Baga 2 15 - Katɔti Ɔku Kedee

Asaria Ɔ́di Lɛga Na Yuda

¹ Na lɛkwa aavlanyɔ-maatɛdi kemmo ka Israelƒuɔ Ɔga Yerobeam ɔɔdi lɛga ni, bése Yudaƒuɔ Ɔga Amasia ubidi Asaria lɛga.

² Na ɔ́ɔkɛ akwa leevu-aku asa na bése-nwu lɛga na Yerusalem. Na ɔ́di lɛga lɛmmɔ akwa liti ku inyɔ. Na uni ɔ́si Yerusalem na baalɔ-nwu Yekolia.

³ Na ɔ́siaku ɔti Amasia ɔbladu kama na ɔ́bla ala ani náƒɔ Unwoti anu.

⁴ Nsu bátabwɛ aƒiodu ani na abi eli mmɔ, anwuɔsu bekyuli bammɔ bésie anumi na baabla bana akpala na baakyula bana oloƒui na mmɔ.

⁵ Unwoti ɔ́ya ɔlɛgyie úwi ɔga ɔmmɔ, na ɔlɛ ɔmmɔ ɔ́da-nwu útédu nwuna likpimeyi, anwuɔsu kaduli bamba na ɔ́kya na ɔsɔ ulábla lɛla lɛdi. Ɔmmɔ ɔsu ubidi Yotam nélie ɔga kaduli kammɔ útaadi kalɔ kammɔ lɛlɔ.

⁶ Na ala bamba ani na Asaria ɔ́bla ni, bénweni-nya bákya Yudaƒuɔ baga ɔku kemmo.

⁷ Asaria úbekpi na báva-nwu bédenku nwuna bati na Ɔga Dawid ɔma unengudi ɔmmɔ kemmo, na ubidi Yotam úti-nwu keliekɔ aani ɔga kalɛ.

Sakaria Ɔ́di Lɛga Na Israel

⁸ Na lɛkwa avlaatɛ-maanedi kemmo uwi ɔni na Asaria ɔɔdi lɛga na Yuda ni, bése Yerobeam ubidi Sakaria lɛga na Israel na ɔ́di lɛga lɛmmɔ na Samaria abuli aku.

⁹ Na aani kalɛ na nwuna bati bádi lɛga bátɔ ni, anwu lɛnɔ ɔ́siaku Ɔga Yerobeam ɔbladu kama na ɔ́bla likpidi na Unwoti anumi. Na ɔ́kpanku Israelƒuɔ lɛnɔ útákya likpidi kemmo.

¹⁰ Na Yabes ubidi Salum úti kasusu kekpidi na únyimi na Sakaria lɛlɔ, na úténye ɔ́siaku-nwu na bekyuli anumi. Na ɔ́du-nwu na úti-nwu keliekɔ aani ɔga kalɛ.

¹¹ Na ala abambadi ani na Sakaria ɔ́bla ni, bénweni-nya bákya Israelƒuɔ baga lɛlɔ kɔtɛ ɔku kemmo.

¹² Anwuɔsu kenye kani na Unwoti ɔ́su úse ɔkɛnku Yehu lɛlɔ kébo-nwu kemmo lɛni ɔni na ɔ́su ɔnini, “Ƒula kaba kemmo bebi badubɔdi lɛga na Israel útédu kaba kenedi lɛlɔ.”

Salum Ɔ́di Lɛga Na Israel

¹³ Na lɛkwa avlaatɛ-yaalenwidi ɔni na Usia ɔɔdi lɛga na Yuda ni, bése Yabes ubidi Salum lɛga na Israel na ɔ́di lɛga lɛmmɔ kɔbuli kunwi.

¹⁴ Na Gadi ubidi Menahem nási Tirsa úsie Samaria útádu Salum. Na úti-nwu keliekɔ aani ɔga kalɛ.

¹⁵ Na ala bamba ani na Salum ɔ́bla na nwuna lɛga bɔdi kemmo ku kalɛ na ɔ́salaku bekyuli ku kelisa kekpidi na ukyuli bɔdu lɛlɔ ni, bénweni bákya Israelƒuɔ baga lɛlɔ kɔtɛ ɔku kemmo.

¹⁶ Na uwi ɔmmɔ ni, ka Menahem ɔ́si Tirsa ɔdubo ni, úbekpoku Tiƒsa ku ɔma ɔmmɔ ukyuli biala na ɔkya-nwu kemmo ku lɛma lɛni na amadɔ mmɔ bene ƒui ka bétenu kalɔ ka balɛmi bana ɔma awodu kɔyakun bete-nwu ɔsu. Na ɔ́bɔku Tiƒsa údie mmɔ na ɔ́ya na báwawa beleku bani nda nƒɔ ƒui.

Menahem Ɔ́di Lɛga Na Israel

¹⁷ Na lɛkwa avlaatɛ-yaalenwidi kemmo ka Yudaƒuɔ Ɔga Asaria ɔɔdi lɛga ni, bése Gadi ubidi Menahem lɛga na Israel. Na ɔ́di lɛga lɛmmɔ na Samaria akwa leevu.

¹⁸ Na ɔ́siaku Nebat ubidi Ɔga Yerobeam ɔbladu kama. Na ɔ́bla likpidi na Unwoti anumi na ɔ́kpanku Israelƒuɔ útákya likpidi kemmo útédu nwuna likpimeyi.

