Baga 2 13 - Katɔti Ɔku Kedee

Bése Yehoahas Israelƒuɔ Ɔga

¹ Na lɛkwa aavlanyɔ-lɛtɛdi kemmo ka Yudaƒuɔ Ɔga Ahasia ubidi Yoas ɔɔdi lɛga ni, bése Yehu ubidi Yehoahas lɛga na Israel. Na úlie Samaria ɔ́di lɛga lɛmmɔ akwa leevu-maatɛ.

² Na ɔ́siaku Nebat ubidi Ɔga Yerobeam ɔbladu kama na anwu lɛnɔ ɔ́bla likpidi na Unwoti anumi na ɔ́kpanku Israelƒuɔ útákya likpidi kemmo. Na útenwini kayi na ɔda ekpidi ammɔ bɔbla ɔya.

³ Ɔ́si ɔmmɔ ɔsu ni, Unwoti úti kɔnyi ɔ́kya Israelƒuɔ na ɔ́ya na Siriaƒuɔ Ɔga Hasael ku ubidi Ben-Hadad békpoku-ma na bádi-ma lɛlɔ, na Israelƒuɔ bákya-ma kalɔ na uwi útu.

⁴ Ɔmmɔ kama ni, Yehoahas ɔ́kpali Unwoti na úvele-nwu ka ɔnu-ma kɔnyana. Na ka Unwoti ɔ́nu kalɛ na Siriaƒuɔ bakya baabla Israelƒuɔ kalala geen ɔsu ni, únu-nwu bɔkpali.

⁵ Na Unwoti úte Israelƒuɔ ɔtɔnkune ɔni nékpo ɔ́ƒɔ-ma ɔ́lɛku lɛbibo kemmo. Ɔmmɔ ɔsu bákɛ atu bɔyɔ na úlie nwuna kaduli ƒaa aani kudeedi.

⁶ Nsu ɔmɛni kama ƒui ni, Israelƒuɔ bátada likpidi lɛni kemmo na Ɔga Yerobeam ɔ́kpanku-ma útákya bɔbla bátaya. Na ani kani na bése anumi na baabla. Na ɔƒiɔgyii ɔni na bálɛ béte Asera baƒiɔ na Samaria ni, ɔmu unye mmɔ.

⁷ Na uwi ɔmmɔ kemmo ni, Yehoahas uuubo bekpone ƒelee badi. Na bani kani na ubo ndi bapɔnkɔ beliene liti ku bapɔnkɔ kɛɛkɛ leevu ku bekpone bani muusié lɛgba mpim leevu (10,000), ɔsika Siriaƒuɔ ɔga ɔ́yila Israelƒuɔ ɔga bekpone bakladi udu ƒui kede kede na útu-ma ɔ́bwɛ kpɛtɛ kpɛtɛ aani ɔtumu.

⁸ Ala bamba akladi ani na Yehoahas ɔ́bla ku nwuna kayi buse ala ani na ɔ́bla ni, bénweni-nya bákya Israelƒuɔ baga lɛlɔ kɔtɛ ɔku kemmo.

⁹ Na úkpi na báva-nwu na Samaria. Na ubidi Yehoas úti-nwu keliekɔ aani ɔga kalɛ.

Yehoas Ɔ́di Lɛga Na Israel

¹⁰ Na lɛkwa avlaatɛ-maatɛdi kemmo ka Yudaƒuɔ Ɔga Yoas ɔɔdi lɛga ni, bése Yehoahas ubidi Yehoas lɛga na Israel. Na ɔ́di lɛga lɛmmɔ na Samaria akwa leevu-aku.

¹¹ Na anwu lɛnɔ ɔ́bla likpidi na Unwoti anumi. Na ɔ́siaku Nebat ubidi Ɔga Yerobeam ɔni nákpanku Israelƒuɔ útákya likpidi kemmo ɔbladu kama.

¹² Na ala bamba ani na Yehoas ɔ́bla ku kekpo kani na anwu ku Yudaƒuɔ Ɔga Amasia békpo ni, bénweni-nya bákya Israelƒuɔ baga lɛlɔ kɔtɛ ɔku kemmo.

¹³ Na Yehoas úkpi na báva-nwu na Samaria baga kavakɔ, na ubidi Yerobeam úti-nwu keliekɔ aani ɔga kalɛ.

