Baga 1 7 - Katɔti Ɔku Kedee

Salomo Ɔ́tu Nwuna Ɔga Kaduli

¹ Ɔmmɔ kama ni, Salomo ɔ́tu nwuna ɔga kaduli, na akwa leevu-atɛ na úti ɔ́tu-ka.

² Na Lebanon lɛku kemmo na ɔ́siku atula ani na úti ɔ́tu-ka. Na kana bune bɔdi lɛgba bɔka eti atɛ (150). Na bɔbɛbɛ bɔdi lɛgba bɔka liti ku aavlanyɔ-ɛlɔ. Na nwuna bɔkuku bɔdi lɛgba bɔka aavlene-ɛlɔ. Na úti sida ɔ́bla akpa ɔ́lɛ lɛgaala ine bɔni lɛlɔ na sida lɛta lɛni na bánwi mmɔ lɛsia.

³ Na sida kani na úti úbi ɔtɔ ɔmmɔ ɔ́sia lɛta lɛmmɔ lɛlɔ. Na lɛta lɛni nsia akpa ammɔ lɛlɔ libo aavlene-ɛlɔ. Na nina leevu-ɛlɔ nsia akpa ɔgaala biala lɛlɔ. Sida kugyiikɛ aavlene-ɛlɔ na úti úbi-nwu.

⁴ Na ɔ́kya lɛƒansili lɛmmɔ ɛtɛ ɛtɛ ɔ́siaku lɛlɔ na katɔ kakɛ ƒui, na lɛƒansili lɛmmɔ ƒui éti anumi átina lɛlɔ.

⁵ Na kɔyakun ligyii lɛmmɔ ni, ɔ́nwi-ku kangya, na lɛƒɛnyi líne litulo eli ku lɛgba, na lɛkya ɔtɔ ɔmmɔ anumi kakɛ. Bákya kɔyakun kɔmmɔ ɛtɛ ɛtɛ, na kúti anumi kɔ́tina lɛlɔ.

⁶ Na ɔ́lɛ akpa adi na lɛgaala kemmo. Na lɛgaala lɛmmɔ bune bɔdi lɛgba bɔka liti ku aavlanyɔ-ɛlɔ na bɔbɛbɛ bɔdi lɛgba bɔka aavlene-ɛlɔ. Na bábla ɔƒɛƒɛɛ kaƒɔkɔ kadi na anumi kakɛ na nwuna kama na akpa adi enye na bébi-nwu katɔ.

⁷ Na ɔ́tu lɛgaboku kalɛkɔ ɔtɔ kesii kani na uulie taatɛ litemi, na úti sida kugyiikɛ ɔ́mana ɔ́si kalɔ útédu katɔ.

⁸ Na ɔga kaduli kani geen na anwu ɔlati ɔlɛka ulie ni, kakya késie kama kakɛ, na ɔ́tu-ka aani kedeedi kani na ɔ́ka bɔtu kalɛ. Salomo ɔ́sɔ ɔ́tu ɔga kaduli bamba aani anwu kadi kammɔ udu úte ulekudi ɔni ndi Egyipteni Ɔga Ƒarao ubidi.

⁹ Na kɔduli kɔmɛni ƒui ɔ́si keyi útéduo kaduli bonwu kammɔ kemmo ku ɔka ɔni na bákya kalɔ útédu lɛsa atu ni, atabi ani náƒɔ kuye geen na úti ɔ́tu-ku. Na bánwi atabi ammɔ kama ku anumi siin ku abuala.

¹⁰ Na ɔtɔ umodi ɔmmɔ ni, atabi bonwu bonwu ani na áƒɔ kuye na adi bune bɔdi lɛgba bɔka leevu-inyɔ, na adi lɛnɔ adi lɛgba bɔka maane ku lɛgba bɔka leevu-ɛlɔ na béti bákya ɔka ɔmmɔ kalɔ.

¹¹ Na lɛtɔ lɛmmɔ eli kakɛ ni, béti atabi bamba ani bákɔku bábwɛ básia. Na béti sida ligyii lɛdi básia lɛta.

¹² Na ɔga kaduli bonwu kammɔ ni, bátu atabi kɔsia kɔtɛ kowodu bámana-ka. Na béti sida ligyii lɛni na bánwi básia lɛta na atabi kɔsia kɔtɛ kɔmmɔ eli aani kalɛ na bábla kakpakɔ ɔdi.

Béte Huram Kabla Kadi Ka Ɔbla

¹³ Amu na Ɔga Salomo ɔ́tala ka betétiku ɔnana ɔdi na baalɔ-nwu banii Huram na ɔ́si Tiro beboku.

