Baga 1 8 - Katɔti Ɔku Kedee

Béti Bunyimi Adaka Bésienku Kakpakɔ

¹ Amu na Ɔga Salomo ɔ́ya bálɔ Israelƒuɔ benengu ƒui ku baduɔti ku atɔƒi benengu ka bábanu-nwu na Yerusalem, na beti kasusu kalɛ na badubo bɔbla na beti Unwoti Bunyimi Adaka basiku Sion ɔni ndi Ɔga Dawid ɔma unengudi besienku Unwoti kakpakɔ.

² Amu na bana ƒui bátása lisu na Salomo kudɔ na bana limeyi bɔdi uwi na kɔbuli maatɛdi kɔni baalɔ Etanim kemmo.

³ Na uwi ɔni na benengu bammɔ ƒui bábasa lisu ni, bakpane bammɔ bágyu Bunyimi Adaka ɔmmɔ bákɔliku katɔ,

⁴ na bakpane bammɔ ku Lewiƒuɔ béti-nwu ku Adi Kevo kani kemmo na Unwoti uubo taabasiaku-ma mmɔ ku kabla lɛlɔ ala kedee ammɔ ƒui bétése Unwoti kakpakɔ.

⁵ Na Ɔga Salomo ku Israelƒuɔ bani ƒui nátása-nwu kudɔ mmɔ bénye Unwoti Bunyimi Adaka ɔmmɔ kudɔ mmɔ, na bádu baƒonu bani na balakana bɔka na béti bábla akpala béte Unwoti.

⁶ Ɔmmɔ kama bakpane bammɔ bágyu Bunyimi Adaka ɔmmɔ béduoku kakpakɔ bátálɛ Katɔma kedee kemmo kesii kani nse kedee ntulo ƒui na Kerub bebweyi bammɔ avwi kalɔ.

⁷ Na bebweyi bammɔ bégyingya bana avwi bébi Bunyimi Adaka ɔmmɔ ku ligyii lɛni beeti teeti adaka ɔmmɔ lɛlɔ.

⁸ Nsu si enye kesii kani nse kedee ƒui mmɔ ni, akana na anu ugyii ɔmmɔ kakɛ kadi. Na si enye kesii bamba ni, alanu. Na ligyii lɛmmɔ lɛmu lise líbedu ɔmwi kadi.

⁹ Na Bunyimi Adaka ɔmmɔ kemmo ni, lɛla biala liiibo liiitulo atabi anyɔ ani na Mose úti ɔ́kya-nwu kemmo na Horeb uwi ɔni bási baalɛ́ Egyipte kalɔ lɛlɔ.

¹⁰ Uwi ɔni na bakpane bammɔ baalɛ́ kakpakɔ mmɔ ni, kɔnakunwi kani na liƒlukutu lɛ́ƒɔ ɔtɔ ɔmmɔ kemmo.

¹¹ Na Unwoti bukeye búyii mmɔ. Ɔmmɔ ɔsu bakpane bammɔ básɔ bátakana na babla kabla kadi.

¹² Mmɔ na Ɔga Salomo ɔ́kpali Katɔti ɔ́su ɔnini, “Awɔ Unwoti násu ka adubɔkya liƒlukutu lɛni nse suu kemmo.

¹³ Na ɔƒɛni lɛ́tu kakpakɔ kani mɔɔdia bɔnu geen líte-ɔ, kesii kani na adubulie uwi ƒui.”

¹⁴ Uwi ɔni na Israelƒuɔ ƒui básala lisu na benye kakpakɔ anumi mmɔ ni, ɔga ɔmmɔ ɔ́nu-ma ɔ́mana na úte-ma kusɛ kusɛ.

¹⁵ Mmɔ na ɔ́su ɔnini, “Bemwi Unwoti Israel Katɔti ɔni na ɔkɛnku nwuna enu kabla lɛlɔ na kenye kani na úse mina ɔti Dawid úbo-nwu kemmo. Anwu násu ɔnini,

¹⁶ ‘Ɔ́si uwi ɔni na lɛ́kpanku mina bekyuli lɛ́lɛku Egyipte kalɔ lɛlɔ ni, ńtaƒuna ɔma unengudi ɔdi ńtasiku Israel adua ammɔ kɔdi kemmo ńtese lɛlɔ ka batu kakpakɔ bete-mi, na bataakpa-mi na mmɔ. Nsu lídie awɔ Dawid ka ataadi mina kadi bekyuli Israelƒuɔ lɛlɔ.’

