Baga 1 3 - Katɔti Ɔku Kedee

Salomo Úye Lɛnunda

¹ Na uwi ɔmmɔ ni, Salomo ku Egyipteƒuɔ ɔga bényimi kenye kadi na bábla unwi, na úti ubidi ulekubi. Na úti ugblebi ɔmmɔ úboku ɔma unengudi ɔmmɔ kemmo. Na ɔ́kya mmɔ útédu uwi ɔni na ɔ́tu nwuna kaduli ku Unwoti kakpakɔ ku Yerusalem awodu ammɔ ɔ́mana ɔ́wɔlɔ.

² Na bana kadi bekyuli ni, bamu baakpá na abi eli, ɔsika bátatu Unwoti kakpakɔ tɔ.

³ Na Salomo ɔ́yɔ Unwoti na uwi ɔni na ɔ́siaku ɔda ɔni na ɔti Dawid úbo-nwu kama ɔsu. Na lɛla lɛni kani na ɔ́bla ɔ́ƒiɔ ndi ɔni na anwu lɛnɔ ɔ́du bebuo pii úti ɔ́bla akpala na ɔ́kyula oloƒui na akpabi ani na bátu na abi ammɔ eli ɔsu.

⁴ Limeyi lɛdi ni, Ɔga Salomo úsie Gibeon útábla akpala, ɔsika na uwi ɔmmɔ kemmo ni, mmɔ na lɛkpabi lɛni náƒɔ lɛnyi geen lɛkya. Na Salomo úti bebuo apim unwi ɔ́bla bɔkyula akpala.

⁵ Na Gibeon mmɔ ni, Unwoti údie lɛlɔ ɔ́tina Salomo na kɔna kemmo usien ɔdi. Na Katɔti ɔ́su Salomo ɔnini, “Vele-mi lɛla biala na aayɔ́ na ndubuti-ni lite-ɔ.”

⁶ Amu na Salomo údie kenye ɔnini, “Édie kɔnyana bɔnu geen átina ƒula kabla ɔblane ɔni ndi mina ɔti Dawid. Ɔsika ɔ́bla ala ulu lɛlɔ na úse siin na nwuna kayi kemmo na ƒula anumi. Na ésie anumi na eedie kɔnyana bɔnu bɔmɛni taatina-nwu, na éte-nwu anwu ɔlati kaƒɔ ubi anii úlie nwuna liboku lɛlɔ ɔmwi kadi.

⁷ “O mina Unwoti Katɔti, ɔƒɛni ni, áya na ami ƒula kabla ɔblane línwini ɔga na mina ɔti Dawid kenyekɔ. Nsu ɔnamu kani ndi, na lɛɛɛgyi kalɛ na lɛbla kabla kamɛni udu lɛvinku.

⁸ Na nnye-ɔ anumi mɛni aani ƒula kabla ɔblane na ƒula kadi bekyuli baƒunadi pii bamɛni akɔ bani na ukyuli biala ulakana-ma bɔka.

⁹ Anwuɔsu te ami ƒula kabla ɔblane kayi kani na liti lɛda ƒula bekyuli bamɛni na lɛnu lɛbuni ku likpidi lɛti. Ɔsika si átabla ɔmɛni ni, ɔma ndubɔkana ƒula bekyuli pii bamɛni udu bɔda?”

¹⁰ Na lɛla lɛni na Salomo úye mɛni lɛ́da Unwoti kubiti.

¹¹ Anwuɔsu Katɔti ɔ́su-nwu ɔnini, “Ka ɔmɛni na éye-mi na éteye ngba gyɔlɔɔ iye akɛla étete lɛlɔ iye aya ƒula bekisine ƒui bekpi, mmomu bɔwia na áwia ka ati bekyuli bammɔ bɔda siin ɔsu ni,

¹² ndubɔbla lɛla lɛni na éye-mi lite-ɔ. Na ndubute-ɔ lɛnunda ku kayi kani na eti awia ala kemmo ati. Na ukyuli ɔdi útelie dii, na ukyuli ɔdi lɛnɔ ɔsɔ ulebo lɛnɔ na wedu ƒula kalɛ.

¹³ Lɛnɔ ni, ndubute-ɔ akɛla ku ɔbu ɔni na éteye muedi kalɛ na ƒula ngba emeyi ƒui beleti ɔga biala balákɔku-ɔ.

¹⁴ Na si ásia mina ulu lɛlɔ na ádi mina ɔda bubo lɛlɔ aani kalɛ na ƒ'ɔti Dawid ɔ́bla ni, ndubute-ɔ ngba gyɔlɔɔ.”