¹⁴ Ɔƒɛni na uwi ɔmmɔ kemmo ni, ɔlɛ kpakplaa ɔdi úbebo Elisa na ɔmmɔ kemmo kani na úti úkpi. Na uwi ɔni na ɔtɛ ɔlɛ mmɔ ni, Israelƒuɔ Ɔga Yehoas úsie ɔnii utákya-nwu kenye, na keku kani na uuwulo momoomo taasu ɔnini, “Mina ɔti, mina ɔti ese aani bapɔnkɔ kɛɛkɛ ku bapɔnkɔ beliene ete Israelƒuɔ!”

¹⁵ Amu na Elisa ɔ́su-nwu ɔnini, “Wia kataminta ku atula adi.” Na útáwia-nya.

¹⁶ Amu na ɔ́su Israelƒuɔ ɔga ɔmmɔ ɔnini, “Klibi lɛlɔ kalɛ na ebo kataminta kammɔ.” Amu ka ɔ́klibi lɛlɔ ni, Elisa úti nwuna enu ɔ́sia ɔga ɔmmɔ enu lɛlɔ.

¹⁷ Ɔmmɔ kama ni, ɔ́su-nwu ɔnini, “Lɛmi ƒansili ɔni nésie ɔƒɛ katukɔ mmɔ.” Na anwu lɛnɔ ɔ́lɛmi-nwu. Mmɔ na Elisa ɔ́su-nwu ɔnini, “Bo-ka.” Na anwu lɛnɔ úbo-ka. Amu na Elisa ɔ́su-nwu ɔnini, “Ɔmmɔ ndi Unwoti lɛtula lɛni mɔɔdi lɛlɔ, lɛtula lɛni ndubo Siriaƒuɔ lɛlɔ bɔdi! Na mɔɔsu-ɔ ka adubo Siriaƒuɔ bukpoku na Aƒek na adi-ma lɛlɔ na ayila-ma udu ƒui kede kede.”

¹⁸ Amu na Elisa ɔ́su ɔga ɔmmɔ ɔnini, “Ti atula akladi ammɔ na ebo alɛ kalɔ.” Amu na ɔga ɔmmɔ úti atula ammɔ na úbo ɔ́lɛ kalɔ kɔtɛ na ɔ́da ɔ́ya.

¹⁹ Elisa úti kɔnyi ɔ́kya-nwu na ɔ́su-nwu ɔnini, “Nka ɔlɛka ebo atula ammɔ alɛ kalɔ kɔlɔ iye kɔku. Na nka adubɔdi Siriaƒuɔ lɛlɔ na ayila-ma udu kede kede. Nsu ɔ́si ɔmɛni ɔsu ni, bɛdubɔdi-ma lɛlɔ kɔtɛ kani.”

²⁰ Amu na Elisa úkpi na báva-nwu. Na ketudi uwi biala kemmo ni, Moabƒuɔ bekpone baanwanɛ lɛlɔ teeduo Israelƒuɔ kalɔ kemmo.

²¹ Amu na kekwa kadi uwi lɛlɔ ni, Israelƒuɔ badi bada ukpine ɔdi batáva. Mmɔ na bánu Moabƒuɔ bekpone badi na bana kalɔ lɛlɔ. Amu na bekyuli bammɔ béƒwimi ukpine ɔmmɔ bátákya Elisa kaƒiɔtɔ kemmo na békeli. Na ka ukpine ɔmmɔ ɔlɔna ɔ́nya útuku Elisa likubi kani na ukpine ɔmmɔ ɔ́gyinya na ɔ́ta únye.

²² Na Israelƒuɔ Ɔga Yehoahas lɛga bɔdi uwi ƒui ni, Siriaƒuɔ Ɔga Hasael ɔ́kya útaanya Israelƒuɔ taakya ɔni na balakɛ bɔnwuna bɔdi.

²³ Nsu Unwoti ɔ́nu Israelƒuɔ kɔnyana na útete kuƒi na bayila-ma udu. Mmomu úbunku-ma ɔ́si bunyimi bɔni na únyimi ku Abraham ku Isak ku Yakob ɔsu. Anwuɔsu ulátuna ka ɔyila-ma udu úti úbedu ɔmwi kadi.

²⁴ Ka Siriaƒuɔ Ɔga Hasael úkpi ni, ubidi Ben-Hadad úti-nwu keliekɔ aani ɔga kalɛ.

²⁵ Na Israelƒuɔ Ɔga Yehoas úkpo ɔ́di Siriaƒuɔ Ɔga Ben-Hadad lɛlɔ kɔtɛ sɔɔn. Na Israelƒuɔ lɛma linengudi lɛni na Ben-Hadad úkpo ɔƒɔ na nwuna lɛga bɔdi uwi ni, Yehoahas ubidi Yehoas ɔ́sɔ ɔ́ƒɔ-ni.