¹⁷ “Mina ɔti Dawid ɔ́bla kasusu ka ɔ́tu kakpakɔ na bataakpa Israel Katɔti.

¹⁸ Nsu Unwoti ɔ́su mina ɔti Dawid ɔnini, ‘Ábla kasusu kabuni ka ɔ́si-ɔ kayi kemmo ka atu kakpakɔ ete-mi.

¹⁹ Nsu ɔɔɔdi awɔ ndubo kakpakɔ kammɔ bɔtu bute-mi. Mmomu ƒula ubugya ku ɔlɔna ɔni ndi awɔ ɔlati kaƒɔ ubi ndubo kakpakɔ kammɔ bɔtu.’

²⁰ “Na sɔsɔ Unwoti ɔ́di nwuna linyese lɛlɔ. Na ɔ́ya na ami lílie mina ɔti keliekɔ na ndi Israelƒuɔ ɔga. Na lɛ́tu kakpakɔ kani na bataakpa Unwoti, Israel Katɔti.

²¹ Na lɛ́wia kesekɔ lɛnɔ líte Bunyimi Adaka ɔmmɔ na kakpakɔ kammɔ kemmo. Bunyimi Adaka ɔmmɔ kemmo na atabi anyɔ ani ndanku Unwoti bunyimi bɔni na únyimi-ku bula bati kuuku uwi ɔni na ɔ́da-ma údie Egyipte kalɔ lɛlɔ akya.”

Salomo Úti Kakpakɔ Kammɔ Ɔ́kya Katɔti Lɛkɔkɔ

²² Ɔmmɔ kama, na bekyuli bammɔ ƒui anumi ni, Salomo úsie úténye lɛkpabi lɛmmɔ anumi na ɔ́talaku enu katɔ,

²³ na ɔ́kpali Katɔti ɔ́su ɔnini, “O Unwoti, Israel Katɔti, benwoti biala beeese aani ƒula kalɛ na katɔ iye kalɔ. Aadi ƒula bunyimi bɔni na ényimi ku ƒula bekyuli lɛlɔ, na aayɔ́-ma uwi ndi uwi. Ama bani nénu kalɔ basiaku-ɔ kama siin baadi ƒula litemi lɛlɔ ku bana kayi ƒui.

²⁴ Ése mina ɔti Dawid ƒula kabla ɔblane kenye kadi. Na lɛla lɛni na ásu ni, ɔkɛnku ƒula enu kabla kemmo áya na lɛla lɛmmɔ líbo-nwu kemmo aani kalɛ na use ɔmwi mɛni na bɔɔnu.

²⁵ “Na ɔƒɛni ni, Unwoti, Israel Katɔti, muuvele-ɔ ka kenye kani na ése mina ɔti Dawid uwi ɔni na ásu-nwu anini, ‘Ndubo bɔya na ƒula kaba kemmo ubi ɔnanabi utaadi lɛga na Israel uwi ƒui si baadi mina ɔda bubo lɛlɔ kaduɛ aani kalɛ na ábla,’ ubo-nwu kemmo.

²⁶ Ɔmmɔ ɔsu ni, O Israel Katɔti, ya na kenye kani ƒui na ése mina ɔti Dawid ɔni ndi ƒula kabla ɔblane ubo-nwu kemmo sɔsɔ.”

²⁷ “Nsu ni, bulie na Katɔti ɔdubulie kayawi kamɛni kemmo geen geen? Ɔ́si katɔ útédu katɔ kakaaka ƒui muedi kalakana-a bɔda. Amu bátaka kakpakɔ kani na lɛ́tu líte-ɔ na kétedu lɛla lɛdi mɛni kemmo?

