Amos 5 - Katɔti Ɔku Kedee

¹ Israel kadi bekyuli, bise atu na binu kɔnyana ɔnu ɔni na muudie teete-mii.

² “Awɔ ɔni nse aani adagyaa ni, ébuli, na asɔ aaadubo bɔkana bɔta bunye ligeen kudii. Aanu-ɔ ntɛ enukplu ɔni na asɔ eeebo lɛla lɛdi bɔbla, na eeebo ukyuli ɔni mebunku-ɔ lɛnɔ.”

³ Unwoti Katɔti ɔnii, “Bina bekpone leevu biala kemmo ni, unwi pɛ kani ndubo bubu. Na bana apim unwi biala kemmo ni, eti anyɔ kani ndubo bubu.”

⁴ Unwoti unye ɔɔsu uwi biala ɔnini, “Israel, bɛwia ami Unwoti kama ulu na bɛkɛ ngba bilie!

⁵ Na bitesie Gilgal iye Betel iye Beer-Seba. Ɔsika Gilgal ku nwuna bekyuli bammɔ ƒui kekpo kadubo kebeƒie-ma na beti-ma batɔlɔku. Na bayila Betel udu kede kede na ɔsɔ uladi lɛla lɛdi.”

⁶ Bɛwia Unwoti kama ulu na bilie ngba! Si ɔɔɔdi lɛni ni, Unwoti ɔdubo ubakyula-mii aani ogya kalɛ. Na Betel ɔdubo bɔkywi kputu kputu buwi kalɔ ɔni na ukyuli ɔdi ulakana-nwu bunine.

⁷ Amii bani mɔɔtu litemi geen teenwini na biiƒú ala taakya na bilábla ala ulu lɛlɔ siin ni, amii ɔdi ɔ́sa.

⁸ Unwoti nábla ayabi lidu ɔ́kya katɔ, na enye ana kunyekɔ. Ɔɔyá na usien uugyé kadi nwaa na ɔƒɛ kadi nwaa kaasá teenwini usien. Na uudie ntu na ɛpu kemmo teewi kalɔ lɛlɔ. Nwuna lɛnyi ndi Unwoti.

⁹ Unwoti ɔɔyila bekpone bayikune udu na ɔɔbwɛ lɛma kɔgyumanakɔ kɔni na bátu bényene.

¹⁰ Bɛdi bekyuli bani nkisi bekyuli bani muudie ɔkɔ keyi na baatɛ etemila siin na beedie kenye taasu litemi geen.

¹¹ Na bɛɛnya bawabane taakya na bɛɛƒɔ́ eyi bonwu bonwu ku edula na bana kudɔ. Bɛ́tu lɛtɔ libendi bíte lɛlɔ, nsu bɛɛɛdubo-ni kemmo bulie. Na bíse adingyii mmo, nsu bɛɛɛdubo ntɛ bɔkɛ bɔsiku egyiibi ammɔ kemmo.

¹² Ami ndi Unwoti na ngyi bina ekpidi enengudi ani na bɛɛbla. Bɛɛƒɔ́ ala bɔbɛ kemmo na bɛɛyila bawabane bani nse siin lili, na biládi etemila lɛlɔ siin teete-ma.

¹³ Likpidi líse lɛ́ƒɔ uwi ɔmmɔ geen ɔni na ukyuli ɔni na ubo lɛbuni bɔbla kasusu dɛ muedi ɔlɛka ubile kenye na ɔsɔ ulie kpoo.

¹⁴ Nsu si ngba na bɛɛwia bilie bɔdi ni, ɔlɛka bɛda likpidi bɔbla bɛya na bise kalɔ bitaabla lɛbuni. Mmɔ asa na ami Unwoti Katɔti Ɔyikune Ƒui ndubɔkana na lilieku-mii aani kalɛ na amii alati bɛɛsu.

¹⁵ Bini likpidi na bɛyɔ lɛbuni bɔbla. Na bɛya na litemi geen kama bɔsia bɔkya bina etemila katɛkɔ. Ɔƒɛni kalɛ Unwoti Katɔti Ɔyikune Ƒui ɔdubɔnu Yoseƒ kaba kemmo bebi bani nébu kanyana.

¹⁶ Ɔsika Unwoti úuse kenye ɔnini, “Keku buwulo bɔdubɔƒɔ lɛblɔnu lɛmmɔ lɛlɔ ƒui na kɔnyana ku ɔlɛ bunu geen bɔdubɔkya kesi kesii. Na bemonsene bani kabla naaaƒɔ anu muedi badubɔlɔ-ma na bebebunku bani na báƒɔ lɛkwanu budie enu na bebewulo bekpine bammɔ bava.

¹⁷ Bina adingyii mmo bɔmmɔ kemmo muedi keku sɔɔn na bɛdubunu ka kada, ɔsika lɛni na lɛ́su ka ndububo mbani-mii kɔtu. Ami Unwoti násu!”

¹⁸ Binye bɛɛnu ulu teete limeyi lɛni na Unwoti webo wabatɛku bekyuli litemi, nsu bɔbuɛ na muute-mii! Ɔsika limeyi lɛmmɔ lɛɛɛdubo buse buɛɛ na ɔƒɛ ɔɔɔdubo bɔlɛ munu munu. Bɔbla na ɔdubo suu geen.

¹⁹ Bɛdubukeli gyata na bitéduo kegidi enu kemmo. Na bɛdubukeli bitéduo bina kɔduli, nsu awodu eli ani na bɛdubuti enu bɛsia bɛnii bɛɛnwuna ni, mmɔ na balakpi badubo-mii bɔdu.

²⁰ Limeyi lɛni na Unwoti ɔdubulie kalɔ ɔnii litemi na ɔɔtɛ ni, ɔdubo bɔbla suu geen na bukeye bɔdi bulakya kesi kesii munu munu.

²¹ “Ami Unwoti nkisi na líni bina emeyi bɔdi ku bina bɔkpa bumodi bɔmmɔ ƒui.

²² Na lɛɛɛdubo bina etela ku bebuo bani na bɛɛkyula teete-mi bɔƒɔ ina dɛ na bɛ́klibi-nya na adi akpala enengudi ƒui ani na bɛɛnu ka adia. Bina lɛsɛ likpludi lɛmmɔ lɛ́wɔ ɔƒaamu.

²³ Nsɔ lɛɛɛdubo-mii atu bɔkywɛɛ si uwi ɔni na bɛɛgyá bina lɛbentaa.

²⁴ Mmomu bɛya na litemi lɛlɔ bɔdi ku ala bɔbla ulu lɛlɔ siin unwini aani ketu na kataagba na bina keliela kemmo na kasɔ katakwii kudii.

²⁵ “Israelƒuɔ, ɔɔɔdi ami na bíti bebuo ku baƒonu bɛ́bla akpala bíte akwa aavlene ani na bɛ́kya ketele kemmo mmɔ.

²⁶ Mmomu bɛ́gyu Molek lɛbi ku Romƒa ayabi ani ndi baƒiɔ bani na bɛ́vɔ bíse bɛnii bitaakpa bíti.

²⁷ Anwuɔsu ndubɔya na beƒie-mii besienku ɔgyu kakaaka na Damasko kama ngye ƒui. Ami Unwoti Katɔti Ɔyikune Ƒui násu!”