Baga 1 9 - Katɔti Ɔku KedeeUnwoti Ɔ́sɔ Údie Lɛlɔ Ɔ́tina Salomo 1 Uwi ɔni na Salomo ɔ́tu Unwoti kakpakɔ ku ɔga kaduli ku lɛtɔ lɛni ƒui na ɔɔyɔ́ ka ɔtu mmɔ ɔ́wɔlɔ ni, 2 Unwoti ɔ́sɔ údie lɛlɔ ɔ́tina-nwu aani kalɛ na údie lɛlɔ ɔ́tina-nwu na Gibeon. 3 Amu na Unwoti ɔ́su-nwu ɔnini, “Línu ala ani na énye mina anumi ákpali-mi ásu ƒui. Na lídie kakpakɔ kani na átu mɛni líse sɛsɛɛ lɛ́bla-ka kedee na líti mina lɛnyi lɛ́sia-ka lɛlɔ líte uwi ƒui. Na mina anumi ku kayi ƒui kadubɔsia-ka lɛlɔ uwi biala. 4 “Na awɔ ni, si adubɔsia mina ulu lɛlɔ siin ku udu buni aani kalɛ na ƒ'ɔti Dawid ɔ́bla, na ádi mina ɔda bubo lɛlɔ na aasia anu ala ani ƒui na línyimi ku mina etemila ƒui lɛlɔ ni, 5 ndubɔya na ƒula lɛgadi lɛmmɔ linye kpakplaa uwi ƒui na Israel aani kalɛ líse ƒula ɔti Dawid kenye uwi ɔni na lɛ́su-nwu nnini, ‘Ulebo ulete ka balákɛ ɔnanabi ƒula ɔtɔ kemmo belése ɔga na Israel kudii.’ 6 “Nsu si awɔ, iye ƒula bebi bénwini kama bákya-mi, na bátadi mina ɔda bubo lɛlɔ, na bénwini bésie baakpá baƒiɔ badi ni, 7 ndubukulo Israel lidie kalɔ kani líte-ma mmɔ lɛlɔ. Na lidie kakpakɔ kani na lídie sɛsɛɛ lɛ́bla-ka kedee líte mina lɛnyi mɛni átu, na Israel lɛlɔ litemi lɛdubunwini lɛsugba ku lɛmala na bekyuli ƒui akɔ. 8 Na ina ka ɔtɔ ɔmɛni úbomo na ɔɔdia bɔnu lɛni ɔƒɛni ni, uwi ɔdi ɔdubo na ɔtɔ ɔmɛni ɔdubunwini lɛmala ute ukyuli biala ɔni mavi mɛni, na badubɔma na bapii basu banini, ‘Bi ɔsu na Unwoti ɔ́bla lɛla lɛmɛni udu na kalɔ kamɛni ku kakpakɔ kamɛni lɛlɔ lɛni?’ 9 Na bekyuli badubudie kenye basu banini, ‘Ɔsika béni bana Unwoti Katɔti ɔni nédie bana bati ɔ́lɛku Egyipte kalɔ lɛlɔ, na bénwini bététi bana baƒiɔ mmomu baakpá na baabla-ma kabla. Ɔmmɔ ɔsu na Unwoti ɔ́ya na ɔgbankpi ɔmɛni udu úbo-ma lɛlɔ.’ ” Salomo Ɔ́sɔ Ɔ́bla Kabla Lidu Bamba 10 Na akwa aavlanyɔ kawɔlɔkɔ, uwi ɔni na Ɔga Salomo ɔ́tu Unwoti kakpakɔ ku ɔga kaduli ɔ́wɔlɔ ni, 11 Ɔga Salomo úti lɛma aavlanyɔ lɛni nkya Galilea kalɛkɛ úte Hiram ɔni mɔɔdi lɛga na Tiro. Ɔsika Hiram néte-nwu sida egyii ku egyii kpakplaa ku sika ugyiedi ɔni ƒui na ɔɔwia. 