²⁸ Nsu ni, O Unwoti, mina Katɔti, ƒula kabla ɔblane na ndi, anwuɔsu nu-mi bɔkpali na abla lɛla lɛni na lɛ́da mɔɔva-a anumi ɔmwi mɛni ete-mi.

²⁹ Buvele nda-a, ya na ƒula anumi asia kakpakɔ kamɛni lɛlɔ usien ku ɔƒɛ, kesii kani na ásu anini, ‘Mina lɛnyi lɛdubɔkya mmɔ’ kalɛ na enu ƒula kabla ɔblane bɔkpali si ɔ́kpali-ɔ na mɛni.

³⁰ Anwuɔsu nu ƒula kabla ɔblane ku Israelƒuɔ bɔkpali si bénye mɛni bákpali-ɔ. Na enu asiku katɔ, kesii kani ndi ƒula keliekɔ. Na si enu ni, na eti bana ekpidi akyiɛ-ma.

³¹ “Na muuvele-ɔ nnii si ɔnwa ɔdi ɔ́ƒiɔ ɔkpanadi na ɔlɛka use kenye kadi, na úbo kakpakɔ kamɛni Lɛkpabi lɛlɔ úbese kenye kammɔ ni,

³² na enu asiku katɔ na atɛ litemi lɛmmɔ. Na ɔni na ádu kɔtɔ ni, na ani-nwu kɔtu kalɛ na ɔ́manku. Na edie ɔni nátaƒiɔ ubo atina na ukeye.

³³ “Na si Israel, ƒula kadi bekyuli bésie kekpokɔ, na bana bekisine bádi-ma lɛlɔ ɔsi bana ekpidi ani bábla ɔsu, na bénwini bébo-ɔ kudɔ, na bébenye kakpakɔ kamɛni na béboku lɛlɔ kalɔ bévele-ɔ likpidi buti taakyiɛ ni,

³⁴ buvele nda-a, nu-ma bɔkpali asiku katɔ mmɔ. Na eti bana ekpidi akyiɛ-ma. Na asɔku-ma ebese kalɔ kani na éti éte bana bati kuuku mmɔ lɛlɔ.

³⁵ “Na si ɔnantu ɔ́da bɔna ɔ́ya ɔ́si ekpidi ani ƒula bekyuli bábla ɔsu, na bávumana kayi bébo kakpakɔ kamɛni anumi, na bákpali-ɔ ni,

³⁶ na enu-ma bɔkpali asiku katɔ kani na akya mmɔ. Na eti ƒula kabla bablane Israelƒuɔ ekpidi akyiɛ-ma, na atina-ma kalɛ na babla ala ulu siin lɛlɔ. Na aya na ɔnantu ɔsɔ use kalɔ utaana teewi kalɔ kani na éti éte ƒula kadi bekyuli ka beti benwini bana kadikɔ mɛni lɛlɔ.

³⁷ “Na si kɔka iye ɔlɛ buɛ ɔdi úbo kalɔ kamɛni bekyuli lɛlɔ iye edula ammɔ lɛlɔ, na baalɔlɔ ku kubweyi bamba beebile-nya iye bekisine néyu ƒula bekyuli bátu na beekpóku-ma ni,

³⁸ na enu bana bɔkpali. Na si ƒula bekyuli bammɔ badi bakya bewulo kɔnyana na bákɔliku enu bátina kakpakɔ kamɛni na bákpali Katɔti ni,

³⁹ na enu bana bɔkpali na kesii kani na akya na katɔ mmɔ. Na eti bana ekpidi akyiɛ-ma na ete-ma kebunku. Ɔsika awɔ lɛti ngyi ukyuli kasusu ku kayi kemmo, na aablaku ukyuli biala kalɛ na ɔ́manku

⁴⁰ kalɛ na ƒula bekyuli beteenu-ɔ litemi uwi biala na beli kalɔ kani na éti éte bula bati kuuku mɛni lɛlɔ.

