Baga 1 5 - Katɔti Ɔku Kedee

Salomo Ɔ́klibi Lɛlɔ Úte Katɔti Kakpakɔ Bɔtu

¹ Uwi ɔni na Hiram ɔni ndi Tiroƒuɔ ɔga únu ka béti Salomo bése ɔti Dawid keliekɔ aani ɔga kalɛ ni, ɔ́tala bekyuli ɔ́kya-nwu. Ɔsika anwu ku Dawid ntɛ búse kpɛtɛ kpɛtɛ geen.

² Amu na Salomo úti kenye kamɛni úmene Tiro ɔga ɔnini,

³ “Agyi ka mina ɔti Dawid lɛga bɔdi uwi ƒui ni, na bekisine bátaata kekpo nwuna lɛlɔ geen na lɛƒɛnyi ƒui. Ɔmmɔ ɔsu, útakana ɔtɔ bɔtu búte Unwoti ɔni ndi nwuna Katɔti, útédu ka Unwoti úti nwuna bekisine ƒui ɔ́kya-nwu lɛgba kalɔ.

⁴ Nsu ɔƒɛni ni, mina Unwoti Katɔti úte-mi bɔnwuna na mina amadɔ ƒui. Na ukisine iye ɔgbankpi biala uuubo kesi kesii.

⁵ Anwuɔsu mɔɔyɔ́ ka lɛtu kakpakɔ lite mina Unwoti Katɔti. Lɛni na Unwoti ɔ́su mina ɔti Dawid ɔnini, ‘Ƒula ubidi ɔni ndubulie-ɔ keliekɔ na ƒula liboku lɛlɔ ni, anwu ndubo mina kakpakɔ bɔtu.’

⁶ “Ɔmmɔ ɔsu ni, bo ɔda na bekulo sida egyii kpakplaa ani na Lebanon mmɔ bete-mi. Na ƒula bekyuli ku mina badi babla kabla basala. Na kayu biala na ɔlɛka lɛƒɔ ƒula kabla bablane na kabla kamɛni lɛlɔ ni, ndubɔƒɔ-ka. Na awɔ ɔlati agyi ka buuubo bekyuli bani na bagyi egyii bɔda lɛlɔ kabla aani Sidonƒuɔ.”

⁷ Amu ka Hiram únu Salomo kenye kamɛni ni, kubiti kɔ́da-nwu geen na ɔ́su-nwu ɔnini, “Bekyuli ƒui bemwi Unwoti ɔmwi kadi, ɔsika úte Dawid ubi ɔnundane ɔni na ɔdi kadi bekyuli bonwu bamɛni lɛlɔ.”

⁸ Anwuɔsu Hiram lɛnɔ úti kenye kamɛni úmene Salomo ɔnini, “Lɛ́ƒɔ ƒula kenye kani na ásia-mi mmɔ. Na sida egyii ku egyii bamba etenku ani na aawia mmɔ ni, ndubute-ɔ ana ƒui.

⁹ Na ndubɔya na mina bekyuli bani etenku ammɔ basiku Lebanon bebedu ɛpu kɔtu na batɛ-nya bakya ɔkɔlɔ kemmo na beti basia ntu anumi na ɛpu lɛlɔ bebedu kesii kani na aawia-nya. Na si bédu mmɔ ni, mina bekyuli badubɔƒɛnimi etenku ammɔ, na ƒula bekyuli babla ɔkladi. Na lɛla lɛni mɔɔwia ka abla ndi ka eteete mina bekyuli adila.”

¹⁰ Anwuɔsu Hiram úte Salomo sida egyii ku egyii bamba etenku ani na ɔɔwia ƒui.

¹¹ Na Salomo úteete Hiram kakpa lɛkyami lɛkɔkula mpim eti anyɔ ku aavlanyɔ-ɛlɔ ku nnɔ abo keyile mpim eti anyɔ ku leevu-ɛlɔ lɛkwa ndi lɛkwa. Na úuti taanu nwuna bekyuli lɛlɔ.

¹² Na Unwoti ɔ́di nwuna linyese lɛlɔ ɔkɛnku lɛnunda lɛni na úte Salomo ɔsu. Na atu bɔyɔ bɔ́kya Hiram ku Salomo ntɛ kaduɛ na bana inyɔ bényimi unwi bɔbla kenye béte lɛlɔ.

¹³ Na Ɔga Salomo ɔ́wia banamu mpim avlaatɛ (30,000) ɔ́siku Israel kalɔ lɛlɔ ƒui.

¹⁴ Na úti Adoniram ɔnii utaanu-ma lɛlɔ. Na úle bekyuli bammɔ akpa atɛ, na lɛkpa biala baakya Lebanon kɔbuli kunwi. Na beenwíni teesie bana lɛma taatánwuna abuli anyɔ.

¹⁵ Na Salomo ubo banana mpim liti ku aavlanyɔ (70,000) bani muuti atabi, na ɔsɔ ubo mpim liti ku avlaatɛ (80,000), na ama nkya abi eli beekú atabi ammɔ taanwi.

¹⁶ Na Ɔga Salomo údie nkyuli mpim ɛtɛ ku eti aku (3300) ka bataanu kabla kammɔ lɛlɔ.

¹⁷ Na Ɔga Salomo ɔda bubo kenye ni, bekyuli bammɔ béku atabi bálɛku kalɔ kemmo na bánwi atabi bonwu bonwu ammɔ na aadia bɔnu kalɛ na beti bakya kakpakɔ kammɔ awodu ɔka kalɔ.

¹⁸ Na Ɔga Salomo ku Hiram kabla bablane ku banana bani nási Gebal bánwi atabi ammɔ kalɛ na ɔdia kakpakɔ kammɔ bɔtu.