¹⁴ Ɔnana ɔmɛni uni ɔdi ukpinele na ɔ́si Neƒtali kɔdua kemmo. Na ɔti ɔ́si Tiro na ɔɔbla abuala egyiedi lɛlɔ kabla. Na Huram ɔmmɔ ɔlati ɔgyi abuala egyiedi lɛlɔ kabla lidu lidu geen. Úbo Ɔga Salomo kudɔ, na úbabla kabla kani ƒui na úte-nwu ka ɔbla kaduɛ.

¹⁵ Na Huram ɔ́nwamana abuala egyiedi ɔ́bla akpa únyene lɛgaala inyɔ kemmo. Na ana bɔkuku bɔdi lɛgba bɔka aavlanyɔ-maatɛ. Na bubomo bɔdi lɛgba bɔka leevu-maane ɔ́mana.

¹⁶ Na ɔ́sɔ ɔ́nwamana abuala egyiedi ammɔ ɔ́bla ligegu kubila inyɔ úbi akpa ammɔ eli na ɔdi biala bɔkuku bɔdi lɛgba bɔka maatɛ ku kakɛ.

¹⁷ Na úti abuala adi na ɔ́vili ku lɛlɔ úbo ɔ́da ligegu kubila kɔmmɔ lɛlɔ ɔ́bala akpa ammɔ lɛlɔ, na ɔgaala biala ɔda maatɛ.

¹⁸ Na ɔ́bla kugyii kɔdi udu ebi lɛgaala inyɔ na lɛda lɛ́mana abuala ani na ɔ́vili ku lɛlɔ mmɔ ɔ́mana na úti ɔ́kya ligegu kubila kɔni na akpa ammɔ eli ɔdi biala bɔdia.

¹⁹ Na ligegu kubila kɔni mbi akpa ani nlɛ ɔƒɛƒɛɛ kaƒɔkɔ kammɔ eli ni, ɔ́bla-ku aani egyii anwula adi udu ani bɔkuku mabla aani lɛgba bɔka ɛku.

²⁰ Ɔ́bla kesii kadi na kese aani ligegu na ude abuala ani na ɔ́vili ɔ́danku lɛlɔ mmɔ. Akpa anyɔ adi enye na ákuku etulo mmɔ na lɛta inyɔ bɔsia-ni lɛlɔ. Mmɔ na ɔ́bla egyii adi udu ebi eti anyɔ (200) na lɛgaala kemmo ɔ́mana.

²¹ Na Huram ɔ́tu akpa anyɔ na kakpakɔ anumi ɔƒɛƒɛɛ kaƒɔkɔ. Na lɛkpa lɛni na kada kakɛ baalɔ Yakin. Na lɛni na katɔ kakɛ na baalɔ Boas.

²² Na lɛta inyɔ lɛni nsia-ni eli ni, egyii anwula ani baalɔ lili udu kenye na ɔ́bla-ni. Anwuɔsu ɔ́wɔlɔ akpa ammɔ lɛlɔ kabla.

²³ Amu na ɔ́nwamana lɛbuala lɛdi ɔ́bla ntu kewikɔ bonwu kunu kunu lɛdi. Na ɔ́si ɔvi unwi úsie ɔkladi ubo lɛgba bɔka leevu-ɛlɔ. Na nwuna bɔkuku bɔdi lɛgba bɔka maatɛ. Na nwuna bɔka bɔmana bɔdi lɛgba bɔka aavlene-ɛlɔ.

²⁴ Úti lɛsii bonwu lɛdi ɔ́lɛ ɔ́danku ntu kewikɔ bonwu kamɛni ɔ́ka ɔ́mana na lɛgaala inyɔ kemmo.

²⁵ Ɔ́vɔ ntu kewikɔ bonwu kamɛni ɔ́lɛ bakɔ bebuo bavɔdi leevu-inyɔ lɛlɔ. Na ɛtɛ baanu katɔ kakɛ na ɛtɛ baanu ɔƒɛ kanukɔ na ɛtɛ baanu kada kakɛ na ɛtɛ baanu ɔƒɛ katukɔ. Ntu kewikɔ bonwu kamɛni kalɛ bebuo bamɛni lɛlɔ na bebuo bamɛni ƒui lɛka líbasala ntu kewikɔ bonwu kamɛni kalɔ na ntɛntɛ.

²⁶ Na ntu kewikɔ kamɛni bumini úbalɛ atu bɔbla aani lɛnimi bune. Na nwuna kenye kewi aani ɔɔƒɛɛ na use aani kugyii anwula ani nébimi. Ntu kewikɔ kammɔ kadubɔƒɔ aani ntu lɛsii bonwu mpim leevu-unwi ku eti leevu (11,500).