⁴¹ “Na baƒɔ bani nási ɔgyu bébo mɛni na ƒula lɛnyi lɛni na bénu ɔsu, nsu bátasi Israel kalɔ lɛlɔ ni, nu-ma bɔkpali,

⁴² ɔsika badubunu ƒula lɛnyi bonwu lɛmmɔ ku kalɛ na eenene ƒula kɔnu taabla ɔyikun ala. Si bekyuli bammɔ udu bébo kakpakɔ kamɛni bébevele-ɔ lɛla lɛdi ni,

⁴³ na enu asiku katɔ kesii kani na eli mmɔ. Na abla lɛla biala na ɔƒɔ ɔmmɔ uye-ɔ ete-nwu kalɛ na kayawi ƒui benu ƒula lɛnyi na bayia-a aani kalɛ na ƒula kadi bekyuli Israelƒuɔ baabla. Na badubo bɔnu bɔti ka kakpakɔ kani lɛ́tu mɛni ni, ƒula lɛnyi lɛsia-ka lɛlɔ sɔsɔ.

⁴⁴ “Si ƒula bekyuli bésie betékpoku bana bekisine, na kesi kesii kani na adubɔtala-ma ka bésie, na bénwini anumi bátina ɔma ubendi ɔni na áƒuna ku kakpakɔ kani lɛ́tu líte ƒula lɛnyi mɛni na bakpali awɔ Unwoti ni,

⁴⁵ na enu bana bɔkpali asiku katɔ mmɔ na aya na badi lɛlɔ.

⁴⁶ “Ukyuli biala uuubo na ulábla likpidi. Anwuɔsu si bábla likpidi lɛdi ni, ɔƒɛni kalɛ adubuti kɔnyi akya-ma, na anyonu-ma ete bana bekisine, na badubuƒie-ma batákya bana kɔlɔ kɔni na amadɔ iye ɔgyu kakaaka kemmo.

⁴⁷ Nsu bakana bavumana kayi na kɔlɔ kɔni lɛlɔ na béƒie-ma bátákya mmɔ na bavumana kasusu na bevele-ɔ basu banini, ‘Bɔ́bla likpidi bɔ́ƒiɔ-ɔ na bula likyulikpi ku kalala ala bɔbla kemmo.’

⁴⁸ Si bénwini kayi ku kaƒɔ ƒui na bekisine kalɔ kammɔ lɛlɔ, na bénwini anumi bátina kalɔ kani na éti éte bana bati kuuku ku ɔma ɔni na áƒuna ku kakpakɔ kani na lɛ́tu líte ƒula lɛnyi mɛni na bákpali-ɔ ni,

⁴⁹ na enu bana buvele asiku kesii kani na eli na Katɔ mmɔ. Na enye-ma kama.

⁵⁰ Na eti bana ekpidi ani ƒui bábla-a akyiɛ-ma. Na aya na bana bekisine bammɔ banu-ma kɔnyana.

⁵¹ Ɔsika badi ƒula bekyuli bani na áda édie Egyipte kalɔ lɛlɔ, kalɔ kani kemmo nse aani ogya lɛyu lɛni kemmo na baanwamana abuala.

⁵² “Na muuvele nnii ƒula anumi ebimi na anu ami ƒula kabla ɔblane ku ƒula kadi bekyuli Israelƒuɔ kɔnyana, na enu ala ani na buuvele-ɔ. Na uwi biala na bákpali-ɔ bévele lɛla lɛdi ni, na enu ete-ma.

⁵³ Ɔsika ama na áƒuna álɛku kayawi bekyuli ƒui akɔ énwini ƒula bebi bani madi-ɔ ala. O Unwoti ɔni ntulo ƒui, lɛni na akɛnku ƒula kabla ɔblane Mose lɛlɔ ásu ése uwi ɔni na édie bula bati kuuku álɛku Egyipte kalɔ lɛlɔ.”

