kɔlɔ kɔmmɔ kemmo na bana anumi, na básiaku bana ɔbladu kama ku ɔdi ɔwɔdi ala bɔbla bɔni na Israel baga bammɔ béti bákya bekyuli bammɔ akɔ na baabla ɔsu.

⁹ Na Israelƒuɔ bákya bátaabla ala kalɔ kalɔ na bɔbɛ kemmo ani na Unwoti útete kuƒi. Na ɔ́si ɔma kagyumanakɔ kpakplaa katɔ mmɔ úbedu ɔma unengudi ɔni na bátu bámana ku lɛma lɛkladi ƒui kemmo ni, bátu akpabi bálɛ abi eli kesi kesii.

¹⁰ Na abi ƒui lɛlɔ ku egyii biala na ebo ɔyuli kalɔ ni, bálɛ atabi kedee ku lɛƒiɔgyii béte Asera baƒiɔ.

¹¹ Na bakɛ abi ƒui eli baakyula oloƒui aani kalɛ na kadi bamba bekyuli bani na Unwoti ɔ́bɔku ɔ́lɛku kalɔ kammɔ kemmo bátaabla. Ɔmmɔ ɔsu bákya Unwoti kɔnyi ɔkɛnku bana ulikplu ala bɔbla ɔsu.

¹² Na bakya baakpá baƒiɔ ina ka Unwoti ɔ́su-ma ɔnini, “Bitabla ala amɛni udu.”

¹³ Unwoti úbo-ma ɔda geen ɔkɛnku nwuna bekyuli ku kenye bediene bani na ɔ́tala ɔ́kya Israelƒuɔ ku Yudaƒuɔ lɛlɔ ɔnini, “Binwini bina ɔbladu ukpidi ɔmmɔ kama. Na bitaadi mina ɔda bubo ku mina bunyimi lɛlɔ ɔkɛnku ɔda bubo bɔni ƒui na líte bina bati ka bataadi-mu lɛlɔ ku kalɛ na mina kabla bablane ku kenye bediene básu-mii lɛlɔ.”

¹⁴ Nsu ɔmɛni kama ƒui ni, béni mina ɔda bubo bɔmmɔ na bábla atuɔkplu aani bana bati bani néteti bana kayi ƒui bátasia Unwoti bana Katɔti lɛlɔ, bati bani na bátaƒɔ bana Unwoti bátadi mmɔ.

¹⁵ Béni nwuna ɔda bubo, na bátadi bunyimi bɔni na únyimiku bana bati kuuku lɛlɔ ku kalɛ na ɔ́lɛ-ma kpakplaa mmɔ lɛlɔ. Na basia baakpá baƒiɔ bani neeebo kɔsia. Ɔmmɔ ɔsu ama lɛnɔ bátalɛ kɔsia kɔdi. Na básiaku kadi bamba bekyuli bani náka bámana-ma baatɛya bana ablala ina ka Unwoti ɔ́su-ma ɔnini, “Bitabla ala ani na baabla.” Nsu ala ani lɛlɔ geen na Unwoti úbo-ma ɔda ka batabla ni, anya basia baabla.

¹⁶ Na báda bávia bana Unwoti Katɔti ɔda ɔni ƒui na úbo-ma lɛlɔ. Na bávɔ ɔmantɛ bakɔ bebi inyɔ udu bálɛ na baakpá-ma ku Asera ɔƒiɔgyii. Na baakya lili kalɔ teete ayabi ku Baal baƒiɔ.

¹⁷ Na beeti bana bebi bananabi ku belekubi taabla akpala teete baƒiɔ bammɔ. Na beesié like bebone ku bana lidu bamba kudɔ. Na béti bana uwi ƒui baabla likpidi na Unwoti anumi. Ɔmmɔ ɔsu kɔnyi kɔ́kɔ Unwoti.

¹⁸ Na Unwoti úti kɔnyi ɔ́kya Israelƒuɔ na úkulo-ma údie nwuna anumi. Na úti Yudaƒuɔ lɛti ɔ́bla nwuna badi.

¹⁹ Nsu na ɔmɛni kama ƒui ni, Yudaƒuɔ bátadi bana Katɔti ɔda bubo lɛlɔ. Na básiaku Israelƒuɔ ɔbladu kama.

²⁰ Na ɔmmɔ ɔsu Unwoti úni Israelƒuɔ ƒui na ɔ́ni-ma kɔtu. Na Unwoti úti-ma útákya bekisine bani na bebo ɔkplu enu kemmo útédu ka bana ƒui báyii-nwu anumi.

²¹ Uwi ɔni na Unwoti úle Israel ku Yuda kemmo inyɔ ni, Israelƒuɔ béti Nebat ubidi Yerobeam bábla bana ɔga. Na Yerobeam ɔ́ya Israelƒuɔ béni Katɔti. Na ɔ́kpanku-ma útákya likpidi bonwu kemmo.

²² Na bekyuli bammɔ básiaku Yerobeam kama. Na ama lɛnɔ bákya bátaabla likpidi lɛni na Yerobeam ɔɔbla

²³ útédu ka Unwoti úkulo-ma údie nwuna anumi na kawɔlɔkɔ aani kalɛ na úbo-ma ɔda ɔ́siaku nwuna kabla bablane ku kenye bediene lɛlɔ ka si bábla lɛla lɛdi ni, lɛni na ɔdubo-ma bɔbla. Anwuɔsu, bábakpanku Israelƒuɔ bátákya Asiria kalɔ lɛlɔ. Na bakya mmɔ úbedu ɔmwi kadi.