²⁷ Ɔ́nwamana abuala egyiedi ɔ́bla ala kasiakɔ leevu kɔni na bakana bɔda bɔgyu ana kɔlɛkɔ. Na ɔdi biala bune ku bɔbɛbɛ bɔdi lɛgba bɔka ɛku ɛku. Na ɔdi biala bɔkuku lɛnɔ bɔdi lɛgba bɔka ine ku kakɛ.

²⁸ Na kalɛ na úti ɔ́bla ala kɔsiakɔ kɔmmɔ ndi ka úti abuala egyiedi ammɔ kɔlɛkɛ eku eku ɔ́danku ligyii lɛni na ɔ́bla na linye mmɔ lɛlɔ.

²⁹ Na kɔlɛkɛ ekuku ani ndanku ligyii lɛni nnye mmɔ lɛlɔ ni, ɔ́bla bagyata ku bakɔ ku bebweyi udu ɔdi baalɔ Kerub ɔ́sia ligyii lɛmmɔ ƒui lɛlɔ. Na bebuo bamɛni eli ku kada kakɛ ni, ɔ́bla aka adi ku bɔdia úbo ɔ́mana.

³⁰ Na ala kɔsiakɔ kɔmɛni ɔdi biala kalɔ ni, úti abuala egyiedi ɔ́bla kɛɛkɛ lɛgba udu ine ine ɔ́kya eƒi adi kemmo na aayá na liinwíni. Na akyami ani mbo lɛgba ine lɛni na ɔ́bla ku abuala egyiedi alɛ ebi ammɔ ɔdi biala lɛlɔ. Na ɔ́bla aka ku bɔdia ɔ́mana-nya lɛƒɛnyi.

³¹ Na ala kɔsiakɔ ligyii lɛmmɔ kemmo ni, ubu ɔdi ɔtɛ na ligyii kunu kunu lɛdi lɛkya-ni kemmo útédu aani ɔgba unwi ku kakɛ bɔgyu. Na libu lɛni kemmo na ligyii lɛmmɔ lɛkya lɛnɔ lise kunu kunu na nina kalɔ bɔbɛbɛ bɔdi aani lɛgba bɔka inyɔ ku liku blii. Na libu lɛmmɔ atu ɔ́mana ni, údie bɔta bɔdi ɔ́mana. Na ala kɔsiakɔ abuala egyiedi kɔlɛkɛ kɔmmɔ kubo lɛƒɛnyi ine ine, na kuuuse kunu kunu.

³² Lɛgba lɛmmɔ lɛkya abuala kɔlɛkɛ ekuku ammɔ kalɔ. Na eƒi ani mɔɔyá na lɛgba lɛmmɔ liinwíni mmɔ lɛdanku ala kɔsiakɔ ligyii lɛmmɔ lɛlɔ. Lɛgba lɛmmɔ ɔdi biala bɔbɛbɛ bɔdi lɛgba bɔka inyɔ ku kakɛ ɔ́si ɔvi unwi úsie ɔvi unyɔdi.

³³ Na lɛgba lɛmmɔ lise aani bapɔnkɔ kɛɛkɛ lɛgba. Na eƒi ani mɔɔyá na liinwíni mmɔ ku lɛbuala kunu kunu lɛni lɛlɔ na lɛgba lɛmmɔ lɛ́ka lɛ́mana ku kɔbuɛlɛmii kɔni nda abuala kunu kunu ammɔ lɛlɔ úbedu abuala abɛɛ ani ndanku eƒi ani mɔɔyá na liinwíni ƒui ni, abuala egyiedi na ɔ́nwamana ɔ́bla-nya.

³⁴ Ala kɔsiakɔ kɔmmɔ ɔdi biala ubo kɔdakɔ ine, na kɔlɛ kɔ́si lɛƒɛnyi ine bɔmmɔ lɛlɔ.

³⁵ Na ala kɔsiakɔ kɔmmɔ eli ni, lɛla kunu kunu lɛdi lɛlɛ aani animi atɛ bune na ala ani nse aani kugyikpo kɔdanku-nwu lɛlɔ ábada kɔsiakɔ ligyii lɛmmɔ kɔdakɔ kɔni nlɛ-ni lɛlɔ ku abuala kɔlɛkɛ kɔmmɔ lɛlɔ.

³⁶ Na údie Kerub bebweyi udu ku bagyata ku ebo bɔta ɔ́mana kugyikpo kɔmmɔ lɛlɔ kesii kani na kuƒi kɔdi kɔkya, na ɔ́bla aka ku bɔdia adi ɔ́ka ɔ́mana bɔta bɔmmɔ.

³⁷ Na lɛni na ɔ́bla ala kɔsiakɔ leevu kɔmmɔ na kɔ́lɛ lɛlɔ geen na udu biala kemmo.