12 Nsu uwi ɔni na Hiram ɔ́ta Tiro mmɔ úsie útávi ɔ́nu lɛma lɛni na Salomo úte-nwu mmɔ ni, kubiti kútada-nwu na lɛma lɛmmɔ lɛlɔ. 13 Amu na úye Salomo ɔnini, “Ɔnwa, bi lɛma udu na éte-mi mɛni?” Na ɔ́sia lɛma lɛmmɔ anyi ɔnii Kabul ɔni kalɔ ndi Liiibo Kɔsia. Ɔmmɔ ɔsu lɛni na baalɔ lɛma lɛmmɔ anyi úbedu ɔmwi. 14 Na sika ugyiedi bumomo bɔni na Hiram úte Ɔga Salomo ɔdi antabi aƒo aavlene unu. 15 Ulu ɔni lɛlɔ na Ɔga Salomo únye bekyuli lɛlɔ na ɔ́tu Unwoti kakpakɔ ku nwuna kaduli ku awodu kama ubili ɔni básia ku Yerusalem awoduku, na ɔ́ya na básɔku Hasor ku Megido ku Geser lɛma bátu na bɔdubo bunu mɛni. 16 Egyipteƒuɔ Ɔga Ƒarao úsie útékpoku Kanaanƒuɔ na ɔ́du-ma, na ɔ́tu ogya ɔ́kya Geser ɔma na úti mmɔ úte ubidi ulekubi ɔni ndi Salomo ulekudi uwi ɔni na béti-nwu na baawɛɛ-nwu. 17 Na Salomo ɔ́sɔku Geser ku Bet-Horon kada kakɛ 18 ku Baalat ku Tadmor ɔni nkya ketele kalɔ kakwiidi kemmo ɔ́tu na nwuna kalɛkɛ. 19 Na ɔ́sɔku lɛma linengudi lɛni kemmo na uusé nwuna ala ku lɛma lɛni na nwuna bapɔnkɔ ku bapɔnkɔ kɛɛkɛ liinye ku lɛla biala na ɔɔwia ka ɔtu na Yerusalem ku Lebanon ku kalɛkɛ kani ƒui lɛlɔ na ɔɔdi ɔ́tu. 20 Na bekyuli bani naaadi Israelƒuɔ na báƒɔ lɛlɔ bákya mmɔ badi Amoriƒuɔ ku Hetiƒuɔ ku Perisiƒuɔ ku Hewiƒuɔ ku Yebusiƒuɔ. 21 Na bekyuli bamɛni kaba bebi bani na Israelƒuɔ bátabɔku bátalɛku mmɔ ni, bana lɛlɔ na Salomo únye úti-ma ɔ́bla nwuna kabla bablane úbalɛ ku ɔmwi. 22 Nsu Salomo úteti Israelni biala útabla nwuna kabla ɔblane. Ɔsika ama ndi nwuna bekpone ku nwuna lɛgadi benengu ku nwuna lɛku benwenine ku nwuna bekpone batɔnkune ku bani mɔɔnu nwuna bapɔnkɔ kɛɛkɛ ku nina bakane lɛlɔ. 23 Na ama kani ndi Salomo kabla lɛlɔ banune bani mɔɔnu kabla lidu lidu lɛlɔ. Na bekyuli eti leevu-unwi (550) mɔɔnu bekyuli bani mɔɔbla Salomo kabla teete-nwu lɛlɔ. 24 Na uwi ɔni na Salomo ulekudi ɔni ndi Ƒarao ubidi ɔ́si Dawid kesii úse nwuna kaduli kani ɔgyani ɔ́tu úte-nwu kama ni, Salomo ɔ́sia awodu kama ubili ɔmmɔ. 25 Na lɛkwa biala kemmo ni, kɔtɛ na Salomo ɔɔbla bɔkyula ku unwi bɔbla akpala na lɛkpabi lɛni na ɔ́tu úte Unwoti mmɔ lɛlɔ. Na ɔɔkyula oloƒui lɛnɔ teete Unwoti kalɛ na bényimi bése ka babla na kakpakɔ mmɔ. 26 Na Ɔga Salomo ɔ́sɔ ɔ́nwi lɛkɔlɔ bonwu bonwu únyene Esion-Geber ɔni nde Elot na Edom na Ɛpugyie kɔtu. 27 Na Hiram údie nwuna bekyuli bani ngyi lɛkɔlɔ bɔka na bágyi ɛpu lɛlɔ kabla kaduɛ ka bétébunku Salomo kabla bablane. 28 Na báka lɛkɔlɔ lɛmmɔ bésienku Oƒir na bákɛ sika ugyiedi antabi aƒo eti atɛ ku leevu (160) unu béboku Ɔga Salomo. |
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
Wycliffe Bible Translators, Inc.