Asiriaƒuɔ Bátáda Keliekɔ Na Israel

²⁴ Amu na Asiriaƒuɔ ɔga úti bekyuli badi ɔ́siku Babel ku Kuta ku Awa ku Hamat ku Seƒarwaim na ɔ́ya na bétélie Samaria na keliekɔ kani na ɔ́kpanku Israelƒuɔ ɔ́lɛku. Na bekyuli bammɔ béti lɛma lɛmmɔ bábla bana lɛdi.

²⁵ Na uwi ɔni na bekyuli bammɔ báka mmɔ butélie ni, na bekyuli bammɔ balákya lili kalɔ teete Unwoti. Ɔmmɔ ɔsu Unwoti ɔ́ya na bagyata bábadu badi.

²⁶ Na béte Asiriaƒuɔ ɔga bɔti banini, “Bekyuli bawɔdi bani na éti ábakya Samaria lɛma lɛmmɔ ni, baaagyi kalɔ kammɔ baƒiɔ lɛla lɛni na baayɔ́ ka babla bete-ma. Ɔmmɔ ɔsu baƒiɔ bammɔ báya na bagyata bébo bakya baadú badi.”

²⁷ Ɔmmɔ ɔsu ɔga ɔmmɔ úbo ɔda ɔmɛni ɔnini, “Bɛya na Israelƒuɔ bani búƒie mmɔ kemmo unwi na ɔdi ɔkpane unwini utélie Samaria mmɔ na ɔtina bekyuli bammɔ kalɔ kammɔ Katɔti ɔda bubo.”

²⁸ Ɔmmɔ ɔsu Israelni ɔkpane ɔni bábɔku bálɛku Samaria únwini na útélie Betel na ulie mmɔ ɔɔtina bekyuli bammɔ kalɛ na baakpá Unwoti.

²⁹ Nsu bekyuli bani nátáda Samaria ɔma belie mmɔ ni, badi biala ku bana baƒiɔ bani na bábla béte lɛlɔ. Na béti-ma bétése Samariaƒuɔ aƒiodu ani na bátu bákya abi eli mmɔ.

³⁰ Na Babelƒuɔ bávɔ Sukot-Benot baƒiɔ, na Kutƒuɔ bávɔ Nergal baƒiɔ, na Hamatƒuɔ bávɔ Asima baƒiɔ,

³¹ na Awiƒuɔ bávɔ Nibhas ku Tartak baƒiɔ, na Seƒarwiƒuɔ beeti bana bebi taabla bɔkyula akpala teete Adramelek ku Anamelek baƒiɔ bani nási Seƒarwaim.

³² Bekyuli bammɔ lɛnɔ baakpá Unwoti, nsu básɔ bédie bekyuli bani ndia-ma básiku ama alati bekyuli akɔ mmɔ ka benwini bakpane bete-ma na aƒiodu ani nkya abi eli mmɔ.

³³ Ɔmmɔ ɔsu bekyuli bammɔ baakpá Unwoti na basɔ baakpá bana baƒiɔ lɛnɔ kalɛ na bana ɔma ɔni bási ɔdi ɔɔtina.

³⁴ Na bekyuli bammɔ bamu basiaku bana kuuku ɔdi kama úbedu ɔmwi kadi. Na balakpa Unwoti na baládi nwuna ɔda bubo lɛlɔ, ɔda bubo bɔni na úti úte bana ati kuuku ɔni ndi Yakob ɔni na ɔ́sia lɛnyi ɔnii Israel ku nwuna kaba kemmo bekyuli lɛlɔ.

³⁵ Uwi ɔni na Unwoti únyimiku Israelƒuɔ bunyimi bɔni nkya-ma ntɛ ni, úbo-ma ɔda ɔnii, “Bitakpa baƒiɔ bamba badi na bitakya lili kalɔ bitete-ma na bitabla-ma kabla kadi na bitabla akpala adi bitete-ma.

³⁶ Nsu Unwoti ɔni nákpanku-mii ɔ́lɛku Egyipte kalɔ lɛlɔ, na údie kɔnu ɔ́bla ɔyikun ala ni, bitaadi nwuna litemi lɛlɔ, na bitaakya lili kalɔ teete anwu lɛti, na bitaabla akpala teete-nwu.

³⁷ Bɛsia anu kaduɛ na bɛda bunyimi ku ɔda bubo bɔni na únweni úte-mii lɛlɔ. Na bitakpa baƒiɔ badi.

³⁸ Na bunyimi bɔni linyimiku-mii ni, bitayiƒala-mu kudii.

³⁹ Mmomu bɛkpa Unwoti bina Katɔti, ɔsika anwu ndi ukyuli ɔni kani ndubo-mii budie bɔsiku bina bekisine enu kemmo.”

⁴⁰ Nsu bekyuli bammɔ béni ka benu litemi na bésie anumi na bakya baabla bana kuuku ala ammɔ kani.

⁴¹ Na ina ka bekyuli baakpá Unwoti ni, bamu bakya baabla kabla teete bana baƒiɔ. Na úti úbedu ɔmwi kadi kamɛni lɛlɔ ni, bana bebi ku bawɔ lɛnɔ bámu bakya baabla ala ani na bana bati bábla.