³⁸ Na ɔ́bla ntu kuwikɔ leevu. Na kewikɔ biala kadubɔƒɔ aani ntu lɛsii bonwu eti ene ku avlaatɛ (230) ɔ́lɛ ala kɔsiakɔ ligyii lɛmmɔ lɛlɔ.

³⁹ Na úti ala kasiakɔ ligyii lɛmmɔ ɛlɔ ɔ́lɛ kakpakɔ kammɔ kada kakɛ, na úti ɛlɔ ɔ́lɛ katɔ kakɛ. Na úti ntu kewikɔ bonwu kammɔ ɔ́lɛ kakpakɔ kammɔ ɔkɔkɔ ɔni na kada kakɛ úti úsie nwuna ɔƒɛ katukɔ.

⁴⁰ Na Huram ɔ́sɔ ɔ́bla ebui ku ogya budie kɔlɛkɛ ku lɛsii lɛni kemmo na beewi ntu taakuna. Anwuɔsu Hiram ɔ́wɔlɔ Katɔti kakpakɔ kabla kani ƒui na Ɔga Salomo úte-nwu ka ɔbla.

⁴¹ Ɔ́bla akpa anyɔ ammɔ, ku ligegu kubila inyɔ kɔni na ɔ́bla úbi akpa ammɔ eli. Na ɔ́bla abuala ani na ɔ́vili ku lɛlɔ kasala bun bun akpa anyɔ ani na úti ɔ́kya akpa ammɔ eli ligegu kubila kɔmmɔ bɔdia.

⁴² Ɔ́bla kugyii ebi udu eti maane (400) ani na ɔ́bla na lɛgaala inyɔ kemmo ɔ́ka ɔ́mana abuala ani na ɔ́vili ku lɛlɔ bun bun akpa anyɔ mmɔ úti ɔ́kya ligegu kubila kɔni mbi akpa ammɔ eli bɔdia.

⁴³ Na ɔ́bla ala kɔsiakɔ ligyii leevu ku nina ntu kuwikɔ leevu.

⁴⁴ Ɔ́bla ntu kewikɔ bonwu ku bakɔ leevu-inyɔ bani lɛlɔ na ntu kewikɔ kammɔ kenye.

⁴⁵ Na ɔ́bla ebui ku ogya budie kɔlɛkɛ ku lɛsii lɛni kemmo na beewi ntu taakuna. Ala amɛni ƒui na Huram ɔ́bla úte Ɔga Salomo úte Unwoti kakpakɔ kammɔ ku abuala egyiedi ani na báƒɔ sɛɛn na eekeye.

⁴⁶ Na bɔnwamana na ɔɔnwamana abuala amɛni teewi ala ani na ɔ́vɔ únyene kesii kani baalɔ banii Sukot ku Sereda na Yordan Ketu kɔtu mmɔ lɛlɔ.

⁴⁷ Ɔga Salomo útaya na bani ala amɛni unu banu ɔ́si ana bumomo ɔsu. Anwuɔsu bátakana na bati abuala egyiedi amɛni bumomo bɔni na béti bábla kabla kammɔ.

⁴⁸ Na Salomo ɔ́bla Unwoti kakpakɔ kemmo kabla lɛlɔ ala ƒui. Ɔ́bla sika ugyiedi lɛkpabi ku sika ugyiedi ala kasiakɔ kani lɛlɔ na baasia bodobodo ɔni muusé Unwoti anumi.

⁴⁹ Ɔ́bla sika ugyiedi ligyii lɛni lɛlɔ na baatu likpo taalɛ na katɔma kedee kammɔ kemmo na anumi kakɛ. Na ɔ́bla egyii anwula ani na bábla ku sika ugyiedi ku lɛsogya ku kɔbwɛlɛ kɔni na beedie ogya agyabi.

⁵⁰ Ɔ́bla sika ugyiedi akyami bonwu ku asogya linenela ku lɛsii lɛni kemmo na beewi ntu taakuna ku ebui ani kemmo na beewi oloƒui taakyula ku akyami ku sika ugyiedi abuala ani muunwíni ku lɛlɔ na aada kɔyakun kɔlɛmikɔ úte katɔma kedee kammɔ ku kakpakɔ kasalakɔ ɔtɔ ɔmmɔ kɔlɛmikɔ lɛnɔ.

⁵¹ Uwi ɔni na Ɔga Salomo ɔ́wɔlɔ kakpakɔ kammɔ ƒui kabla ni, úti ala ani ƒui na ɔti Dawid úti ɔ́kya Unwoti enu, ani ndi sika ɔƒualadi ku sika ugyiedi ku kakpakɔ kammɔ kɔlɛmii, na úti útése Unwoti kakpakɔ na ala ani náƒɔ kuye kesekɔ ɔtɔ kemmo.