¹⁹ Ɔmmɔ kama Asiriaƒuɔ Ɔga Pul útéti Israel kalɔ. Na Menahem ɔ́wia sika ɔƒualadi antabi aƒo eti maatɛ ku aavlanyɔ (370) úte-nwu kalɛ na unye-nwu kama na ɔkana lɛga kadikɔ kammɔ bɔda kpakplaa.

²⁰ Na Menahem ɔ́ƒɔ sika ɔmɛni ɔ́siku Israelƒuɔ kudɔ. Na balakɛne bammɔ lɛlɔ na únye na ɔdi biala úte sika ɔƒualadi antabi lɛkyami bule lɛkpa lɛtɛdi unu.

²¹ Na ala bamba ani na Menahem ɔ́bla ni, bénweni-nya bákya Israelƒuɔ baga lɛlɔ kɔtɛ ɔku kemmo.

²² Na Menahem úkpi na báva-nwu na ubidi Pekahia úti-nwu keliekɔ aani ɔga kalɛ.

Pekahia Ɔ́di Lɛga Na Israel

²³ Na akwa liti kemmo, ka Yudaƒuɔ Ɔga Asaria ɔɔdi lɛga ni, bése Menahem ubidi Pekahia lɛga na lɛkwa liti lɛmmɔ lɛlɔ na Israel. Na ɔ́di lɛga lɛmmɔ na Samaria akwa anyɔ.

²⁴ Na Pekahia ɔ́bla likpidi na Unwoti anumi, ɔsika útenwini kama útakya Nebat ubidi Yerobeam ɔbladu ukpidi ɔmmɔ kama.

²⁵ Na Pekahia bekpone benengu akɔ unwi ɔni ndi Remalia ubidi Peka ɔ́sa lili likpidi ku nwuna bekpone liti bani nási Gilead, na anwu ku Argob ku Arie nátádu Pekahia na Samariaƒuɔ ɔga kaduli kagyumanakɔ kpakplaa kammɔ kemmo. Na Peka úti-nwu keliekɔ aani ɔga kalɛ.

²⁶ Na ala bamba ani na Ɔga Pekahia ɔ́bla ni, bénweni-nya bákya Israelƒuɔ baga lɛlɔ kɔtɛ ɔku kemmo.

Peka Ɔ́di Lɛga Na Israel

²⁷ Na lɛkwa liti ku linyɔdi lɛlɔ ka Yudaƒuɔ Ɔga Asaria ɔɔdi lɛga ni, bése Remalia ubidi Peka lɛga na Israel. Na ɔ́di lɛga lɛmmɔ na Samaria akwa alɔ.

²⁸ Na ɔ́siaku Nebat ubidi Ɔga Yerobeam ɔbladu ukpidi kama ɔsu ɔ́bla likpidi na Unwoti anumi. Ɔni na ɔ́kpanku Israelƒuɔ útákya likpidi kemmo.

²⁹ Na uwi ɔni na Peka ɔdi ɔga na Israel ni, Asiriaƒuɔ ɔga ɔni baalɔ Tiglat-Pileser úkpo ɔ́ƒɔ Iyon ku Abel-Bet-Maaka ku Yanoa ku Kedes ku Hasor ku Gilead ku Galilea ku Naƒtali lɛma ƒui. Na úƒie bekyuli bammɔ úsienku Asiria na útákya-ma ɔtɔ.

³⁰ Na lɛkwa aavlanyɔdi lɛlɔ na Yudaƒuɔ Ɔga Usia ubidi Yotam lɛga bɔdi uwi ni, Ela ubidi Hosea ɔ́bla kasusu kekpidi na Ɔga Peka lɛlɔ na ɔ́du-nwu na úti-nwu keliekɔ aani ɔga kalɛ.

³¹ Na ala bamba ani na Peka ɔ́bla na nwuna lɛga bɔdi kemmo ni, bénweni-nya bákya Israelƒuɔ baga lɛlɔ kɔtɛ ɔku kemmo.

Yotam Ɔ́di Lɛga Na Yuda

³² Na lɛkwa linyɔdi kemmo ka Amalia ubidi Peka ɔɔdi lɛga na Israel ni, bése Usia ubidi Yotam lɛga na Yuda.

³³ Na ɔ́ɔkɛ akwa aavlanyɔ-alɔ asa na úbenwini ɔga na Yerusalem, na úlie ɔ́di lɛga lɛmmɔ akwa leevu-akun. Na uni ndi Sadok ubidi Yerusa.

³⁴ Na ɔ́siaku ɔti Usia ɔbladu kama. Na ɔga ɔmmɔ ɔ́bla lɛla lɛni náƒɔ Unwoti anu.

³⁵ Nsu aƒiodu ani na abi eli anya ni, útegyingya-nya. Ɔmmɔ ɔsu bekyuli bammɔ bésie anumi baakyula oloƒui na akpabi ammɔ lɛlɔ. Na Ɔga Yotam násɔku Unwoti kakpakɔ kayakun kani na katɔ kakɛ mmɔ ɔ́tu.

³⁶ Na ala bamba ani na Ɔga Yotam ɔ́bla ni, bénweni-nya bákya Yudaƒuɔ baga lɛlɔ kɔtɛ ɔku kemmo.

³⁷ Na uwi ɔmmɔ kemmo na Unwoti úse kalɔ uudie bekisine taakya Yudaƒuɔ ka bétékpoku-ma. Na ama ndi Siriaƒuɔ Ɔga Resin ku Remalia ubidi Peka.

³⁸ Na Yotam úkpi na báva-nwu na Dawid ɔma unengudi baga kavakɔ. Na ubidi Ahas úti-nwu keliekɔ aani ɔga kalɛ.