⁵⁴ Uwi ɔni na Salomo ɔ́wɔlɔ Katɔti bɔkpali bɔmɛni ku bekyuli evelela ani na ɔ́da ɔ́va Unwoti anumi ƒui ni, ɔ́ta únye na Unwoti lɛkpabi anumi na kesii kani na ɔ́lɛ akɔnkɔ na ɔ́talaku enu katɔ ɔ́tina kayaa

⁵⁵ na únye mmɔ na úte Israelƒuɔ ƒui kusɛ kusɛ ku lɛdi momoomo ɔ́su ɔnini,

⁵⁶ “Bemwi Unwoti ɔni néte nwuna bekyuli Israelƒuɔ ƒui bɔnwuna aani kalɛ kani na úse kenye úse. Na útada útavia kenye kani na úse ɔ́siaku nwuna kabla ɔblane Mose lɛlɔ ina litemi linwi pɛ.

⁵⁷ Na muuvele nnii Unwoti, bula Katɔti, ulieku-bu aani kalɛ na úlieku bula bati kuuku. Na utanyonu-bu iye udie-bu atu kudii.

⁵⁸ Na ɔya na bunwini bula kayi bɔsia-nwu lɛlɔ uwi biala. Na bɔsiaku-nwu kama siin na nwuna ulu biala lɛlɔ.

⁵⁹ Na muuvele nnii mina etemila ku bɔkpali bɔni ƒui na lɛ́kpali Unwoti lɛ́da lɛva-nwu anumi mɛni ni, ala ammɔ atɛ bula Unwoti Katɔti anumi na utaanu-nya usien ku ɔƒɛ. Na ɔya na ami nwuna kabla ɔblane ku nwuna bekyuli Israelƒuɔ bɔlɛ lili na bana limeyi ndi limeyi awiala kenye.

⁶⁰ Ɔmɛni ndubɔya na kayawi bekyuli ƒui banu bati ka Unwoti lɛti pɛ kani ndi Katɔti, na ɔdi biala ɔsɔ uuubo.

⁶¹ Na amii bani ndi nwuna bekyuli ni, bina kɔyi kɔsia Unwoti ɔni ndi bula Katɔti lɛlɔ. Na bitaadi nwuna ɔda bubo ƒui lɛlɔ aani kalɛ na bɛ́bla ɔmwi kadi mɛni.”

Ɔga Salomo Úti Kakpakɔ Kammɔ Ɔ́kya Unwoti Enu Kemmo

⁶² Ɔmmɔ kama Ɔga Salomo ku Israelƒuɔ ƒui bábla akpala lidu lidu béte Unwoti.

⁶³ Na ɔ́du ɔmantɛ bakɔ mpim aavlanyɔ-inyɔ (22,000) ku baƒonu ku bese mpim eti anyɔ ku aavlanyɔ (120,000) na béti bábla unwi bɔbla akpala béte Unwoti. Anwuɔsu Ɔga Salomo ku Israelƒuɔ bammɔ béti kakpakɔ kammɔ bákya Unwoti enu kemmo.

⁶⁴ Na limeyi lɛmmɔ kani lɛlɔ ni, Salomo údie Unwoti kakpakɔ kaduli kani nwi anumi kakɛ ntɛntɛ bɔdi sɛsɛɛ na ɔ́bla mmɔ kedee. Na mmɔ na ɔ́kyula akpala ku edula akpala, na ɔ́kyula lɛmwi lɛni na bédie na unwi bɔbla akpala bɔbla lɛnɔ kemmo, ɔsika lɛbualagyie lɛkpabi lɛni nlɛ Unwoti anumi mmɔ lise blii suɛ lite akpala amɛni ƒui bɔkyula na mmɔ.

⁶⁵ Na kakpakɔ mmɔ ni, Salomo ku Israelƒuɔ ƒui bádi edula edeedi bɔƒɛ limeyi, na bádi-ni emeyi leevu-ene. Na bekyuli pii bási ɔgyu bébo. Na badi lɛnɔ bási Hamat úbedu Egyipte Kɔwɛ kemmo.

⁶⁶ Na ka bádi limeyi lɛmmɔ báwɔlɔ kadi kegye ni, ɔ́ya na bekyuli bammɔ ƒui bátɔlɔ. Na bekyuli bammɔ béte ɔga kusɛ kusɛ ku kubiti ku lɛlɔyɔ ɔ́si ala abuni ani na Unwoti ɔ́bla úte nwuna kabla ɔblane Dawid ku nwuna bekyuli Israelƒuɔ ɔsu.