Baga 2 11 - Katɔti Ɔku Kedee

Atalia Ku Yoas Lɛlɔ Kɔtɛ

¹ Uwi ɔni na Atalia ɔni ndi Ahasia uni ɔ́nu ka ubidi úkpi ni, ɔ́ta na útádu ɔga kaduli bekyuli bammɔ ƒui.

² Na ubidi Yoas kani nékeli. Na nka badubo-nwu bɔdu ku bekyuli bakladi, nsu ɔti ɔnwani ulekubi ɔni baalɔ-nwu Yehoseba na ɔdi Ɔga Yoram ubidi na ɔdi Ɔga Ahasia ɔnwani ulekubi néti-nwu úkeliku. Na Yehoseba úti Yoas ku uleku ɔni mɔɔnu-nwu lɛlɔ mmɔ útábɛla kakpakɔ ɔtɔ ɔni kemmo baatɛ ɔdi kemmo kalɛ na Atalia ulanu-nwu uládu.

³ Na Yehoseba úti ɔnamu ɔmmɔ ɔ́bɛla ɔtɔ ɔmmɔ kemmo akwa aku na ɔɔnu-nwu lɛlɔ mmɔ uwi ɔni na Atalia ɔdi uleku ɔga.

⁴ Nsu lɛkwa maatɛdi lɛlɔ ni, Yehoiada ɔni ndi ɔkpane ɔ́ya na bálɔ bagyumanane esu esu bani mɔɔnu ɔga kaduli lɛlɔ benengu ƒui béboku Unwoti kakpakɔ mmɔ. Na anwu ku-ma bényimi lɛla lɛdi na bése kenye ka baláda balavia lɛla lɛni na badubo bɔbla. Ɔmmɔ kama úti Ɔga ubidi ɔmmɔ ɔ́tina-ma.

⁵ Na úbo-ma ɔda ɔmɛni ɔnii, “Si bíbo kabla kablakɔ na lɛnwunameyi biala ni, bile lɛlɔ akpa atɛ na lɛkpa linwi bataagyumana ɔga kaduli.

⁶ Na lɛkpa linwi lɛnɔ basɔ benye na bataagyumana kayakun kani baalɔ Sur. Na lɛkpa lɛkladi bataagyumana kayakun kani nkya bagyumanane kama kesii kani na baavumana lɛlɔ taagyumana kakpakɔ mmɔ.

⁷ Na akpa anyɔ bani na belesie kabla na lɛnwunameyi lɛlɔ ni, basɔ benye bataagyumana kakpakɔ kammɔ teete ɔga.

⁸ Na bidie atula bɛda na bitaagyumana Ɔga Yoas. Na bilie-nwu kudɔ na si úsela kesii kadi na bɛsiaku-nwu. Na ukyuli biala makpɛ mede-mii ni, na bɛdu-nwu.”

⁹ Amu na esu esu ammɔ benengu bénu kalɔ ka badi etemila ani na Yehoiada ɔ́su-ma mmɔ lɛlɔ. Na béti bana bagyumanane bani muusié kabla lɛnwunameyi ku bani neeesie kabla lɛnwunameyi lɛlɔ béboku Ɔkpane Yehoiada kudɔ.

¹⁰ Na Yehoiada úti Dawid atula ku agyumanala ani nse kakpakɔ mmɔ úte benengu ku bagyumanane bammɔ.

¹¹ Na bagyumana bammɔ bákpa bana atula báda na báka bámana ɔga ɔmmɔ na kesii kani nde lɛkpabi lɛmmɔ. Na bakladi benye kakpakɔ kammɔ baagyumana ɔ́si katɔ kakɛ útédu kada kakɛ.

¹² Ɔmmɔ kama Yehoiada ɔ́kpanku Yoas ɔ́lɛku keyi. Na úti ɔga kabua úbi-nwu na úti bunyimi kakunkɛ ɔ́kya-nwu enu kemmo. Na béwi Yoas nnɔmii lili na bébo-nwu kudu ka anwu ndi ɔga. Na bekyuli bammɔ bágya anukpɛ na báva momoomo básu banini, “Ɔga uli ngba gyɔlɔɔ!”

¹³ Na ka Ɔga Uleku Atalia únu kudu kɔni na bagyumanane bammɔ ku bekyuli bammɔ bakya beedie ni, ɔ́babla na úkeli úsie kakpakɔ kesii kani na bekyuli esu ammɔ básala benye.

¹⁴ Mmɔ na ɔ́nu ɔga ɔwɔdi ɔmmɔ ka unye kakpakɔ kayakun ɔtɔ lɛkpa lɛdi kudɔ aani kalɛ na baabla lɛga buse ɔdi ɔmmɔ. Na benengu ku kɔkpɛɛ bavwine báka bámana-nwu. Na bekyuli bammɔ ƒui beedie lɛlɔyɔ kudu na baavwi bana kɔkpɛɛ. Mmɔ na ɔ́bla Atalia ɔkuɛnu na ɔ́ni nwuna lɛwu ɔ́bwɛ na ɔ́va momoomo ɔ́su ɔnini, “Bɛ́ta bínye ɔda bubo lɛlɔ! Bɛ́ta bínye ɔda bubo lɛlɔ!”

¹⁵ Na ka Yehoiada útayɔ ka badu Atalia na kakpakɔ amadɔ mmɔ ɔsu ni, ɔ́su bekpone benengu ɔnini, “Bɛni-nwu bɛlɛku kesii kani na ɔkya mmɔ biboku lɛlɔ na bɛdu ukyuli biala masiaku-nwu.” Ɔsika ɔkpane ɔmmɔ ɔ́su ɔnii, “Útalɛka badu-nwu na Unwoti kakpakɔ mmɔ.”

¹⁶ Anwuɔsu uwi ɔni na uudú kayakun kani na bapɔnkɔ baasia teeduo kaduli mmɔ kani na béƒie-nwu na bádu-nwu.

¹⁷ Na ɔkpane Yehoiada údie bunyimi bɔdi keyi na Unwoti ku ɔga ɔmmɔ ku bekyuli bammɔ ntɛ ka badubunwini Unwoti kadi bekyuli. Na ɔ́sɔ údie bunyimi bamba keyi na ɔga ku bekyuli bammɔ ntɛ.

¹⁸ Ɔmmɔ kama ni, bekyuli bammɔ bésie Baal kakpakɔ bátáƒɛ ɔtɔ ɔmmɔ. Na bábwɛ akpabi ani bátu bálɛ mmɔ ku ala ani bátu bálɛ mmɔ ƒui. Na bádu Matan ɔni mɔɔkpá Baal na lɛkpabi lɛmmɔ anumi. Amu na Ɔkpane Yehoiada úti bagyumanane badi útényene Unwoti kakpakɔ kammɔ na baagyumana mmɔ.

¹⁹ Na Yehoiada útiku bagyumanane esu esu ammɔ batɔnkune ku ɔga bagyumanane ku bekyuli bammɔ ƒui na bákpanku Ɔga Yoas básiku kakpakɔ mmɔ bésienku ɔga kaduli. Na ɔga ɔmmɔ ɔkɛ bagyumanane kayakun na útélie nwuna lɛgaboku lɛlɔ.

²⁰ Na ebiti áƒɔ bekyuli bammɔ ƒui lɛlɔ kemmo, nsu ɔma ɔmmɔ use diin, ɔsika bádu Atalia na ɔga kaduli mmɔ ɔsu.

²¹ Na Yoas ɔ́ɔkɛ akwa maatɛ asa na bése-nwu lɛga.