¹⁵ Amu na Salomo ɔ́gyinya na ɔ́nu ɔ́ti ka kɔna na úgye. Mmɔ ni, ɔ́sɔ únwini úsie Yerusalem na úténye Unwoti Bunyimi Adaka ɔmmɔ kudɔ. Na ɔ́bla bɔkyula ku unwi bɔbla akpala úte Unwoti. Ɔmmɔ kama ɔ́ya na bánwa adila kaduɛ na anwu ku kabla bablane bani mɔɔbla-nwu kabla na kaduli mmɔ bádi limeyi.

Salomo Ɔ́tɛ Litemi Lɛnunda Kemmo

¹⁶ Limeyi lɛdi ni, bayalɛ inyɔ badi bébo ɔga kudɔ na bébenye-nwu anumi.

¹⁷ Mmɔ na bana kemmo unwi ɔ́su ɔnini, “Mina ati, uleku ɔni nnye-mi kudɔ mɛni ni, ami ku-nwu nli kaduli kenwi, na lɛ́wɔ na anwu ɔlati anumi.

¹⁸ Limeyi lɛtɛdi kama ka lɛ́wɔ ubi ɔmmɔ ni, uleku ɔmɛni lɛnɔ ɔ́wɔ. Bula inyɔ kani nkya na ukyuli biala uuulie kaduli kammɔ asa na bɔ́wɔ.

¹⁹ “Na usien ni, uleku ɔmɛni ubidi úbekpi. Ɔsika ɔ́tɛ-nwu lɛlɔ ɔ́du.

²⁰ Ɔmmɔ ɔsu ɔ́ta usien lɛdibantɛ na úbagyu mina ubi ɔni ntɛ-mi kudɔ uwi ɔni na ami ƒula kabla ɔblane ntɛ mɔɔlɛɛ, na úti ɔ́va nwuna lɛnyii kudɔ. Na úti ɔni nékpi mmɔ lɛnɔ úbava mina lɛnyii kudɔ.

²¹ Amu ka kadi kégye ni, lɛ́ta nnii muute mina ubi lɛnyii. Na ka mɔɔnu ni, na ubiwɔ ɔmmɔ úkpi. Ka lɛ́sia-nwu anu kaduɛ uwi ɔni na kadi kábla nwaa ni, lɛ́nu lɛ́ti ka ɔɔɔdi ubi ɔni lɛ́wɔ mmɔ na ɔdi.”

²² Amu na uleku ɔkladi ɔmmɔ ɔ́su ɔnini, “Oowo! Ɔni nékpi mmɔ ndi ƒula ɔdi. Na ɔni nli ngba ndi mina ɔdi.” Nsu uleku udeedi ɔmmɔ unye kpakplaa na ɔɔsu ɔnini, “Oowo! Ɔni nékpi mmɔ ndi ƒula ɔdi na ɔni nli ngba ndi mina ɔdi.” Na lɛni bákya unyeƒi laa na ɔga anumi.

²³ Amu na ɔga ɔ́su ɔnini, “Unwi ɔɔsu ɔnini, ‘Mina ubidi nli ngba,’ na unyɔdi lɛnɔ ɔɔsu ɔnini, ‘Oowo! Ƒula ɔdi nékpi na mina ɔdi nli ngba.’ ”

²⁴ Mmɔ na ɔga ɔ́su ɔnini, “Biti kewii bite-mi.” Anwuɔsu béti kewii béboku ɔga ɔmmɔ.

²⁵ Amu na úbo ɔda ɔnini, “Bile ubiwɔ ɔni nli ngba mmɔ kemmo inyɔ na biti kakɛ bite unwi, na biti kakɛ kanyɔdi bite ɔkladi.”

²⁶ Mmɔ na uleku ɔni ngyi ka ubidi nli ngba mmɔ ni, kaƒɔ kákywi-nwu kéte ubidi na ɔ́su ɔnini, “Mina ati, buvele nda-a, ti ubi ɔmmɔ te-nwu, na batadu-nwu!” Nsu uleku unyɔdi ɔmmɔ anwu ɔnini, “Kudii! Bile-nwu kemmo inyɔ na ami ku-ɔ ƒui ɔdi ɔsɔ ulákɛ ubi ɔmmɔ lɛnɔ.”

²⁷ Mmɔ na ɔga ɔ́da litemi lɛmmɔ na ɔ́su ɔnini, “Biti ubiwɔ ɔni nli ngba mmɔ bite uleku udeedi ɔmmɔ na bitadu-nwu. Ɔsika ubi ɔmmɔ uni mmɔ.”

²⁸ Uwi ɔni na Israelƒuɔ ƒui bénu kalɛ na ɔga ɔ́tɛ litemi lɛmmɔ ɔ́vinku ni, báyia ɔga ɔmmɔ. Ɔsika bánu báti ka Katɔti lɛnunda na úti ɔ́tɛ litemi lɛmmɔ.